يپپوننىڭ اۋىلى الىستاپ بارادى

جىگەرسىز جىگىتتەر, ناشار ناتيجەلەر

اڭگىمەمىزدى ەرلەردەن باستايىق. وسى­عان دەيىنگى حالىقارالىق دزيۋدو فەدە­راتسياسىنىڭ (IJF) رەيتينگىنە زەر سال­ساق, توپ-10 بالۋاننىڭ قاتارىنان ەلىمىزدىڭ كەمىندە ءبىر-ەكى بالۋانىن كەزىك­تىرەتىنبىز. الەم چەمپيوناتىنداعى ساتسىزدىكتەن كەيىن جاعدايىمىز كۇرت ناشارلادى. قازىرگى كەزدە جەرلەستەرىمىزدىڭ اراسىندا ەڭ ۇزدىك ناتيجە دانيار شام­شاەۆقا تيەسىلى. 73 كيلو سالماق دارە­جە­سىندە كۇش سىناسىپ جۇرگەن 21 جاستاعى قازاق دزيۋدوشىسى رەيتينگتە 14-ورىندى يەلەندى. جالپى, بىلىكتى باپكەرلەردەن باستاپ, قاتارداعى قاراپايىم جان­كۇيەر­لەرگە دەيىن بۇل جىگىتتىڭ بولاشاعىنا زور ۇمىتپەن قاراپ وتىر.

بىلتىر استانادا وتكەن ازيا چەمپيوناتىندا دانيار ءتورت كەزدەسۋدىڭ بارلىعىندا جەڭىسكە جەتىپ, باس جۇلدەنى ولجالاعانى ەسىمىزدە. سول جارىستا ول ۇندىس­تاندىق سۋرەش سينگحتى 42, تاجىك­ستاندىق بەحرۋز حودجازودانى 42, قىر­عىزستاندىق شىڭعىسحان ساعىناليەۆتى 31, وزبەكستاندىق مۋرودجون يۋل­دو­شەۆتى 34 سەكۋندتە تازا ۇتىپ, سان مىڭ كو­رەرمەننىڭ ىستىق ىقىلاسىنا بو­لەنگەن ەدى. سوندا شامشاەۆقا ازيا چەمپيونى اتانۋ ءۇشىن بار-جوعى 149 سەكۋند جەتكىلىكتى بولدى!

بيىل قانداسىمىز پاريجدەگى گراند سلەم تۋرنيرىندە قولا السا, تبيليسيدە كۇمىسپەن كۇپتەلدى. وكىنىشكە قاراي, دانيار دوحاداعى الەمدىك دودادا دارالانا المادى. ول ەكىنشى كەزەڭدە الەم چەم­پيوناتىنىڭ كۇمىس جۇلدەگەرى, ەۋ­روپا چەمپيونى, يتا­ليا­لىق مانۋەل لوم­باردوعا جول بەردى. شام­شاەۆپەن ءبىر سالماقتا ونەر كورسەتەتىن تاجىريبەلى جان­ساي سماعۇلوۆ 21-ورىنعا جايعاستى. ول دا پارسى شىعاناعىندا ساتسىزدىككە ۇشىرادى.

60 كيلو سالماق دارەجەسىندە بەس بىردەي بالۋانىمىز توپ-50-لىكتىڭ ساناتىندا. سولاردىڭ اراسىنان ماعجان ءشامشاديننىڭ كوشى ىلگەرى. سىر بويىنىڭ ساڭلاعى 16-ورىندا تۇر. اتاعى الىسقا جايىلعان ەلدوس سمەتوۆ 21-ساتىعا جاي­عاستى. سوڭعى كەزدەرى ورەلى ونەرىمەن كوزگە ءتۇسىپ جۇرگەن نۇرقانات سەرىكباەۆ 26-ورىندى ەنشىلەدى. ال باۋىرجان نار­باەۆ 35-ءشى, ال شەرزود داۆلاتوۆ 47-ساتىعا تابان تىرەدى.

وزگە سالماق دارەجەلەرىندە جەرلەس­تەرىمىز مىناداي ساتىلارعا جايعاستى: ابى­لايحان جۇبانازار (81 كيلو) – 20, نۇر­لىحان شارحان (100 كيلو) – 21, عۇسمان قىر­عىزباەۆ (66 كيلو) – 22, ديدار حامزا (90 كيلو) – 24, عالىمجان قىرىقباي (+100 كيلو) – 39, ءادىل ورازباەۆ (+100 كيلو) – 41 جانە ەسەت قۋانوۆ (66 كيلو) – 50-ورىن.

