باعدارلاماعا قاتىسۋعا جەتىسۋ تۇرعىندارىنان 550-گە جۋىق ءوتىنىش تۇسكەن, ولاردىڭ 90%-عا جۋىعى مال وسىرۋمەن, ءسۇت وندىرىسىمەن اينالىسپاق. مال شارۋاشىلىعى بويىنشا جوبالارىن ۇسىنعان تۇرعىندار كووپەراتسيا قۇرۋدى جوسپارلاپ وتىر.
«قاۋىمداستىق 27 ملن تەڭگە كولەمىندە نەسيە الۋعا كومەكتەسەدى, ال اۋىل شارۋاشىلىعى تەحنيكاسى ساتىپ الىنعان جاعدايدا, ونىڭ 50%-ىن مەملەكەت سۋبسيديالايدى. كووپەراتسيا ارقىلى جەم-ءشوپتى بىرلەسە ساتىپ الۋعا, دايىن ءونىمدى ساتۋعا, ەسەپشوت جۇرگىزۋگە بولادى», دەدى التاي كولگىنوۆ.
كەربۇلاق اۋدانى – تۋريستەرگە, اسىرەسە شەتەلدىك تۋريستەر ءۇشىن تارتىمدى ءوڭىر. سول سەبەپتى بەلسەندى اۋىل تۇرعىندارى تۋريستىك جوبالاردى دا ۇسىنىپ وتىر.
ءوڭىردىڭ قانت قىزىلشاسىن وسىرۋگە الەۋەتى جەتەرلىك. ەلىمىزدىڭ بىرنەشە ايماعىندا قانت قىزىلشاسى وسىرىلگەنىمەن, ءار ماۋسىم سايىن قانت تاپشىلىعى سەزىلەدى. مۇنىڭ الدىن الۋ ءۇشىن جەكەمەنشىكتەگى ءىرى شارۋا قوجالىقتارىمەن بىرلەسىپ, وسى باعىتتى دامىتۋعا زور مۇمكىندىك بار.
«اۋىل اماناتى» باعدارلاماسى اياسىندا ءسۇت تاۋارلى فەرمالار سىندى نەگىزگى جوبالارعا قولداۋ كورسەتىلەدى. بۇل, ءوز كەزەگىندە, تۇتىنۋشىلاردى ەلىمىزدە وندىرىلگەن سۇتپەن قامتاماسىز ەتەدى.
«مەملەكەت باسشىسى بەكىتكەن «اۋىل اماناتى» باعدارلاماسىنىڭ ماقساتى – اۋىل تۇرعىندارىن جۇمىسپەن قامتۋ. بۇگىندە رەسپۋبليكا بويىنشا اۋىل-ايماقتا 18 مىڭنان استام جەكە قوسالقى شارۋاشىلىق قۇرۋ ءۇشىن 100 ملرد تەڭگە ءبولىندى. بۇل بىرەگەي باعدارلاما ارقىلى اۋىل تۇرعىندارىنا 2,5%-بەن 8 ملن تەڭگەدەن استام نەسيە بەرىلەدى. ءوڭىردىڭ اۋىل شارۋاشىلىعى سالاسى بويىنشا زور الەۋەتىن ەسكەرە, ونى ءارى قاراي دامىتۋ وتە ماڭىزدى», دەپ اتاپ ءوتتى پرەمەر-ءمينيستردىڭ ورىنباسارى.
