مۋزەي قورىنا تۇسكەن سوڭعى جادىگەرلەردى ءبىلىم بەرۋ ءىسىنىڭ قۇرمەتتى قىزمەتكەرى, قازاق ۇلتتىق جاراتىلىستانۋ عىلىمدارى اكادەمياسىنىڭ كوررەسپوندەنت-مۇشەسى اباي ورىنباەۆ, بەلگىلى قولونەر شەبەرى ەرقوساي ءابىلوۆ, اۋعان سوعىسى ارداگەرلەرىنىڭ توراعاسى اسلان بالقاسىنوۆ, جەكە كاسىپكەر ارتەم ۆاسيلەنكو, اقسەرىك تورەمۇراتوۆا, اقالما ءىزباسوۆا, سىرىم بايدراحمانوۆ تاپسىردى.
جىل ىشىندە مۇراجايعا 1 216 ەكسپونات تۇسكەن. ولاردىڭ قاتارىندا مۋزەي ارداگەرى رىسجان ءىلياسوۆانىڭ جەكە زاتتارى, ابىلقايىر حاننىڭ جارى بوپاي حانىم كراتيناسى, سوعىس ارداگەرلەرىنىڭ وردەن-مەدالدارى, كاراتە-دودان حالىقارالىق دارەجەدەگى سپورت شەبەرى رينات ساعىندىقوۆتىڭ سپورتتىق قۇرالدارى بار. قۇندى ەكسپوناتتار قاتارىندا ەكى ءجۇز جىلعا جۋىق تاريحى بار قۇمان مەن ءبىر عاسىر بۇرىن قولدانىلعان ءتۇبىت تارايتىن ايا بار. مۇعالجار اۋىلىنىڭ تۇرعىنى سەرىكباي ەسەتوۆ توسبۇلاق دەگەن جەردە جازدا ءشوپ شاۋىپ ءجۇرىپ قۇمان تاۋىپ العان. قۇماننىڭ استىندا 1833 دەگەن جازۋ بار ەكەن. سالماعى 2 كيلودان اساتىن جەز قۇمان قۇم ىشىندە جاقسى ساقتالعان.
ەرتەدەگى شەبەرلەردىڭ قولدارىنان شىققان زاتتارعا قاراپ, قازاقتىڭ ۇلتتىق تۇرمىستىق بۇيىمدارىن سول ۇلگىدە جاڭارتا ءبىلۋ وتە ماڭىزدى, دەيدى قولونەر شەبەرى بۇلبۇل كاپقىزى. ويتكەنى قازىرگى شەبەرلەر كوپ جاعدايدا قازاقتى ورنەكتەردى قولدانۋ رەتىن بىلە بەرمەيدى ەكەن. ونىڭ ايتۋىنشا, ەرتەدە قىز-كەلىنشەكتەردىڭ كامزولدارى مەن بەشپەنتتەرىنىڭ وڭىرىنە گۇلدەردىڭ ورنەگىن كوپ سالعان. «سونىڭ ىشىندە قىزعالداقتىڭ سۋرەتى باسىم. مۇنداي ەرەكشەلىك قازاقتىڭ بارلىق وڭىرىنە دە ءتان. اجەلەرىمىز قاي كيىمگە ورنەك سالۋدى جاقسى بىلگەن. ال قازىرگى شەبەرلەر كوپ جاعدايدا ەرلەر مەن ايەلدەر كيىمدەرىنىڭ ورنەكتەرىن شاتاستىرعانى بىلاي تۇرسىن, كيىز-سىرماققا جاپسىراتىن قوشقار ءمۇيىزدى بارلىق قيىمگە جاپسىرۋدى سانگە اينالدىردى. بۇل دۇرىس ەمەس», دەيدى قولونەر شەبەرى.
جادىگەرلەردى قابىلداۋ اكتسياسى جىل بويى جالعاسادى. سوندىقتان دا تۇرعىندار ۇيدە ەلەۋسىز جاتقان ەسكى بۇيىمداردى مۋزەي قورىنا اكەپ تاپسىرعانى ابزال, دەيدى مۋزەي ماماندارى. مۇنداي زاتتاردا ەرتەدەگى ۇستالار مەن زەرگەرلەردىڭ قولتاڭباسى قالعان. كيەگە دە يە كەرەك.
اقتوبە وبلىسى
