سوڭعى قوڭىراۋ سالتاناتى

بۇل ءبىلىم ورداسىنىڭ باسقا مەكتەپتەردەن ەرەكشەلىگى – مۇندا وقۋ مەن تاربيە ۇلتتىق قۇندىلىقتارعا نەگىزدەلگەن. بيىل اتالعان مەكتەپتى 45 وقۋشى ءتامامداپ وتىر, ولاردىڭ اراسىندا «التىن بەلگىگە» ۇمىتكەر ءۇش, ۇزدىك اتتەستاتقا ۇمىتكەر ەكى تۇلەك بار. سالتاناتتى ءىس-شارادا وقۋ-اعارتۋ ءمينيسترى عاني بەيسەمباەۆ مازمۇندى مەرەكەمەن جينال­عان قاۋىمدى قۇتتىقتاپ, جاس تۇلەكتەرگە ءسات-ساپار تىلەدى.

– بيىل ءبىلىم بەرۋ تاريحىندا العاش رەت وقۋ كەزەڭى 31 مامىردا اياقتالىپ وتىر. ءبىلىم ساپاسىن جاقسارتۋ قاجەتتىلىگىنەن تۋىنداعان بۇل وزگەرىستى تۇسىنىستىكپەن قابىلداپ, شىدامدىلىق پەن قولداۋ تانىتقان ءاربىر مۇعالىم مەن وقۋشىعا جانە اتا-اناعا العىسىمدى بىلدىرەمىن. بيىلعى مەكتەپ ءبىتىرۋ سالتاناتى بالالاردى قورعاۋ كۇنىمەن تۇسپا-تۇس كەلدى. بالا – وتباسىنىڭ, قوعامنىڭ, مەملەكەتتىڭ ەڭ قىمباتتىسى, بولاشاعىمىزدىڭ ۇكىلى ءۇمىتى. تۇلەكتەر, مىنە, سىزدەر التىن ۇيا – مەكتەپتەرىڭىزگە تارىداي بولىپ كىرىپ, تاۋداي بولىپ شىعىپ, جاڭا ومىرگە العاشقى قادام باسقالى وتىرسىزدار. الدا ۇلتتىق بىرىڭعاي تەستىلەۋ ەمتيحانى تۇر. سونى ويداعىداي تاپسىرىپ, وزدەرىڭىز قالاعان جوعارى وقۋ ورنىنا ءتۇسىپ, ۇزدىك ماماندىق يەسى بولىڭىزدار. بارلىعىڭىزعا اق جول تىلەيمىن! – دەدى مينيستر.

سونداي-اق عاني بەيسەمباەۆ ەلىمىزدە بيىل 11-سىنىپتى 172 مىڭ تۇلەك بىتىر­گەنىن اتاپ ءوتتى. ودان كەيىن №8 مەك­تەپ-ليتسەيىنىڭ ديرەكتورى گۇلنۇر ءايتىموۆا ون ءبىر جىل ءبىلىم العان التىن ۇياسىمەن قوشتاسقالى تۇرعان وقۋ­شىلارىنا جىلى لەبىزىن جەتكىزدى.

– بۇل كۇن سىزدەر ءۇشىن ەشقاشان ۇمى­تىلمايدى دەپ سەنەمىن. ەندى ارمان جولىنا قانات قاعىپ وتىرسىزدار. ءبىز سىزدەرگە ساپالى ءبىلىم عانا ەمەس, ۇلتتىق قۇندىلىقتارعا باي تاربيە دە بەردىك. سول بويلارىڭىزعا دارىعان قۇن­دىلىقتى الداعى ومىرلەرىڭىزدە ساق­تاپ, ەلىمىزدىڭ بىرەگەي تۇلعاسى بو­لىڭىزدار. ءبىزدىڭ مەكتەبىمىزدىڭ اتىن بيىكتەن كورسەتىڭىزدەر. ءبىز سىزدەردى ماق­تانىش ەتەمىز! – دەدى ول.

سونىمەن قاتار مەكتەپ بىتىرۋ­شى­لەردىڭ اتا-انالارى اتىنان ەركىن يسابەكوۆ ءسوز الىپ, جاس تۇلەكتەرگە ىزگى تى­لە­گىن ءبىلدىردى.

استانا قالالىق ءبىلىم باسقارماسىنىڭ باسشىسى قاسىمحان سەنعازىەۆتىڭ ايتۋىن­شا, بيىل باس شاھاردا 9 500 تۇلەك مەكتەپ ءبىتىردى.

– بۇگىن ەلوراداعى بارلىق مەكتەپتە سوڭعى قوڭىراۋ سوعىلدى. ەندى مەكتەپ بىتىرۋشىلەردىڭ الدىندا ۇلتتىق بىرىڭعاي تەستىلەۋ تۇر. سودان جوعارى ۇپاي الىپ, وزدەرى ارمانداعان جوعارى وقۋ ورىندارىنا تۇسۋىنە تىلەكتەسپىن! سونداي-اق بۇگىن بالالاردى قورعاۋ كۇنىنە وراي, باس قالادا 100-دەن اسا ءىس-شارا ۇيىمداستىرىلدى. وقۋشىلاردىڭ جازعى دەمالىسى مازمۇنعا تولى ءارى قىزىقتى ءوتۋ ءۇشىن مەكتەپ جانىنان لاگەرلەر جۇمىس ىستەيدى. ءبىزدىڭ باسقارماعا قاتىستى قالا سىرتىندا ەكى لاگەر بار. بۇدان بولەك, پاندىك, سپورتتىق لاگەرلەر قۇرىلدى, – دەدى باسقارما باسشىسى.

ودان سوڭ مازمۇندى شارا اتالعان ءبىلىم ورداسىنىڭ وقۋشىلارى دايىنداعان مە­رەكەلىك باعدارلاماعا ۇلاستى. سودان كەيىن سوڭعى قوڭىراۋ سوعىلىپ, جاس تۇ­­­لەك­تەر قوشتاسۋ ءۆالسىن بيلەدى.

بۇل كۇنى ەلورداداعى №71 مەكتەپ-ليتسەيىندە وتكەن سوڭعى قوڭىراۋ سالتاناتىنا دا كۋا بولدىق. مەكتەپ ديرەكتورى مايا مۇقاشەۆانىڭ ايتۋىنشا, بيىل مەكتەپ-ليتسەيىن 99 وقۋشى اياقتادى. ولاردىڭ 12-ءسى – «التىن بەلگىگە» ۇمىتكەر. سالتاناتتى ءىس-شارا بارىسىندا قالالىق, رەسپۋبليكالىق بايقاۋلاردا توپ جارعان وقۋشىلارعا العىس حاتتار تابىستالدى. مەكتەپ تۇلەكتەرى تەك ءبىلىم, عىلىمدا عانا ەمەس, سۋرەت ونەرى, سپورت, مۋزىكادان دا كوپ جەتىستىككە جەتكەن.