سونداي-اق ماماندارعا ميتاپ, ءدارىس, كۋرس, كونفەرەنتسيا فورماتتارىندا, ال كاسىپكەرلەرگە اكسەلەراتور جانە ينكۋباتور ارنايى باعدارلامالار شەڭبەرىندە ستارتاپ نەگىزىندەگى وقىتۋ ءىس-شارالارىن جۇزەگە اسىرۋ ۇستىندە. مۇنىڭ باسى-قاسىندا قاراعاندى وبلىسىنىڭ اقپاراتتاندىرۋ, مەملەكەتتىك قىزمەتتەر كورسەتۋ جانە ارحيۆتەر باسقارماسى تۇر. اتقارالىپ جاتقان اۋقىمدى ىستەر اقىسىز نەگىزدە ۇسىنىلادى.
قازىرگە دەيىن 300-دەن استام وقىتۋ ءىس-شاراسى ءوتىپ, 270 كومپانيا ينكۋباتسيالىق جانە اكسەلەراتسيالىق باعدارلامالاردان ءساتتى ءوتتى. ونىڭ ىشىندە «تەرريكون القابى» لوگيستيكالىق قىزمەتتەر, مەديتسينالىق تەحنولوگيالار سالاسىنداعى جوبالارعا نولدەن باستاپ 350 مىڭ دوللاردان استام سوماعا ساتىلىم جاساۋعا تىكەلەي كومەكتەستى. وتكىزىلگەن دارىستەردىڭ ارقايسىسى جاس ماماندارعا IT, ماركەتينگ جانە بيزنەس باعىتتارى تۋرالى كوبىرەك بىلۋگە, سالانى تۇسىنۋگە, قاجەتتى داعدىلار مەن ءبىلىمدى ۇيرەنۋگە, سونداي-اق پايدالى باستامالاردى قۇرۋ ءۇشىن بيزنەس قاۋىمداستىق پەن ىقپالداستىققا تىڭ مۇمكىندىك بەردى. ماماندار ءوز كەزەگىندە ارىپتەستەرىنىڭ تاجىريبەسىن قابىلداپ, ءتۇرلى كەيستەردى زەرتتەپ, سەرىكتەستەر مەن ينۆەستورلاردى تاۋىپ, ءوز كومپانيالارىنىڭ ءوسۋى مەن اۋقىمى ءۇشىن جاڭا مۇمكىندىكتەردى يگەرە الدى. بولاشاقتا العان ءبىلىمىنىڭ ارقاسىندا ءىس-شاراعا قاتىسۋشىلار قاراعاندىدا IT جانە كاسىپكەرلىك سالاسىن دەربەس دامىتادى. وسىلايشا, قالاعا ماتەريالدىق قاراجات تارتىپ, ۇلعايتادى دەگەن بولجام بار.
«تەرريكون القابىنىڭ» تاعى ءبىر ءبىلىم جوباسى – «Terrikon school» باعدارلامالاۋ مەكتەبى اتاپ وتۋگە تۇرارلىق. مەكتەپتىڭ ايرىقشا ەرەكشەلىگى – كۋرستاردى تەك قازىرگى باعدارلاماشىلار عانا وقىتادى. ال باعدارلامانىڭ ءوزى داعدىلاردى پراكتيكالىق شوعىرلاندىرۋعا جانە ماماندىقتى شىندىققا جاقىن جاعدايدا زەرتتەۋگە باعىتتالعان. وقۋ اياقتالعاننان كەيىن قاتىسۋشىلار «Junior» دايىندىق دەڭگەيىن راستايتىن سەرتيفيكاتتار يەلەنەدى.
IT-حابتا كوۆوركينگ, پودكوستەرن, لەكتوريالار, كونفەرەنتس-زال جانە كەلىسسوز بولمەلەرى بار. وسىنىڭ ءبارى رەزيدەنتتەرگە جۇمىس كۇنىن ساپالى ۇيىمداستىرۋعا جانە شىعارماشىلىق الەۋەتىن جۇزەگە اسىرۋعا جول اشادى.
«تەرريكون القابىنىڭ» سوڭعى جەتىستىكتەرىنىڭ ءبىرى رەتىندە باعدارلاما تۇلەكتەرىنىڭ كرەمني القابىنداعى وقۋعا قاتىسۋىن ايتۋعا بولادى. قازاقستان مەن دۇنيەجۇزىلىك بانكتىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ باستاماسىمەن, سونداي-اق «Astana Hub» جانە «Draper University» اراسىنداعى ىنتىماقتاستىقتىڭ ارقاسىندا 15 ستارتاپتىڭ نەگىزىن قالاۋشى اقش-قا وقۋعا اتتاندى.
– مۇندا IT مامانداردىڭ دامۋى ءۇشىن تەگىن ءىس-شارالار وتكىزۋمەن اينالىسامىز. ءارتۇرلى كونفەرەنتسيا, كەزدەسۋ, ماستەر-كلاسس جانە جاڭا تەحنولوگياعا ساي مامانداردى دايىنداۋ جۇمىسى جۇرگىزىلەدى. ولاردىڭ ءبىرى – اكسەلەراتور جانە ينكۋباتور جوباسى. قازىرگى ۋاقىتتا «تەرريكون القابى» ورتالىعىندا 60-70 ورىندى قامتيتىن ەكى ءدارىسحانا بار. سونداي-اق اقىلى جانە تەگىن تۇردە كوۆوركينگ جانە پودكاست-ستۋديالار جۇمىس ىستەيدى. ءبىزدىڭ باستى ماقساتىمىز – 2025 جىلعا دەيىن 10 مىڭ IT مامان دايارلاۋ. ول ءۇشىن قالامىزدىڭ ۋنيۆەرسيتەتتەرى مەن كوللەدجەرى اراسىندا ءوزارا بايلانىستى نىعايتامىز, – دەيدى «تەرريكون القابى» IT-حابىنىڭ ديرەكتورى سابىر نيازوۆ.
قاراعاندى
