«7 جاسقا دەيىنگى بالالار ءۇشىن پويىزعا ءمىنۋ اقىسى تەگىن. الايدا ولارعا بولەك ورىن قاراستىرىلمايدى. وزىنە بولەك ورىن بەرۋ ءۇشىن بالالار بيلەتىن الۋ قاجەت. ەگەر 7 جاسقا دەيىنگى بالالار سانى ەكى نەمەسە ودان كوپ بولسا بالالارعا ارنالعان بيلەت الۋ قاجەت بولادى. 7-15 جاس ارالىعىنداعى بالالار بيلەتىنە ەرەسەكتەر بيلەتى قۇنىنىڭ 50 پايىزى كولەمىندە جەڭىلدىكتەر بار. 15 جاستان جوعارى بالالارعا ەرەسەك ادامدارمەن بىردەي باعادا بيلەت الىنادى», دەپ حابارلادى «قازاقستان تەمىر جولى» ۇك» اق ءباسپاسوز قىزمەتى.
بالالار بيلەتىن الۋ ءۇشىن قانداي قۇجاتتار قاجەت؟
بالاعا بيلەت الۋ ءۇشىن جەكە باسىن كۋالاندىراتىن قۇجات – بالانىڭ تۋ تۋرالى كۋالىگى نەمەسە پاسپورتى كەرەك بولادى.
بالانىڭ تۋ تۋرالى كۋالىگى نەمەسە ونىڭ نوتاريالدى كۋالاندىرىلعان كوشىرمەسى بيلەتپەن بىرگە جولسەرىككە پويىزعا مىنەر الدىندا بەرىلەدى.
بالانىڭ جالعىز ءوزىن پويىزبەن قالاي جىبەرۋگە بولادى؟
15 جاسقا دەيىنگى بالالار تەك ەرەسەكتەرمەن بىرگە عانا پويىزعا وتىرا الادى. ەگەر بالا پويىزدا ونىڭ زاڭدى وكىلى بولىپ تابىلمايتىن اداممەن بىرگە باراتىن بولسا, وندا سول ادامنىڭ بالانى ەرتىپ جۇرۋىنە رۇقسات ەتىلگەن نوتاريالدى كۋالاندىرىلعان سەنىمحات كەرەك بولادى.
15 جاستان اسقان بالالار نوتاريالدى كۋالاندىرىلعان سەنىمحاتپەن ءوزى ساياحاتقا شىعا الادى.
ال جولاۋشىلار پويىزىنا وتىرعىزعاندا نەمەسە جولدا بالانىڭ قاسىندا زاڭدى وكىلى بىرگە بولعان جاعدايدا سەنىمحات كورسەتۋ تالاپ ەتىلمەيدى.
