تۇركيانىڭ سايلاۋ كوميسسياسى سايلاۋدىڭ ەكىنشى تۋرىندا قازىرگى پرەزيدەنت رەجەپ تايپ ەردوعاننىڭ جەڭىسكە جەتكەنىن رەسمي تۇردە جاريالادى. جوعارعى سايلاۋ كوميسسياسىنىڭ مالىمەتىنشە, ەردوعانعا – 52,14, ال ونىڭ قارسىلاسى كەمال كىلىچداروگلۋعا 47,86 پايىز داۋىس بەرگەن. ەكى كانديدات اراسىندا 2 153 473 داۋىس الشاقتىعى بايقالادى. «Al Jazeera» ارناسىنىڭ حابارلاۋىنشا, داۋىس بەرۋگە حالىقتىڭ 85 پايىزدان استامى قاتىسقان.
ساياسي دودادان كەيىن ەردوعان ىستانبۇلدا جاقتاستارى الدىندا ءسوز سويلەدى. «پرەزيدەنت سايلاۋىنىڭ ەكىنشى كەزەڭى اياقتالدى. حالقىمىزعا بىزگە سىيلاعان دەموكراتيا مەرەكەسى ءۇشىن العىس ايتامىن. ءبىز الداعى بەس جىلدا ەلدى باسقارامىز», دەدى ول. سونداي-اق رەجەپ تايپ ەردوعان جينالعان حالىق الدىندا «Duyanlara duymayanlara» («ەستىگەندەر مەن ەستىمەيتىندەرگە») ءانىن شىرقاعان. رەجەپ تايپ ەردوعان مەن ايەلى ەمينە ەردوعان ىستانبۇلدىڭ ۋسكيۋدار اۋدانىنداعى «ساففەت چەبي» باستاۋىش مەكتەبىنىڭ سايلاۋ ۋچاسكەسىندە داۋىس بەرگەن بولاتىن. تۇركيانىڭ مەملەكەت باسشىسى №3279 بيۋللەتەنىنە ءوز تاڭداۋىن جاساپ, داۋىس بەردى.
«Albright Stonebridge Group» ۇيىمىنىڭ اعا كەڭەسشىسى حاكان اكباس ەردوعاننىڭ سايلاۋدا «جەكە تۇلعاعا تابىنۋشىلىقتىڭ ارقاسىندا جەڭىسكە جەتكەنىنە» سەنىمدى. «ونىڭ جەمىسى گۇلدەنگەن ناۋقانى بار, ول سايلاۋدا قاتارىنان بىرنەشە رەت جەڭىسكە جەتتى. مەنىڭ ويىمشا, بۇل ەردوعاننىڭ ەرەكشە تۇلعاسىنا كوپ قاتىسى بار, ول كەرەمەت سپيكەر جانە ونىڭ حالىققا بەرگەن ۋادەسى قاراپايىم, اقىلعا قونىمدى, سايلاۋ وكرۋگىنە سەنىم ۇيالاتادى. ول – تاجىريبەلى, شەبەر ساياساتكەر», دەدى حاكان اكباس «Al Jazeera» ارناسىنا بەرگەن سۇحباتىندا.
ساراپشىنىڭ ايتۋىنشا, ول – ساياسي دانىشپان. سونداي-اق ونىڭ پىكىرىنشە, ەردوعان جەڭىسىنەن كەيىن «مەيلىنشە ينكليۋزيۆتى» بولۋى كەرەك, ويتكەنى داۋىستاردىڭ كوپشىلىگى سايىپ كەلگەندە بيلەۋشى پارتيا قالاعانداي كوپ بولمادى.
«بۇل وتە پولياريزاتسيالانعان ەل, شامامەن 50/50. جەڭىس مەجەسى 52-48-گە نەعۇرلىم جاقىن بولسا, سوعۇرلىم ەردوعان ينكليۋزيۆتى بولۋى قاجەت. بۇل ونىڭ پارلامەنتتەگى وپپوزيتسيامەن وداق قۇرۋى كەرەك دەگەندى بىلدىرەدى. داۋىس بەرۋ ناتيجەلەرى بيلىككە «قاتاڭ ەسكەرتۋ», دەدى حاكان اقباس.
