32 جاستاعى كەلۆيننىڭ اتا-اناسى ەرتەرەكتە مەكسيكادان اقش-قا قونىس اۋدارعان. ءوزى كاليفورنيا شتاتىنىڭ سان-حوسە قالاسىندا دۇنيەگە كەلگەنىمەن, بالالىق پەن جاستىق شاعى يۋما شاھارىندا ءوتتى. العاشىندا گاستەلۋم ەركىن كۇرەسپەن اينالىسسا, ەسەيە كەلە ارالاس جەكپە-جەكپەن شۇعىلداندى. 2013 جىلى «The Ultimate Fighter» دەپ اتالاتىن رەاليتي-شوۋدا كوزگە تۇسكەننەن كەيىن دارىندى جىگىت اتاقتى چەيل سوننەننىڭ كومانداسىنا قابىلداندى. ءتۇرلى تۋرنيرلەردە قاتارىنان التى رەت جەڭىسكە جەتكەننەن كەيىن UFC-مەن كەلسىمشارتقا وتىرىپ, «تەمىر» دەگەن جاناما ەسىمگە يە بولدى. سپورتتىڭ بۇل تۇرىندە اقش فايتەرى بارلىعى 26 كەزدەسۋ وتكىزىپ, 17 مارتە جەڭىسكە جەتتى. 10 قارسىلاسىن ەسىنەن تاندىردى. سەگىز رەت ۇتىلىپ, تاعى ءبىر باسەكەنىڭ ناتيجەسى ەسەپكە الىنعان جوق. سول جەكپە-جەكتەردە ونى تەك كريس ۆايدمان (2017 جىلى) مەن دجەك حەرمانسسون (2020) عانا مەرزىمىنەن بۇرىن جەڭدى. قالعان ايقاستاردا شەشىمدى تورەشىلەر شىعاردى.
كەزىندە كەلۆين گاستەلۋ نەيت ماركۆارد, دجونني حەندريكس, تيم كەننەدي, مايكل بيسپينگ, رونالدۋ سوۋزا, كريس كەرتيس سىندى ساڭلاقتاردى وڭدىرماي سابادى. 2017 جىلى برازيليانىڭ فورتالەزا قالاسىندا وتكەن تۋرنيردە ول ايگىلى ۆيتور بەلفورتتى ءبىرىنشى راۋندتا ۇرىپ جىقتى. كەيىننەن «تەمىردىڭ» ماريحۋانا شەككەنى انىقتالىپ, بۇل باسەكەنىڭ ناتيجەسى ەسەپكە الىنبادى. 2019 جىلدىڭ ءساۋىر ايىندا كەلۆين ورتا سالماقتاعى «ۋاقىتشا» چەمپيوندىق اتاعى ءۇشىن ايقاستى. بىراق بۇل تارتىستا يسراەل ادەسانيانىڭ اسىعى الشىسىنان ءتۇستى.
ال شاۆقات راحمونوۆتىڭ ءجۇرىپ وتكەن جولى جانكۇيەرلەردىڭ كوز الدىندا. 28 جاستاعى قانداسىمىز 17 رەت وكتاگونعا شىعىپ, بارلىق باسەكەدە ايقىن باسىمدىق تانىتتى. سەگىز قارسىلاسىن ۇرىپ جىقسا, توعىزى «قىلقىندىرۋ» نەمەسە «اۋىرتۋ» تاسىلىنەن كەيىن جەر توقپاقتاۋعا ءماجبۇر بولدى. كەيىنگى جەكپە-جەگىن «نوماد» بيىلعى جىلدىڭ 4 ناۋرىزىندا لاس-ۆەگاستا جەرگىلىكتى فايتەر دجەفف نيلگە قارسى وتكىزىپ, ونى ءۇشىنشى راۋندتا «قىلقىندىرىپ تاستادى».
