كونكۋرسقا قاتىسۋ ءۇشىن وتىنىمدەر 25 ماۋسىمعا دەيىن قابىلدانادى.
بيىل «بولاشاق» باعدارلاماسى اياسىندا 555 ستيپەنديا ءبولىندى. ونىڭ ىشىندە ماگيستراتۋرا جانە رەزيدەنتۋراعا – 395; دوكتورانتۋراعا – 50, تاعىلىمداما باعدارلامالارىنا – 110 ستيپەنديا بار. باسىم ماماندىقتار ءتىزىمى 262 ماماندىقتى كوزدەيدى.
2023 جىلى «بولاشاق» ستيپەندياسى اياسىندا ۇمىتكەرلەردى ىرىكتەۋ قاعيدالارى جەتىلدىرىلدى. ەندى كونكۋرسقا شەتەلدىك جوعارى وقۋ ورنى نەمەسە ۇيىمنان اكادەميالىق وقۋعا گرانتى بار ۇمىتكەرلەر دە قاتىسا الادى. بۇل رەتتە, «بولاشاق» باعدارلاماسى شەتەلگە ورنالاسۋ, تاماقتانۋ, مەديتسينالىق ساقتاندىرۋ, ۇشۋ, ۆيزالىق الىمدار, وقۋ ماتەريالدارىن ساتىپ الۋ شىعىندارىن وتەيتىن بولادى. سونداي-اق ەڭبەكپەن وتەۋ مەرزىمى ءبىر جىلعا قىسقارادى.
قازاقستاندىق تەحنيكالىق قىزمەتكەرلەر مەن IT-ماماندار ءبىر جىل بويى تەگىن فرانتسۋز ءتىلى كۋرستارىنان وتە الادى.
«حالىقارالىق باعدارلامالار ورتالىعى جانە فرانتسيانىڭ قازاقستانداعى ەلشىلىگى اراسىنداعى كەلىسىمنىڭ ارقاسىندا قازاقستاندىق تەحنيكالىق قىزمەتكەرلەر مەن IT-ماماندار ءبىر جىل بويى تەگىن فرانتسۋز ءتىلى كۋرستارىنان وتۋگە مۇمكىندىك الدى. بۇل فرانتسۋز ءتىلىن باستاۋىش دەڭگەيدەن مەڭگەرۋدى قالايتىندار ءۇشىن, سونداي-اق كاسىبي دەڭگەيدە مەڭگەرۋگە نيەت بىلدىرەتىندەر ءۇشىن تاماشا مۇمكىندىك. تىلدىك دايىندىق فرانتسيانىڭ قازاقستانداعى ەلشىلىگىنىڭ قولداۋىمەن استانا, الماتى, قاراعاندى, قوستاناي جانە شىمكەنت قالالارىندا ورنالاسقان فرانتسۋز اليانسىنىڭ ورتالىقتارىندا وتەدى», دەدى حالىقارالىق باعدارلامالار ورتالىعىنىڭ باسقارما توراعاسى ولجاس ساكەنوۆ.
ونىڭ ايتۋىنشا, كونكۋرستىق ىرىكتەۋگە جاسى 35-كە تولماعان ينجەنەرلىك-تەحنيكالىق سالاداعى جاس ماماندار قاتىسا الادى. سونىمەن قاتار ۇمىتكەرلەر ديپلومىنىڭ ورتاشا بالى – GPA كەمىندە 4.00-دەن 3.00 بولۋى كەرەك.
ەستەرىڭىزگە سالا كەتسەك, 2023 جىلدان باستاپ ينجەنەرلىك-تەحنيكالىق قىزمەتكەرلەر «بولاشاق» ستيپەندياسىن تاعايىنداۋ كونكۋرسىنا جەڭىلدەتىلگەن شارتتارمەن قاتىسادى.
تەحنيكالىق قىزمەتكەرلەر قۇجات تاپسىرعان كەزدە شەتەلدىك جوو-عا ءوز بەتىمەن تۇسۋگە مىندەتتى ەمەس. ولاردىڭ ستيپەنديا تاعايىندالعاننان كەيىن باعدارلاما اياسىندا ءبىلىم الۋعا ۇسىنىلعان ۋنيۆەرسيتەتتەر تىزىمىنەن وقۋ ورنىن تاڭداۋعا مۇمكىندىگى بار.
