سۋرەتتى تۇسىرگەن يۋري بەككەر
پرەزيدەنت قاسىم-جومارت توقاەۆ 2020 جىلى «اڭساعان ءcابي» ۇلتتىق جوباسىن جاريالادى. باعدارلامانىڭ ناتيجەسىندە بەدەۋلىكتى ەكستراكورپورالدى ۇرىقتاندىرۋ (ەكۇ) ادىسىمەن ەمدەۋگە جىل سايىن 7 مىڭ كۆوتا بولىنەدى. ۇلتتىق جوبانىڭ اياسىندا 2021 جىلى ەلىمىزدە 3 مىڭنان استام بالا دۇنيەگە كەلدى. دەمەك, وسىنشا اتا-انا پەرزەنت ءسۇيۋ باقىتىنا يە بولدى.
ادامدى مەيىرىمگە بولەيتىن ءمۇسىننىڭ اشىلۋ سالتاناتىندا «ەكومەد» كلينيكالار توبىنىڭ نەگىزىن قالاۋشى جانە عىلىمي جەتەكشىسى سالتانات بايقوشقاروۆا: «ەلىمىزدەگى ءاربىر التىنشى ەرلى-زايىپتى بەدەۋلىككە دۋشار بولعان. رەسمي ستاتيستيكا بويىنشا ەلىمىزدە 21 مىڭنان اسا ادامعا بەدەۋلىك دياگنوزى قويىلعان. بار قاجىر-قايرات, قابىلەتىمدى بەدەۋلىككە قارسى كۇرەسكە ارناعان رەپرودۋكتيۆتى مەديتسينا سالاسىنىڭ مامانى رەتىندە ماعان بۇل ءمۇسىن جاي عانا سيمۆول ەمەس. ءبىزدىڭ ماقساتىمىز – رەپرودۋكتيۆتى مەديتسينا سالاسىنداعى زەرتتەۋلەردى, يننوۆاتسيالاردى قولداۋ مەن دامىتۋدىڭ ماڭىزدىلىعىنا قوعام نازارىن اۋدارۋ. سونىمەن قاتار ءسابي ءسۇيۋدى اڭساپ جۇرگەن ەرلى-زايىپتىلارعا ەموتسيونالدىق كومەك پەن جاناشىرلىق تانىتۋ دا ماڭىزدى», دەدى.
الاقانعا سالىنعان قولا ءسابيدىڭ ءمۇسىنى جاڭادان اشىلعان «New Generation Clinic» (NGC) حالىقارالىق رەپرودۋكتسيا ورتالىعى عيماراتىنىڭ قاسبەتىنە دە ەرەكشە ءسان بەرىپ تۇر. الدىن الا جوسپارلانعانداي, ول رەپرودۋكتيۆتى مەديتسينا سالاسىنداعى قاجىرلى ەڭبەك پەن جەتىستىكتەردى بەينەلەيدى. انا الاقانىنداعى ءسابيدىڭ بەينەسىندەگى كومپوزيتسيا رەپرودۋكتيۆتى دەنساۋلىق سالاسىنداعى عىلىمي جاڭالىقتار مەن يننوۆاتسيالاردىڭ ماڭىزدىلىعىن بىلدىرەدى. ءمۇسىن – انا بولۋدى ارماندايتىن ءاربىر ايەلدىڭ قۋاتى مەن نازىكتىلىگىنىڭ, سەنىمى مەن باتىلدىعىنىڭ ءرامىزى.
ەلىمىزدەگى رەپرودۋكتيۆتى تەحنولوگيالاردىڭ جوعارى دەڭگەيدە دامۋىندا ەكۇ ءادىسىنىڭ نەگىزىن قالاعان سالتانات بايقوشقاروۆانىڭ دا ۇلەسى وراسان. ول 1995 جىلى 18 ساۋىردە «ەكومەد» اتتى شاعىن زەرتحانانىڭ نەگىزىن قالادى. 1996 جىلى 31 شىلدەدە ەكۇ ادىسىمەن قازاقستاندا تۇڭعىش رەت قىز بالا دۇنيەگە كەلدى. ۋاقىت وتە كەلە شاعىن زەرتحانا ادام رەپرودۋكتسياسى كلينيكالارىنىڭ توبىنا اينالدى, ەلىمىز ءۇشىن بەدەۋلىكپەن كۇرەسەتىن جۇزدەگەن زاماناۋي مامان دايارلادى, بۇگىنگە دەيىن كلينيكادا 20 مىڭعا جۋىق ءسابي دۇنيەگە كەلدى.
– رەپرودۋكتيۆتى تەحنولوگيالار ۇزدىكسىز دامىپ كەلەدى. مەن «ەكومەد» كلينيكالار توبىنىڭ ورتالىق ازياداعى ەكستراكورپورالدى ۇرىقتاندىرۋ سالاسىنداعى كوشباسشىعا اينالعانىن ماقتان تۇتامىن. ءاۋ باستان-اق وتاندىق رەپرودۋكتيۆتى مەديتسيناعا سوڭعى جاڭالىقتار مەن تەحنولوگيالاردى ەنگىزۋدى ماقسات ەتىپ قويدىم. وسىلايشا, NGC زاماناۋي حالىقارالىق رەپرودۋكتسيا ورتالىعىن ىسكە قوسۋ يدەياسى دۇنيەگە كەلدى. بۇل – الەمدىك ستاندارتتارعا سايكەس جۇمىس ىستەيتىن, ەڭ جوعارى ساناتتاعى قىزمەت پەن ەمدەۋدى ۇسىناتىن جاڭا بۋىن كلينيكاسى. مۇندا ەلىمىزدە العاش رەت جاساندى ينتەللەكت ارقىلى بەدەۋلىكتى ەمدەۋدىڭ ەڭ زاماناۋي ادىستەرى قولدانىلادى, – دەيدى س.بايقوشقاروۆا.
الماتى
