وبلىستىق ءبىلىم باسقارماسىنىڭ باسشىسى ءنازىر جاشىبەكوۆتىڭ ايتۋىنا قاراعاندا, جالپى ورتا ءبىلىم بەرۋ كۋرسىن 3 345 وقۋشى ءتامامدايدى. ولار مەملەكەتتىك ەمتيحاندى 5-19 ماۋسىم ارالىعىندا 5 ساباقتان تاپسىرادى, ونىڭ 4-ەۋى – مىندەتتى, 1-ەۋى تاڭداۋ بويىنشا. بەس ەمتيحاننىڭ تورتەۋى جازباشا وتەدى. «قازاقستان تاريحى» بويىنشا اۋىزشا تاپسىرادى. ساباق اياقتالعاننان كەيىن وقۋشىلاردى وتانسۇيگىشتىككە, بەيبىتشىلىككە, دوستىققا تاربيەلەۋگە, قۋعىن-سۇرگىن جانە اشتىق قۇرباندارىن قۇرمەتتەۋگە ارنالعان سىنىپ ساعاتتارى وتەدى. سونىمەن قاتار وقۋ جىلىنىڭ قورىتىندىسىن شىعارۋ جانە جازعى دەمالىسقا دايىندىق ماسەلەلەرى تالقىلانادى.
وبلىستا بيىل 109 تۇلەك «التىن بەلگى» ماراپاتىنا, ال «ۇزدىك اتتەستاتقا» 11-سىنىپتى بىتىرەتىن 200 وقۋشى جانە 9-سىنىپتى ءتامامدايتىن 379 وقۋشى ۇمىتكەر بولىپ وتىر. ەمتيحاندى مەكتەپتەردىڭ مەملەكەتتىك كوميسسيالارى, ال «التىن بەلگىگە» ۇمىتكەرلەردىڭ جۇمىستارىن وبلىستىڭ جەتەكشى پەداگوگتەرى, قوعامدىق بىرلەستىكتەر, باق وكىلدەرىنەن تۇراتىن وبلىستىق بىرىڭعاي كوميسسيا تەكسەرەدى.
ەمتيحانداردان كەيىن 9-سىنىپ بىتىرگەن تۇلەكتەر مەكتەپتە وقۋىن جالعاستىرۋىنا بولادى, ول ءۇشىن 15 تامىزعا دەيىن 10-سىنىپقا وقۋعا ءتۇسۋ تۋرالى مەكتەپكە ءوتىنىش بەرۋى كەرەك نەمەسە اتتەستاتتىڭ ورتاشا بالى نەگىزىندە ەمتيحانسىز كوللەدجدەرگە تۇسۋىنە بولادى. ءبىلىم تۋرالى قۇجاتتاردى تابىستاۋ 20-22 ماۋسىم ارالىعىندا وزدەرى وقىعان مەكتەپتە وتەدى.
ن.جاشىبەكوۆ ۇلتتىق بىرىڭعاي تەستىلەۋ تەك جوعارى وقۋ ورىندارىنا ءتۇسۋ تەتىگى ەكەنىن اتاپ ءوتتى. 2021 جىلدان باستاپ ۇبت بارلىق قاتىسۋشى ءۇشىن تەستىلەۋدىڭ ادىلدىگىن جانە اشىقتىعىن قامتاماسىز ەتۋگە مۇمكىندىك بەرەتىن كومپيۋتەرلىك فورماتتا ءوتىپ كەلەدى. بيىل ۇبت-عا قاتىساتىندارعا ءبىر كومپيۋتەر بەرىلىپ, ولاردى ەكى كامەرا باقىلايدى. بىلتىر ءبىر كامەرا بولعان. بيىل تالاپكەردى باقىلاۋ ءۇشىن تاعى ءبىر كامەرا قوسىلدى. تەستىلەۋ جۇيەسىنە ءاربىر شىعۋ جانە كىرۋ كەزىندە وقۋعا تۇسۋشىلەر كومپيۋتەردە ورناتىلعان الدىڭعى كامەرالار ارقىلى ادام بەتىنىڭ كولەمدىك-كەڭىستىكتىك نىسانىن اۆتوريزاتسيالاۋدان وتەدى. بۇل بوگدە ادامداردىڭ قاتىسۋىن بولدىرماۋعا مۇمكىندىك بەرەدى. ەرەكشە ءبىلىم بەرۋ قاجەتتىلىكتەرى بار بالالارعا (كورۋ, ەستۋ, تىرەك-قيمىل اپپاراتى فۋنكتسيالارى بۇزىلعان) تەستىلەۋدە قوسىمشا 40 مينۋت بەرىلەدى. ال شىعارماشىلىق ەمتيحان تاپسىراتىن تالاپكەرلەردى تەستىلەۋ بىلتىرعىمەن سالىستىرعاندا, 5 مينۋتقا ۇزارتىلىپ, بارلىعى 70 مينۋتقا جەتكىزىلدى. ۇبت-عا قاتىسۋعا وبلىستا 2 396 تۇلەك نەمەسە تۇلەكتەردىڭ 71,6 پايىزى (2022 جىلى 73,4 پايىز) ءوتىنىش بەرگەن. تۇلەكتەر تەستىلەۋدى ەكى رەت تاپسىرا الادى جانە ەڭ جاقسى ناتيجە بويىنشا گرانتتار كونكۋرسىنا قاتىسادى. بىلتىر ۇبت بويىنشا سولتۇستىك قازاقستان وبلىسى ورتاشا ەسەپپەن 74,96 ۇپاي العان بولاتىن, ال رەسپۋبليكالىق ورتاشا كورسەتكىش 67,12 ۇپايدى قۇرادى.