قازىرگى كەزدە گرۋزيا دزيۋدوشىلا­رى­نىڭ ءداۋىرى ءجۇرىپ تۇر. ەرلەر اراسىندا جەتى سالماق دارەجەسى بولسا, سونىڭ تور­تەۋىندە قاپ تاۋىنىڭ قىراندارى الەم­دىك رەيتينگتە كوش باستاپ كەلەدى. ولار – لاشا شاۆداتۋاشۆيلي (70 كيلو), تاتو گريگالاشۆيلي (81 كيلو), لۋ­كا مايسۋرادزە (90 كيلو) جانە يليا سۋلامانيدزە (100 كيلو). ءبىر كەرەمەتى, 90 كيلو سالماقتا ءۇش گرۋزين جىگىتى ۇز­­دىك بەستىكتىڭ ساناتىنا ەركىن ەنىپ وتىر. ءدال وسىنداي تابىسىمەن جەر-جا­ھان­داعى بىردە-ءبىر مەمەلەكەت ماقتانا المايدى. قالعان سالماق دارەجەلەرىندە يسپانيالىق فرانسيسكو گارريگوس (60 كيلو), مولدوۆالىق دەنيس ۆيەرۋ (66 كيلو) جانە تاجىكستاندىق تەمۋر راحيموۆتىڭ (+100 كيلو) الدىن ورايتىن ەشكىم تابىلار ەمەس.

توپ-10 دزيۋدوشىلاردىڭ ساناتىنا گرۋزيا مەن جاپونيانىڭ – 9, ازەر­­بايجاننىڭ – 7, موڭعوليا مەن وزبەك­ستاننىڭ – 5, كانادانىڭ – 4, وڭ­تۇستىك كو­رەيا, فرانتسيا, برازيليا, نيدەرلاندتىڭ – 3, بەلگيا, يزرايل, يتاليا, كۋبانىڭ – 2, يس­پانيا, تايپەي, مولدوۆا, ۋكراينا, شۆەي­تساريا, اۋستريا, تۇركيا, ماجارستان, پور­تۋگاليا, رەسەي جانە تاجىكستاننىڭ  1 وكىلى ەندى. سول سەركەلەردىڭ قاتارىنان ەلىمىزدىڭ بىردە-ءبىر ورەنىن كورە الماعا­نىمىز وكىنىشتى. بۇل جاعداي ما­دەنيەت جانە سپورت مينيسترلىگى مەن رەس­پۋب­ليكالىق دزيۋدو فەدەراتسياسىنىڭ باسشىلارىنا وي سالۋعا ءتيىس. ويتكەنى الدا پاريج وليمپياداسى مەنمۇندالاپ تۇر. ەگەر جاعدايدى تۇزەۋ ءۇشىن دەرەۋ ارادا شۇعىل شەشىم قابىلدانباسا, ءدال وسى قارقىنمەن تورتجىلدىقتىڭ باستى دوداسىنان قۇرالاقان قايتاتىنىمىز انىق.

ەرلەر اراسىنداعى

توپ-5 دزيۋدوشى

60 كيلو: 1. فرانسيسكو گارريگوس (يس­پانيا), 2. يان يۋنۆەي (تايپەي), 3. لي حا ريم (وڭتۇستىك كورەيا), 4. بالاباي اگاەۆ (ازەر­بايجان), 5. گەورگي ساردالاشۆيلي (گرۋزيا).

66 كيلو: 1. دەنيس ۆيەرۋ (مولدوۆا), 2. حيفۋمي ابە (جاپونيا), 3. يوندون­پە­رەنلەين باسحۋ (موڭعوليا), 4. دزيوسيرو مارۋياما (جاپونيا), 5. ۆاجا مار­گۆەلاشۆيلي (گرۋزيا).

73 كيلو: 1. لاشا شاۆدا­تۋا­شۆيلي (گرۋزيا), 2. حيدايات گەي­دا­روۆ (ازەر­بايجان), 3. تسەند-وچيرىن تسوگتبااتار (موڭ­عوليا), 4. نيلس شتۋمپ (شۆەي­تساريا), 5. دانيەل كار­نين (برازيليا).

81 كيلو: 1. تاتو گري­گا­لاشۆيلي (گرۋ­زيا), 2. مات­تياس كاس­سە (بەلگيا), 3. سايد مول­­­لاەي (ازەربايجان), 4. تا­كا­نو­ري نا­­گاسە (جاپونيا), 5. لي جون حۆان (وڭ­تۇستىك كورەيا).

90 كيلو: 1. لۋكا مايسۋرادزە (گرۋ­زيا), 2. سانشيرو مۋراو (جا­پونيا), 3. داۆ­­لات بابونوۆ (وزبەكستان), 4. بەكا گۆي­نيا­شۆيلي (گرۋزيا), 5. لاشا بەكاۋري (گرۋ­زيا).

