ءىس-شارانىڭ اشىلۋ سالتاناتىنا مەملەكەتتىك قىزمەت ىستەرى اگەنتتىگىنىڭ استانا قالاسى بويىنشا دەپارتامەنتىنىڭ باسشىسى, ادەپ جونىندەگى كەڭەس توراعاسى ءالي كومەكباەۆ, ەلورداداعى بۇقارالىق ءىس-شارالاردى وتكىزۋ ديرەكتسياسىنىڭ باسشىسى باقتيار ماسانوۆ, جارىستىڭ باس تورەشىسى داۋلەت حامزين جانە قالالىق سپورت باسقارماسىنىڭ بۇقارالىق سپورت ءبولىمىنىڭ باسشىسى ازامات اعزاموۆ قاتىستى.
«مەملەكەتتىك قىزمەتشىلەردىڭ كاسىبي مەرەكەسىنە وراي ۇيىمداستىرىلىپ جاتقان cپارتاكيادانى وتكىزۋ جىل سايىنعى داستۇرگە اينالعان. بيىل 13-مارتە وتكىزىلىپ جاتىر. بۇل — سپورت. سپورتتا بارلىعى جەڭە بەرمەيتىنى انىق. باستىسى, سالاۋاتتى ءومىر سالتىن ناسيحاتتاپ, مەملەكەتتىك قىزمەتشىلەردىڭ بىرلىگىن ارتتىرۋ. الداعى كۇندەرى ۇزدىكتەر انىقتالىپ, رەسپۋبليكالىق سپارتاكيادادا استانا قالاسىنىڭ نامىسىن قورعايتىن بولادى. سىزدەردىڭ جەڭىسكە جەتكەندەرىڭىز – ءبىز ءۇشىن ۇلكەن ماقتانىش», دەدى ءالي كومەكباەۆ.
ايتا كەتسەك, بيىلعى سپارتاكياداعا قۇرامىندا 300-گە جۋىق مەملەكەتتىك قىزمەتشىسى بار 23 كوماندا قاتىسىپ جاتىر. ولار شاعىن فۋتبول, ۆولەيبول, ۇستەل تەننيسى, توعىزقۇمالاق, ءجۇزۋ, بيليارد, قازاق كۇرەسى سياقتى سپورت تۇرلەرىنەن ءوزارا كۇش سىناسادى.
ۇيىمداستىرۋشىلاردىڭ ايتۋىنشا سپارتاكيادانىڭ بىردەن-ءبىر ماقساتى – سالاۋاتتى ءومىر سالتىن ناسيحاتتاۋ, مەملەكەتتىك قىزمەتشىلەردى سپورتپەن جۇيەلى تۇردە اينالىسۋعا تارتۋ, كوماندالىق رۋحتى, ماقساتقا ۇمتىلۋشىلىقتى, ەرىك-جىگەردى, تاباندىلىقتى جانە جەڭىسكە ۇمتىلىستى تاربيەلەۋ.
«بۇگىنگى تاڭدا مەملەكەتتىك قىزمەتشى – بۇل ءوز ءىسىنىڭ كاسىپقوي مامانى عانا ەمەس, ول ەڭ الدىمەن ءوز دەنساۋلىعىنا ءتيىستى نازار اۋدارۋدى قاجەت ەتەتىن ادام, ويتكەنى دەنى ساۋ مەملەكەتتىك قىزمەتشى – ءتيىمدى مەملەكەتتىك قىزمەتشى ەكەنى بەلگىلى. سپارتاكياداعا قاتىسۋشىلاردىڭ قاتارى جىلدان-جىلعا ارتىپ كەلە جاتقانى كوڭىل قۋانتادى. جارىس بولعان سوڭ جەڭىس تە, جەڭىلىس تە بولادى. باستى بۇل جەردە مەملەكەتتىك قىزمەتشىلەردىڭ اراسىنداعى بىرلىكتى ارتتىرۋ», دەيدى قالالىق سپورت باسقارماسى بۇقارالىق سپورت ءبولىمىنىڭ باسشىسى ازامات اعزاموۆ.
سپارتاكيادا قورىتىندىسى بويىنشا استانا قالاسىنىڭ ۇزدىكتەرى جاساقتالىپ, 20-25 ماۋسىم ارالىعىندا تالدىقورعان قالاسىندا وتەتىن رەسپۋبليكالىق سپارتاكياداعا قاتىسۋعا جولداما الادى.
