جوباعا سايكەس, «اتا جولى» كارتاسى كەلەسى ەكى شارتپەن بەرىلەدى:
- قازاق ۇلتىنا جاتاتىنىن راستايتىن قۇجاتتىڭ بولۋى;
- قازاقستان رەسپۋبليكاسى ازاماتتىعىنىڭ بولماۋى.
بۇل شارتتارعا ساي كەلەتىن ەتنيكالىق قازاقتار, سونداي-اق كەلەسى تالاپتاردىڭ دا ۇدەسىنەن شىعۋى ءتيىس:
قر پرەزيدەنتىنىڭ 2005 جىلعى 6 ماۋسىمداعى جارلىعىنا سايكەس قر ازاماتتىعىنا قابىلداۋدىڭ وڭايلاتىلعان ءتارتىبى بەلگىلەنەتىن ماماندىققا يە بولۋ;
قر ەڭبەك جانە حالىقتى الەۋمەتتىك قورعاۋ ءمينيسترىنىڭ 2023 جىلعى 20 اقپانداعى بۇيرىعىنا سايكەس سۇرانىسقا يە كاسىپتەرگە يە بولۋ;
تۇراقتى تۇراتىن جانە ازاماتتىعى بار ەلدە تىركەلگەن جۇمىس ىستەپ تۇرعان بيزنەستىڭ بولۋى.
«اتا جولى» كارتاسىن الۋ ءۇشىن ءوتىنىشتى «قۇتتى مەكەن» اج جانىنداعى موبيلدىك قوسىمشا ارقىلى نە قازاقستاننىڭ شەت ەلدەردەگى مەكەمەسى ارقىلى بەرۋگە بولادى. جوبادا «اتا جولى» كارتاسى 10 جىل مەرزىمگە بەرىلەتىنى ايقىندالعان. بىراق ونىڭ جارامدىلىق مەرزىمى ەل پاسپورتىنىڭ قولدانىلۋ مەرزىمىنەن اسپايدى.
سونداي-اق «اتا جولى» كارتاسى يەسىنىڭ 16 جاسقا دەيىنگى كامەلەتكە تولماعان بالالارى دا كارتا يەسىنىڭ قۇقىقتارىن پايدالانا الادى.
ەسكە سالايىق, 2023 جىلى قازاقستاندا «اتا جولى» كارتاسىن 5 مىڭ ادام يەلەنەدى. ال 2027 جىلدىڭ سوڭىنا دەيىن ولاردىڭ سانىن 40 مىڭعا جەتكىزۋ كوزدەلگەن.
قاعيدالار جوباسىن جاريا تالقىلاۋ مەرزىمى – 6 ماۋسىمعا دەيىن.