100 كيلو: 1. يليا سۋلامانيدزە (گرۋ­زيا), 2. زەليم كوتسوەۆ (ازەربايجان), 3. مايكل كوررەل (نيدەرلاند), 4. كايل رەيەس (كانادا), 5. شادي ەلناحاس (كا­نادا).

+100 كيلو: 1. تەمۋر راحيموۆ (تا­جىكستان), 2. الىشەر يۋسۋپوۆ (وزبەكستان), 3. تاتسۋري سايتو (جاپونيا), 4. ودحۋگين تسە­تسەنسەنگەل (موڭعوليا), 5. تەددي رينەر (فرانتسيا).

جالعىز ءۇمىتىمىز – ءابيبا

ايەلدەر اراسىنداعى جارىستاردا ءابيبا ابۋجاقىنوۆا عانا ايشىقتى ونە­رىمەن كوزگە ءتۇسىپ ءجۇر. 25 جاستاعى سپورتشى بىلتىر قازاق قىزدارى اراسىنان العاشقى بولىپ الەم چەمپيوناتىندا جەڭىس تۇعىرىنا كوتەرىلدى. تاشكەنتتە وتكەن جارىستا ءابيبا نەبىر اتاقتى بالۋانداردان باسىم ءتۇسىپ, قولا مەدالدى موينىنا ىلگەندە, بارشا الاش جۇرتى بورىكتەرىن اسپانعا اتىپ قۋانعان ەدى. جەرلەسىمىز بۇل ناتيجەمەن شەكتەلىپ قالعان جوق. كەيىنگى ەكى جىل ارالىعىندا ول ۇلانباتىر, ءابۋ-دابي, پاريج جانە تبيليسيدە ۇيىمداستىرىلعان گراد-سلەم تۋرنيرلەرىندە جۇلدەگەرلەر ساناتىنا قوسىلدى. بىلتىر استاناداعى ازيا چەمپيوناتىندا اقتىق سىنعا دەيىن القىنباي جەتىپ, شەشۋشى تۇستا عانا ۇتىلسا, بيىل پور­تۋگاليانىڭ ال­مادا قالاسىندا شى­مىلدىعى تۇرىلگەن گران-پري سايىسىندا التىننان القا تاقتى. پيرەنەي تۇبەگىندە جالاۋى جەلبىرگەن جارىستىڭ فينالىندا ول ءوزىنىڭ كوماندالىق ارىپتەسى عاليا تىنباەۆادان باسىم ءتۇستى.

بيىل دوحادا دا ابۋجاقىنوۆانىڭ جەڭىس تۇعىرىنا كوتەرىلۋىنە جاقسى مۇمكىندىگى بولدى. باستاپقى باسەكەلەردە يزرايلدىك تامار مالكا, موڭعوليالىق بااسانحۋ باۆۋدورج, سەربيالىق ميليتسا نيكوليچتەن ايلاسىن اسىرعان ول جارتىلاي فينالدا ەۋروپانىڭ ەكى دۇركىن چەمپيونى, الەمدىك رەيتينگتە كوش باستاپ تۇرعان فرانتسيالىق شيرين بۋكليگە ەسە جىبەردى. ال قولا مەدال ءۇشىن تارتىستا يتاليالىق اسسۋنتا سكۋتتوعا ءابيبانىڭ ءالى جەتپەدى. دەسەك تە قازىرگى كەزدە ەلى­مىز­دىڭ تاتامي شەبەرلەرى اراسىنداعى ەڭ ۇز­دىك كورسەتكىش ءداپ وسى ءابيبا ابۋ­جاقىنوۆاعا تيەسىلى.

اسا اۋىر سالماقتا كۇش سىناساتىن كاميلا بەرلىقاشتىڭ دا ونەرىن «قا­ناعاتتاندىرارلىق» دەپ باعالاۋعا بولادى. ول قىرىپ-جويماسا دا, ءتۇرلى تۋر­نيرلەردە ءتاۋىر ناتيجەگە قول جەتكىزىپ كەلەدى. 23 جاستاعى قازاق بالۋانى بىلتىر ۇلانباتىردا جانە بيىل باكۋدە ۇزدىك ۇشتىكتى تۇيىندەدى. تبيليسي, المادا, تاشكەنتتە بەسىنشى ورىنعا تابان تىرەدى. ەگەر وزگە بۇ­رىمدىلاردىڭ العاشقى اينا­لىمداردان اسا الماي جۇر­گەنىن ەسكەرسەك, بۇنى دا ءتاۋىر كورسەتكىش دەپ با­­عا­لاعان ءجون. وكىنشكە قا­راي, وزگە قىزداردان ون­داي قارقىن باي­قال­مايدى.

