«دوستار, وزدەرىڭىز بىلەتىندەي, بىرەر ايدان بەرى «استانا سۋ ارناسى» سۋ قىسىمىن تومەندەتۋگە ءماجبۇر بولدى. كەيبىر تۇرعىن ءۇي كەشەندەرىندە سورعىلارىنا بايلانىستى قيىندىقتار تۋىندادى, ماماندار ارنايى بارىپ, باسقارۋشى كومپانيالارعا جۇيەلەردى قايتا جوندەۋ ىسىنە كومەكتەستى.
ماۋسىم ايىنان باستاپ ءبىز جاڭا اۋىز سۋ ستانتسياسىن (سسس-3) كەزەڭ-كەزەڭىمەن قولدانىسقا بەرە باستايمىز: الدىمەن ىسكە قوسۋ ءارى جوندەۋ جۇمىسى جۇرگىزىلىپ, جۇيەنى تەكسەرەمىز, سودان كەيىن كۇنىنە 35 مىڭ تەكشە مەتر سۋ بەرەمىز. تامىز ايىندا كۇنىنە 105 مىڭ تەكشە مەتر كولەمدە ىسكە قوسۋدى جوسپارلاپ وتىرمىز. بۇل قالاداعى سۋمەن جابدىقتاۋ ماسەلەسىن تولىعىمەن شەشۋگە مۇمكىندىك بەرەدى. ونىڭ ىشىندە قۇرىلىس جۇمىسى ءجۇرىپ جاتقان اۋداندار دا بار», دەپ جازدى اكىم.
سونداي-اق ول جىلىتۋ ماۋسىمىنىڭ ماسەلەسىن قوزعادى.
«قالا ءوسىپ, تۇرعىن ءۇي, الەۋمەتتىك جانە وزگە دە نىساندار سانى ارتىپ كەلەدى. ونىڭ ءبارىن جىلىتۋ كەرەك. قالامىزدا جىلىتۋ ماۋسىمى ورتا ەسەپپەن العاندا 7-8 ايعا سوزىلادى. مۇنىڭ ءبارى تىرشىلىكتى قامتاماسىز ەتۋ جۇيەسىنىڭ نىساندارىنا ۇلكەن كۇش تۇسىرەدى.
اتالعان ماسەلەنى شەشۋ ءۇشىن وسىعان دەيىن ەكى گاز جىلىتۋ ستانتسياسىنىڭ («تۇران», «وڭتۇستىك-شىعىس») قۇرىلىسى باستالعان بولاتىن. سونداي-اق جەو-3 بويىنشا دا جۇمىس ءجۇرىپ جاتىر, ول قۇرىلىسى ۇزاققا سوزىلعان نىسانعا اينالدى. وسى نىسانداردىڭ قۇرىلىسىن اياقتاپ, 2023-2024 جىلىتۋ ماۋسىمىنا ولاردىڭ قۋاتىن ەسكەرە وتىرىپ, ىسكە قوسۋدى مىندەتتەدىم. مەردىگەرلەر جاۋاپكەرشىلىكتى تولىقتاي ءبىلۋى كەرەك», دەپ جازدى جەڭىس قاسىمبەك.
