سەزىمدى قايتەم, تۋلاعان...

بىرەر جىل بۇرىن «Despacito» دەگەن ءان حيتكە اينالعانى بەلگىلى. بىلىكتى ما­مانداردىڭ ايتۋىنشا, «You Tube» ارناسىندا 8,1 ميل­ليارد قارالىم جيناعان حيت تىم قارا­پايىم ءارى قارابايىر شىعارما ەكەن. ءتورت اككورد باستان-اياق اۋىسپايدى دەسەدى ماماندار. الايدا سول قارابايىر تۋىندى الەم جۇرتىن تامساندىرىپ تاس­تادى عوي. قارالىمى – 8,1 ميلليارد. جالپى, جەر شارىنداعى ادامنىڭ ءبارى كورىپ شىققان با سوندا؟

جەڭىلتەك اندەردەن شارشاعاندا سال­ماقتى شىعارمانى, كوڭىل پەرنەسىن ءدوپ باساتىن ءاندى ىزدەيتىنىمىز تاعى بار. اقىن سەرىك تومانوۆتىڭ ولەڭىنە جازىلعان «سەزىمدى قايتەم, تۋلاعان» ءانى كومپوزيتور سارسەنبەك باكىردىڭ تالعامىنا ساي كەلگەنى ءسوزسىز. اقىننىڭ ءوزى «ساندۋعاش ءۇندى, سارعالداق ءوڭدى سارى بالا» دەپ اتا­عان سارسەنبەك جازعان ءان دە جالپىحالىق­تىق حيت بولىپ ەدى.

باياۋ ىرعاقتى تاماشا تۋىندىنى ەستى تىڭدارمان ءالى ۇمىتا قويعان جوق. ويتكەنى ءاننىڭ ءماتىنى مەن مۋزىكاسىنىڭ ۇيلەسىم تابۋىنىڭ ارقاسىندا شىعارما تىڭدارمان قاۋىمنىڭ جۇرەگىنەن ورىن العانى اقيقات. تالعامى جوعارى كومپوزيتور ءبىرىنشى كەزەكتە ءاننىڭ ماتىنىنە نازار اۋدارسا كەرەك.

«كوزىڭدى قايتەم,

قارايتىن ماعان ۇرلانا,

ءسوزىڭدى قايتەم,

سيقىرلى سازدى دۋمان ءان.

ءتوزىمدى قويشى, تاۋسىلار سەنى كۇتۋدەن,

سەزىمدى قايتەم, سەزىمدى قايتەم,

سەزىمدى قايتەم تۋلاعان»,

دەپ باستالاتىن ءاننىڭ العاشقى شۋماعىنىڭ ءوزى انگە اڭسارى اۋعان تىڭدارمانىن بىردەن باۋراپ الاتىنى شىندىق.

ارينە, قازىرگى جاستاردىڭ ءبىر بولىگى ترەندتەگى اندەرگە دەن قويعاندىقتان, رەت­روعا اينالا باستاعان تۋىندىلار كوپ تىڭ­دالا بەرمەيتىندەي كورىنەدى. الايدا كولىك­تە كەتىپ بارا جاتقاندا ورتا بۋىن وكىلدەرى ­وسى ءبىر تاماشا شىعارمانى تىڭداپ وتىر­عا­نىن كورگەندە قۋانىپ قالا­مىز. باستى­سى, كومپوزيتور مەن اقىننىڭ تال­عامى­نان, ۇيلەسىمىنەن تۋعان ەسكى ءارى ەستى شىعار­مانى جۇرتتىڭ جادىنان شىعارماعانى كوڭىل­گە مەدەۋ بولادى.

اۋليەاتانىڭ شايىرلارى تۋرا­لى ءسوز قوزعالسا, ءا دەگەننەن سەرىك تومانوۆتىڭ ەسىمىن اتايتىندار از ەمەس قوي. ورنەگى وزگەشە ولەڭدەرىمەن جامبىل جۇرتشىلىعىنىڭ جادىندا وشپەس ءىز قالدىرعان اقىننىڭ ولەڭىنە جازىلعان اندەر دە تومانوۆ بيىگىن الاسارتپاي تۇرعانداي كورىنەدى. وعان ەشكىمنىڭ تالاسى جوق.

«كۇندەردى قايتەم,

سىناپتاي سىرعىپ زۋلاعان,

تۇندەردى قايتەم,

ۇيقىمدى مەنىڭ ۇرلاعان.

ءوزىمدى قويشى, وزەگىم جالىن ورتەگەن,

سەزىمدى قايتەم, سەزىمدى قايتەم,

سەزىمدى قايتەم, تۋلاعان.

سىرىمدى قايتەم,

سىڭار بوپ ساعان تۋماعان,

مۇڭىمدى قايتەم,

ءماجنۇننىڭ جولىن قۋماعان.

ءومىردى قويشى, وتەر دە كەتەر وكىنتىپ,

سەزىمدى قايتەم, سەزىمدى قايتەم,

سەزىمدى قايتەم, تۋلاعان».

ۇزىن-ىرعاسى ءۇش شۋماقتان تۇراتىن سار­سەنبەكتىڭ وسى ءانىن كەيىنگى تولقىن دا گيتا­رامەن ورىنداپ جۇرگەنىن كوز شالىپ قالادى. اسىرەسە ساياباقتاردا سەرۋەن­دەپ, كەشقۇرىم ەل ورتاسىندا ءجۇرىپ ءان شىر­قاي­تىن مەلومان جاستاردىڭ اۋزىنان ەستىگەندە, راسىمەن دە جانىڭ راقاتتانىپ قالادى. 18-20 جاس شاماسىنداعى جاستاردىڭ تانىمى قۇلدىراماعانىنا, تالعامىنىڭ تومەندەمەگەنىنە شۇكىر دەيسىڭ.

ساعىنىشقا تولى ماحاببات سىرى تۇ­نىپ تۇرعان «سەزىمدى قايتەم, تۋلاعان» ءانىن جۇرت اۋەلدە «نۇر-مۇقاسان» دۋەتىنىڭ ورىنداۋىندا جىلى قابىلداعانى الىم­ساق­تان ايان. كەيىن وزگە دە انشىلەر سىرشىل شى­­عارمانى ناقىشىنا كەلتىرىپ شىرقاپ, اۋەزدى تۋىندىعا ەكىنشى ءومىر سىيلاعانىن كورىپ ءجۇرمىز.

قالاي دەسەك تە, ايتارى بار ءاننىڭ عۇ­مى­رى كەلتە بولمايتىنى داۋسىز. ويت­كەنى ول مەزەتتىك مەلوديا مەن ساتتىك يلليۋ­زيا­نىڭ جەمىسى ەمەس. ەستى ءاننىڭ ءوز تاع­دىرى بولادى.

«سەزىمدى قايتەم, تۋلاعان» ءانى تىڭ­دار­ماننىڭ تالعامىنان وزا تۋعان شىعارما ەكەنىنە ەشكىمنىڭ كۇمانى جوق. سودان دا بولسا كەرەك, ونەرسۇيەر قاۋىمنىڭ جۇرەگىنەن, ويىنان وشپەي تۇرعانى, تىڭدارمانى­مەن بىرگە جاساپ كەلە جاتقانى. مۇنداي تاماشا اندەردىڭ اۋديتورياسىنان اجىراماعا­نى قازاق حالقى ءالى دە بولسا تالعامسىزدىق دەرتىنە شالدىقپاعانىن ايعاقتاي تۇسسە كەرەك.

جامبىل وبلىسى