توپ-50-لىكتىڭ قا­تا­­رىنا ەنگەن وزگە جەر­­لەس­تە­­رىمىزدىڭ نا­­تي­­­جەلەرى مى­­ناداي: ارۋنا جان­كەل­دينا (70 كيلو) – 31, ناز­گۇل ماراتوۆا (+78 كيلو) – 34-ورىن عا­ليا تىنباەۆا (48 كيلو) – 35, سە­ۆارا نى­شانباەۆا (57 كيلو) – 39 جانە تول­عاناي ابەۋوۆا (52 كيلو) – 49-ورىن. ال 63 پەن 70 كيلو سال­ماق دارەجەسىندە ونەر كورسەتىپ جۇر­گەن وتان­دىق تاتامي شە­بەر­­لەرىنىڭ بىردە-بىرەۋى بۇل مەجەگە جەتە الار ەمەس.

الەمدىك رەيتينگتە جاپونيانىڭ ەكى دزيۋدوشىسى كوش باستاپ تۇر. قالعان مەم­­لەكەتتەردىڭ ءبىر-ءبىر بالۋانى عانا ال­دىڭعى لەكتە. ولار – جاپونيالىق ناتسۋمي تسۋنودا (48 كيلو) مەن ساكي نيزوە (70 كيلو), كوسوۆولىق ديستريا كراسنيچي (52 كيلو), كانادالىق كريستا دەگۋچي (57 كيلو), ۇلىبريتانيالىق ليۋسي رەنشالل (63 كيلو), يتاليالىق ەليس بەللاندي (78 كيلو) جانە يزرايلدىك راز گەرشكو (+78 كيلو).

توپ-10 دزيۋدوشىنىڭ تىزىمىنە فران­­تسيانىڭ 12 وكىلى ەنىپ وتىر. بۇل – قىز­دار ارا­سىنداعى ەڭ جاقسى ناتيجە. ودان كەيىنگى ورىنداردا مىنا كومان­دالار: جا­پونيا – 9, يزرايل مەن گەر­مانيا – 5, برازيليا – 4, يتاليا مەن كانادا – 3, موڭ­عوليا, يسپانيا, كو­سوۆو, ۇلى­بري­تانيا, وڭتۇستىك كورەيا, حور­ۆاتيا, ني­دەرلاند, قىتاي – 2, سەربيا, قازاقستان, پور­تۋگاليا, وزبەكستان, ما­جارستان, گرۋ­زيا, پولشا, اۋستراليا, سلو­ۆەنيا, ۆە­نەسۋەلا, اۋستريا, گرەكيا جانە تۇركيا – 1.

ايەلدەر اراسىنداعى

توپ-5 دزيۋدوشى

48 كيلو: 1. ناتسۋمي تسۋنودا (جاپونيا), 2. شيرين بۋكلي (فرانتسيا), 3. بلاندين پون (فرانتسيا), 4. اسسۋنتو سكۋتتو (يتا­ليا), 5. ۆاكانا كوگا (جاپونيا).

52 كيلو: 1. ديستريا كراسنيچي (كو­سوۆو), 2. چەلسي دجايلس ( ۇلىبريتانيا), 3. ديو­را كەلديوروۆا (وزبەكستان), 4. ۋتا ابە (جا­پو­نيا), 5. رەكا پۋپ (ماجارستان).

57 كيلو: 1. كريستا دەگۋچي (كانادا), 2. حارۋكا فۋناكۋبو (جاپونيا), 3. دجەس­سيكا كليمكايت (كانادا), 4. رافاەلا سيل­ۆا (برازيليا), 5. حۋ ميمي (وڭتۇستىك كورەيا).

63 كيلو: 1. ليۋسي رەنشالل ( ۇلى­بري­­­تانيا), 2. كاتەرين بوشەمەن-پينار (كانادا), 3. مەگۋمي حوريكاۆا (جاپونيا), 4. كلاريسس اگبەنەنۋ (فرانتسيا), 5. ان­گەليكا شيمانسكايا (پولشا).

70 كيلو: 1. ساكي نيزوە (جاپونيا), 2. باربارا ماتيچ (حورۆاتيا), 3. ميحاەلا پول­لەرەس (اۋستريا), 4. ساننە ۆان دەيك (ني­دەرلاند), 5. لارا تسۆەتكو (حورۆاتيا).

78 كيلو: 1. ەليس بەللاندي (يتاليا), 2. ودري چيومەو (فرانتسيا), 3. ينبار لانير (يزرايل), 4. مايرا اگيار (برازيليا), 5. اننا-ماريا ۆاگنەر (گەرمانيا),

+78 كيلو: 1. راز گەرشكو (يزرايل), 2. رو­مانا ديككو (فرانتسيا), 3. دجۋليا تو­­لوفۋا (فرانتسيا), 4. اكيرا سونە (جا­پونيا), 5. كيم حايۋن (وڭتۇستىك كورەيا).