ماۋلەن اشىمباەۆ فەدەراتسيانىڭ جۇيەلى جۇمىسىنىڭ ناتيجەسىندە قىسقا مەرزىمنىڭ ىشىندە ەلىمىزدىڭ ءىرى قالالارىندا ۇيىرمە-فيليالدار اشىلعانىن ايتتى.
سونداي-اق سەنات توراعاسى تۋرنيرگە قاتىسۋشىلار ەلىمىزدە بۇقارالىق سپورتتى دامىتۋعا ۇلكەن ۇلەس قوسىپ وتىرعانىن جانە بۇل باعىت مەملەكەت باسشىسىنىڭ باستى نازارىندا ەكەنىن اتاپ ءوتتى. ەرەكشە قاجەتتىلىگى بار ازاماتتاردى قولداۋ جانە ءار ادام ءوزىن جايلى سەزىنەتىن كەدەرگىسىز ورتا قۇرۋ باعىتىنداعى كەشەندى جۇمىس – ەل پرەزيدەنتىنىڭ باستاماسىمەن قولعا الىنعان رەفورمالاردىڭ كۇن تارتىبىندەگى ماڭىزدى مىندەتتەردىڭ ءبىرى.
«قازىرگى تاڭدا ەلىمىزدە ينكليۋزيۆتى, كەدەرگىسىز ورتا قۇرۋ ءۇشىن بارلىق جاعداي جاسالۋدا. وسى جولدا بەرىك ينستيتۋتسيونالدى نەگىز قالىپتاسىپ جاتىر. بۇل سالا مەملەكەت باسشىسى قاسىم-جومارت توقاەۆتىڭ ۇنەمى باستى نازارىندا. پرەزيدەنتىمىزدىڭ تاپسىرماسى بويىنشا وسى باعىتتا اۋقىمدى جۇمىس اتقارىلىپ كەلەدى. سونىڭ اياسىندا بالالار مەن ەرەسەكتەردىڭ ساپالى ءبىلىم مەن مەديتسينالىق قىزمەت الۋىنا جانە سپورتپەن شۇعىلدانۋىنا ءتيىستى جاعداي جاسالىپ جاتىر. وسى ورايدا ينكليۋزيۆتى سپورت تۇرلەرىن دامىتۋ تەڭ مۇمكىندىكتەر قوعامىن قۇرۋعا سالماقتى ۇلەسىن قوسادى دەپ سەنەمىن», دەدى ماۋلەن اشىمباەۆ.
سونىمەن قاتار پالاتا سپيكەرى بوچچا ەلىمىز ءۇشىن جاڭا ءارى قارقىندى دامىپ كەلە جاتقان سپورت ءتۇرى ەكەنىنە نازار اۋداردى. سوعان قاراماستان, قازاقستان بوچچا فەدەراتسياسى ەكى جىلدىڭ ىشىندە بەلگىلى ءبىر جەتىستىككە قول جەتكىزدى.
«بيىل ءبىز رەسمي تۇردە حالىقارالىق فەدەراتسيانىڭ مۇشەسى بولدىق. بۇل ءبىزدىڭ سپورتشىلارىمىزدىڭ ءىرى حالىقارالىق سايىستارعا قاتىسۋىنا جول اشادى. الدىمىزدا پاراليمپيادالىق ويىندارعا قاتىسۋ سياقتى ناقتى ماقسات-مىندەتتەر تۇر. قازىردىڭ وزىندە ەلىمىزدە بوچچادان ۇلتتىق قۇراما جاساقتالدى. وسى چەمپيوناتتىڭ قورىتىندىسى بويىنشا باس كوماندامىز جاڭا سپورتشىلارمەن تولىعادى. وسىنداي كرەاتيۆتى جانە تاتۋ كوماندامەن بىرگە بولعانىم ءۇشىن قۋانىشتىمىن. الداعى ۋاقىتتا دا ەلىمىزدە ينكليۋزيۆتى سپورت تۇرلەرىن دامىتۋ جولىندا ءبارىمىز بىرلەسىپ, ناتيجەلى جۇمىس ىستەيمىز دەپ سەنەمىن», دەدى ماۋلەن اشىمباەۆ. سونداي-اق ول سەنات توراعاسى سپورتشىلارعا قولداۋ كورسەتۋدى جالعاستىرا بەرەتىنىن ايتتى.
جالپى, بوچچادان ەل چەمپيوناتىنا مۇگەدەكتىگى بار 400-دەن اسا بالا مەن ەرەسەك جينالدى. ولاردىڭ 47-ءسى تۋرنيرگە قاتىسىپ, باق سىنايدى. سايىسقا ارنايى كەلگەن مەيمانداردىڭ قاتارىندا ينكليۋزيا مەن بەيىمدى سپورتقا قولداۋ كورسەتىپ كەلە جاتقان بەلگىلى قوعام قايراتكەرلەرى مەن بەلسەندى ازاماتتار بار. بىرىنشىلىك جەڭىمپازدارى ۇلتتىق قۇراماعا قابىلدانىپ, چەللەندج, پاراليمپيادا, ازيا پاراليمپيادالىق ويىندارى سياقتى حالىقارالىق دودالاردا ەل نامىسىن قورعايدى.
ەستەرىڭىزگە سالا كەتەيىك, بوچچا – دوپپەن وينايتىن سپورت ءتۇرى. وعان تىرەك-قيمىل اپپاراتى بۇزىلعان جاندار قاتىسادى. اتالعان سايىس 1984 جىلى پاراليمپيادالىق ويىندار باعدارلاماسىنا ەنگىزىلگەن. بيىل ناۋرىز ايىندا قازاقستان بوچچا فەدەراتسياسى «Boccia International Sports Federation» (BISFed) – حالىقارالىق بوچچا فەدەراتسياسىنىڭ مۇشەسى بولدى.
