ۇلتتىق ەكونوميكا ءمينيسترى الىبەك قۋانتىروۆتىڭ ايتۋىنشا, ۇكىمەت ازىرلەپ جاتقان تاسىلدەر بيزنەستىڭ سالىق سالۋ بازاسىن كەڭەيتۋگە باعىتتالعان. سالىق جەڭىلدىكتەرى ناقتى مۋلتيپليكاتيۆتى اسەر الۋعا سەپتىگىن تيگىزەدى. مىسالى, كومپانيادا سالىق تولەۋ بويىنشا جەڭىلدەتىلگەن رەجىم بولسا, وندا ول مەكەمە جۇمىس ورنىن قۇرىپ, جاڭا ينۆەستيتسيانى جۇزەگە اسىرىپ, جەرگىلىكتى قامتۋ ۇلەسىن كوبەيتۋى ءتيىس.
ەكىنشى ءتاسىل جۇكتەمەنىڭ باسىم بولىگىن تابىسى جوعارى سالالارعا ىعىستىرىپ, حالىقتىڭ اۋقاتتى توبىنان تۇسەتىن سالىق ءتۇسىمىن ارتتىرۋعا باعىتتالعان. ءۇشىنشىسى – حالىقارالىق تاجىريبەگە ساي بولۋ جايى. كىرىستەرگە, ونىڭ ىشىندە بەيرەزيدەنتتەرگە سالىق سالۋدىڭ حالىقارالىق تاجىريبەسىن, سونداي-اق سالالار بويىنشا جۇكتەمەنى ءبولۋدى يمپلەمەنتاتسيالاۋ ۇسىنىلادى.
«سالىق ىنتالاندىرۋ تيىمدىلىگىن ارتتىرۋ ماقساتىندا ەكونوميكانىڭ ءارتۇرلى سەكتورىنداعى سالىق مولشەرلەمەلەرىن ارتاراپتاندىرۋعا كوشۋ جايى ايتىلىپ ءجۇر. اتاپ ايتقاندا, ققس مولشەرلەمەلەرىن تەك جەكەلەگەن سالالار بويىنشا عانا سارالاۋ نەمەسە قولدانىستاعى سالىق مولشەرلەمەسىن ساقتاي وتىرىپ, سالىق سوماسىن تومەندەتۋگە ماقساتتى ىنتالاندىرۋلار بەرۋ. كورپوراتيۆتى تابىس سالىعى (كتس) بويىنشا شيكىزات جانە قارجى سەكتورىنىڭ سالىق مولشەرلەمەسىن جوعارىلاتۋ قاراستىرىلىپ وتىر. سونىمەن قاتار مەملەكەت باسشىسى تەحنولوگيالىق جاڭعىرتۋعا جانە عىلىمدى دامىتۋعا باعىتتالعان كتس پايداسىن ازايتۋ نەمەسە بوساتۋ تەتىگىن ەنگىزۋ قاجەتتىگىن اتاپ ءوتتى. قولدانىستاعى زاڭنامادا پايدانى قايتا ينۆەستيتسيالاۋ كەزىندە كتس-تەن بوساتۋ قاراستىرىلعان. بۇل نورما تەك وڭدەۋشى ونەركاسىپتەگى شاعىن بيزنەس سۋبەكتىلەرىنە عانا قاتىستى. بۇگىندە اتالعان نورمانى ورتا بيزنەس سۋبەكتىلەرىنە دە قاتىستى ەتۋ تالقىلانىپ جاتىر», دەلىنگەن ۆەدومستۆو حابارلاماسىندا.
ستراتەگيالىق جوسپارلاۋ جانە رەفورمالار اگەنتتىگى توراعاسىنىڭ ورىنباسارى ولجاس تولەۋوۆتىڭ ايتۋىنشا, سالىق ساياساتىنىڭ تۇراقتى, مۇمكىندىگىنشە قاراپايىم, تۇسىنىكتى, سونداي-اق ءادىل بولۋى وتە ماڭىزدى.
«سالىق كودەكسىنىڭ الدىڭعى نۇسقالارى, ادەتتە, بيۋدجەتتىك تۇراقتىلىقتى قامتاماسىز ەتۋ جانە ونىڭ كىرىس بولىگىن كەڭەيتۋ تۇرعىسىنان جازىلعانىن اتاپ ءوتۋ ماڭىزدى. وسىلايشا, سالىق ساياساتىنىڭ نەگىزگى ماقساتى ەكونوميكانىڭ ساپالى ءوسۋى مەن ونى ءارتاراپتاندىرۋ ەمەس, سالىق تۇسىمدەرىن ءوسىرۋ بولدى. الايدا نومينالدى ىشكى جالپى ءونىمنىڭ ء(ىجو) تۇراقتى وسۋىنە قاراماستان, ءىجو-گە سالىق تۇسىمدەرى تومەندەدى جانە ولاردىڭ ديناميكاسى وتە قۇبىلمالى. قازىردىڭ وزىندە قازاقستاندا جان باسىنا شاققانداعى تابىس دەڭگەيىنىڭ كورسەتكىشتەرى دەڭگەيلەس باسقا ەلدەرمەن سالىستىرعاندا ءىجو-گە تۇسەتىن سالىق تۇسىمدەرىنىڭ كولەمى تومەن ەكەنى بايقالادى. نەگىزىندە سالىق اۋىرتپالىعىنىڭ تومەندەۋى سالىق بازاسىن كەڭەيتۋگە وڭ اسەر ەتە وتىرىپ, ەكونوميكالىق بەلسەندىلىك پەن تۇتىنۋدى ىنتالاندىرۋعا اكەلۋى كەرەك. ال بۇل ءوز كەزەگىندە سالىق تۇسىمدەرىن ءوسىرۋى ءتيىس. الايدا ءبىزدىڭ تاجىريبەمىزدە مۇنداي وزگەرىس بولعان جوق», دەيدى ول.
ونىڭ ايتۋىنشا, قازىر مەملەكەتتىك ورگانداردىڭ, نارىققا قاتىسۋشىلاردىڭ, «اتامەكەن» ۇكپ جانە باسقا دا مۇددەلى تاراپتاردىڭ قاتىسۋىمەن ۇلتتىق ەكونوميكا مينيسترلىگىنىڭ بازاسىندا ارنايى جۇمىس توبى جۇمىس ىستەپ جاتىر. مەملەكەت باسشىسىنىڭ تاپسىرماسىنا سايكەس, سالىق كودەكسىنىڭ جوباسى وسى جىلدىڭ سوڭىنا دەيىن ۇسىنىلۋى ءتيىس.
«اتامەكەن» ۇكپ توراعاسىنىڭ ورىنباسارى تيمۋر جاركەنوۆتىڭ پىكىرىنشە, جاڭا كودەكستە مەملەكەت پەن بيزنەس ءرولى قايتا قارالۋى قاجەت. ناتيجەسىندە, سالىق سالۋدى ىنتالاندىرۋدىڭ رەتتەۋشى جۇيەسىن جانە قىزمەت كورسەتۋگە باعىتتالعان سالىق قىزمەتىن قۇرۋ ارقىلى سالىق تولەۋشىلەردىڭ مۇددەلەرى مەن مەملەكەتتىك بيۋدجەت اراسىنداعى تەڭگەرىم قامتاماسىز ەتىلۋى ءتيىس.