سونىمەن قاتار «Hürriyet» گازەتى رەدجەپ تايپ ەردوعاننىڭ قازىرگى جەڭىسىن بۇرىنعى سايلاۋداعى جەڭىستەرىمەن سالىستىرعاندا «ماڭىزدىراق جانە قيىنىراق» دەپ جازدى. «ەكونوميكانىڭ جاعدايى, جەر سىلكىنىسى, پاندەميا. ەردوعان تاعى دا جەڭىسكە جەتتى. مۇنداي قيىن كەزدە جەڭىسكە جەتۋ – ۇلكەن جەتىستىك. بۇل جەڭىس بۇرىنعى جەڭىستەردەن ماڭىزدىراق», دەپ جازادى «Hürriyet» ءباسپاسوزى.
ال تۇركيا وپپوزيتسياسىنىڭ ورتاق كانديداتى كەمال كىلىچداروگلۋ انكارادا ءسوز سويلەدى. ول «بۇل سايلاۋ تۇركيا تاريحىنداعى ەڭ ادىلەتسىز سايلاۋ بولدى» دەپ مالىمدەپ, جاقتاستارىنا دەموكراتيا جولىندا كۇرەسە بەرەتىنىن ايتتى.
«Reuters» اقپارات اگەنتتىگىنىڭ مالىمەتىنشە, 14 مامىردا وتكەن ءبىرىنشى تۋردا كىلىچداروگلۋعا انكارا مەن ىستانبۇل قالالارىنىڭ حالقى كوبىرەك داۋىس بەرگەن. وندا سايلاۋشىلاردىڭ 85 پايىزدان استامى داۋىس بەرۋگە كەلگەن. شەتەلدەردەگى سايلاۋشىلاردىڭ جارتىسىنان كوبى, كىلىچداروگلۋدى تاڭداعان. تۇركيا وپپوزيتسياسىنىڭ ورتاق كانديداتى كەمال كىلىچداروگلۋ – 2002 جىلدان بەرى تۇركيا پارلامەنتىنىڭ دەپۋتاتى. 2010 جىلدان باستاپ رەسپۋبليكالىق حالىق پارتياسىن باسقارادى.
«Hürriyet» گازەتىنىڭ جازۋىنشا, تۇركيا وپپوزيتسياسى پرەزيدەنتتىك سايلاۋدىڭ ەكىنشى تۋرىندا ءوز كانديداتى جەڭىلگەننەن كەيىن پارتيا باسشىلىعىن, سونداي-اق كوزقاراستارىن وزگەرتۋى كەرەك. باسىلىم شولۋشىسىنىڭ ايتۋىنشا, وپپوزيتسيانىڭ تىعىرىقتان شىعاراتىن ەكى جول بار. «بىرىنشىدەن, ولار پارتيا باسشىلىعىن وزگەرتۋى كەرەك, سودان كەيىن «سوقىر ويدان» ارىلۋى كەرەك», دەلىنگەن ماقالادا.
ەسكە سالساق, 14 مامىردا وتكەن سايلاۋدىڭ ءبىرىنشى تۋرىندا كانديداتتاردىڭ ەشبىرى 50 پايىز داۋىس جيناي الماعان ەدى. ول كەزدە ەردوعان – 49,5, كىلىچداروگلۋ 45 پايىزعا جۋىق سايلاۋشىلاردىڭ قولداۋىنا يە بولدى. ال كۇنى كەشە جەڭىسكە جەتكەن رەجەپ تايپ ەردوعاندى مەملەكەت باسشىسى قاسىم-جومارت توقاەۆ جارقىن جەڭىسىمەن قۇتتىقتاپ, ەكى ەل اراسىنداعى ىنتىماقتاستىقتىڭ ودان ءارى دامي بەرەتىنىن جەتكىزدى.