بيىل ۇلتتىق بىرىڭعاي تەستىلەۋ فورماتى وزگەرگەن جوق, بۇرىنعىشا بەس ءپان. ونىڭ ۇشەۋى – مىندەتتى, ەكەۋى – بەيىندى. وقۋ ساۋاتتىلىعى جانە ماتەماتيكالىق ساۋاتتىلىق بويىنشا 15, «قازاقستان تاريحى» بويىنشا 20 جانە بەيىندىك پاندەر بويىنشا 35 تاپسىرما بەرىلەدى. بارلىق 120 تاپسىرمادان ۇبت قاتىسۋشىلارى ەڭ كوپ دەگەندە 140 ۇپاي جيناي الادى. تەستىلەۋگە جالپى 4 ساعات (240 مينۋت) بەرىلەدى. تەستىلەۋ كۇنىنە ەكى رەت وتكىزىلەدى. العاشقىسى 9.00-دەن 13.00-گە دەيىن, ەكىنشىسى 14.30-دان 18.30-عا دەيىن.
ۇبت ناتيجەسى تەستىلەۋ اياقتالعاننان كەيىن بىردەن قولجەتىمدى. وتكەن جىلدىڭ مامىر ايىنان باستاپ الىنعان ۇپايلاردان باسقا, تالاپكەرگە قاتەلىك جىبەرگەن تاقىرىپتارى كورسەتىلەدى. بۇل ءبىرىنشى ارەكەتتەن كەيىن ەكىنشى تەستىلەۋگە دايىندىق كەزىندە قيىن تاقىرىپتاردى شەشۋگە مۇمكىندىك بەرەدى. ەگەر تەست تاپسىرۋشى ۇبت ناتيجەلەرىمەن كەلىسپەسە, تەستىلەۋ اياقتالعاننان كەيىن بىردەن رەسپۋبليكالىق اپەللياتسيالىق كوميسسياعا ەلەكتروندى فورماتتا ءوتىنىش بەرۋگە مۇمكىندىگى بار.
پەتروپاۆل قالاسىنداعى بالالار مەن جاسوسپىرىمدەر شىعارماشىلىعى وبلىستىق ورتالىعى جانە ع.مۇسىرەپوۆ اۋدانىنىڭ نوۆويشيمكا اۋىلىندا ورنالاسقان ەكى تەستىلەۋ ورتالىعى ويداعىداي جۇمىس ىستەپ تۇر. ءار پۋنكتتە ۇبت-نى ۇيلەستىرۋ جانە وتكىزۋ جونىندەگى مەملەكەتتىك كوميسسيا قۇرىلعان. وسى كۇنگە دەيىن ۇبت قاۋىپسىزدىگىن قامتاماسىز ەتۋگە جانە وتكىزۋگە تارتىلعان مەملەكەتتىك ورگاندارعا ءتيىستى حاتتار جولدانىپتى. سونداي-اق تەستىلەۋ وتكىزىلەتىن ورىنداردا ۇبت-نىڭ بارلىق كەزەڭىنە – 19 مامىردان 5 شىلدەگە دەيىنگى كەزەڭىنە مەديتسينا قىزمەتكەرلەرىنىڭ, پسيحولوگتەردىڭ, قۇقىق قورعاۋ ورگاندارى وكىلدەرىنىڭ كەزەكشىلىگى ۇيىمداستىرىلعان. قوعامدىق ءتارتىپتى باقىلاۋ دا قامتاماسىز ەتىلگەن.
ءنازىر جاشىبەكوۆ وقۋشىلاردىڭ جازعى دەمالىسى مەن ساۋىعۋىن ۇيىمداستىرۋ ماسەلەسى تۋرالى دا ايتىپ ءوتتى. بيىل وقۋشىلار ءۇشىن 51 مىڭنان ارتىق بالانى قامتيتىن 265 مەكتەپ جانىندا جانە 339 بەيىندى الاڭ, 179 شاتىرلى جانە كيىز ءۇي لاگەرى جۇمىس ىستەيدى. تۇرعىلىقتى جەر بويىنشا 50 مىڭعا جۋىق بالانى قامتيتىن 83 قوسىمشا ءبىلىم بەرۋ ۇيىمى جانە 25 اۋلا كلۋبى دايىندالعان. وقۋشىلار سارايىنىڭ بازاسىندا جازعى اكادەميا (2 مىڭ بالا) جۇمىس ىستەيدى. ءداستۇر بويىنشا 6 مىڭنان استام بالا قالا سىرتىنداعى لاگەرلەردە دەمالادى, ونىڭ ىشىندە حالىقتىڭ الەۋمەتتىك وسال توپتارىنان 3 مىڭ بالاعا تەگىن جولداما بەرىلەدى. وسى ماقساتقا جەرگىلىكتى بيۋدجەتتەن 92,4 ملن تەڭگە بولىنگەن. جولدامانىڭ ورتاشا قۇنى – 35-65 مىڭ تەڭگە.
سولتۇستىك قازاقستان وبلىسى
