Finprom.kz مالىمەتىنشە, ەلىمىزدە ينتەرنەت جىلدامدىعى ءبىر جىلدا 47,9 پايىزعا, ياعني 2022 جىلعى ساۋىردەگى 20,7 مبيت/س-تان بيىلعى ساۋىردە 30,62 مبيت/س دەيىن وسكەن. ارمەنياداعى ينتەرنەت جىلدامدىعى 26,25 مبيت/س, قىرعىزستاندا – 25,83 مبيت/س, وزبەكستان مەن تاجىكستاندا تيىسىنشە 20,9 مبيت/س جانە 11,38 مبيت/س قۇراعان.
ورتالىق ازياداعى وپەراتورلاردىڭ ىشىندە 2022 جىلدىڭ ءتورتىنشى توقسانىندا «Tele2 قازاقستان» وپەراتورى ءموبيلدى ينتەرنەتتى جۇكتەۋدىڭ ەڭ جوعارى ورتاشا جىلدامدىعىن كورسەتتى (27,25 مبيت/س). بۇل 2021 جىلدىڭ سايكەس كەزەڭىندەگى ورتاشا جىلدامدىقتان (26,13 مبيت/س) اسىپ تۇسكەن. «Ookla» ساراپشىلارىنىڭ پىكىرىنشە, كومپانيا ءۇش جىل بويى كوشباسشىلىقتى جانە ءموبيلدى ينتەرنەت جىلدامدىعى بويىنشا ۇزدىك مارتەبەنى ساقتاپ كەلەدى. ەكىنشى ورىندا 23,56 مبيت/س جىلدامدىقپەن «MEGA قىرعىزستان» وپەراتورى تۇر. بۇل رەتتە تاجىكستاننىڭ «MegaFon», «ZET-MOBILE» جانە «Tcell» ۇيالى بايلانىس وپەراتورى ەڭ ناشار ناتيجە كورسەتكەن.
جەكەلەگەن قالالاردى قاراستىراتىن بولساق, وتكەن جىلدىڭ ءتورتىنشى توقسانىندا ورتالىق ازياداعى ينتەرنەت جىلدامدىعى بويىنشا ءبىرىنشى ورىندى يەلەنگەن شاھار – الماتى. وڭتۇستىك استانامىزدا ورتاشا جۇكتەۋ جىلدامدىعى 25,78 مبيت/س, ال ورتاشا بەرۋ جىلدامدىعى 11,06 مبيت/س قۇراعان.
قازاقستانداعى ينتەرنەتتىڭ جوعارى جىلدامدىعى مەن ساپاسىنا سالاعا سالىنعان تۇراقتى ءارى قوماقتى ينۆەستيتسيالار وڭ اسەر ەتىپ وتىر. ماسەلەن, وسى جىلدىڭ ءتورت ايىندا عانا اقپارات جانە بايلانىس سەكتورىنا سالىنعان ينۆەستيتسيا 30,3 ملرد تەڭگەنى قۇرادى. كورسەتكىش وتكەن جىلدىڭ سايكەس كەزەڭىمەن سالىستىرعاندا 16,6 پايىزعا جوعارى. جالپى, 2022 جىلعى قاڭتار-جەلتوقسان ارالىعىندا ينۆەستيتسيالار ءبىر جىل بۇرىنعى دەڭگەيمەن سالىستىرعاندا 39,1 پايىزعا, ياعني رەكوردتىق 178,9 ملرد تەڭگەگە دەيىن ۇلعايعان.
ماسەلەن, ءموبيلدى ينتەرنەت جىلدامدىعى بويىنشا «Tele2» وپەراتورى جىل سايىن كىرىستىڭ 15-20 پايىزىن ينفراقۇرىلىمعا جۇمسايدى. بۇل جاڭا جوبالار مەن جاڭا تەحنولوگيالاردى ىسكە قوسۋعا ارنالعان قوماقتى قاراجات ەكەنى تۇسىنىكتى. جاڭا بازالىق ستانسالاردى سالۋدان بولەك, وپەراتور قولدانىستاعى سايتتاردى جاقسارتۋ ءۇشىن قاجەتتى جاڭا جابدىقتاردى ۇنەمى ساتىپ الىپ وتىرادى. ماڭىزدى ينفراقۇرىلىم نىساندارىنا كومپانيا تابىسىنىڭ ەداۋىر بولىگى قايتا ينۆەستيتسيالاناتىنىن دا ۇمىتپايىق.
ۇلتتىق ستاتيستيكا بيۋروسىنىڭ مالىمەتىنە سۇيەنسەك, ەلىمىزدىڭ تەلەكوم سەكتورىنداعى ويىنشىلار نەگىزىنەن ەسكى جابدىقتاردى اۋىستىرۋ, ابونەنتتەر سانىن ۇلعايتۋ ماقساتىندا وندىرىستىك قۋاتتاردى كەڭەيتۋ, جاڭا تەحنولوگيالاردى ەنگىزۋ, قولدانىستاعى قىزمەتتەردى وڭتايلاندىرۋ, ماتەريالدىق-تەحنيكالىق قامتاماسىز ەتۋدى وڭتايلاندىرۋ, ابونەنتتەر سانى وزگەرمەگەن كەزدە جاڭا وندىرىستىك قۋاتتاردى ەنگىزۋ سياقتى باعىتتارعا ينۆەستيتسيا سالادى.
