اۋەلى اۋرۋحانانىڭ كىرەبەرىسىندە جاڭا فرونت-كەڭسە اشىلدى. مۇندا ەلوردا تۇرعىندارى وزىنە قاجەتتى سۇراقتارىنا جاۋاپ الىپ, مامانداردان كەڭەس الا الادى.
– مەملەكەت باسشىسىنىڭ ايتىپ جۇرگەن تۇجىرىمداماسىنا سايكەس «ەستيتىن مەملەكەت» قاعيداتى بويىنشا كەلۋشىلەرگە قولايلى بولسىن دەپ ءبىز فرونت-كەڭسەنى كىرەبەرىسكە ورنالاستىردىق. ويتكەنى كوپ مەكەمەلەردە بۇل قىزمەتتىڭ ادامدارى 2-3-قاباتتا وتىرادى, ونى تابۋ قاراپايىم جۇرتشىلىققا قيىن, – دەدى مەديتسينالىق جانە فارماتسەۆتيكالىق باقىلاۋ دەپارتامەنتىنىڭ باسشىسى دارحان تۇرلىبەكوۆ.
سونىمەن قاتار اتالعان اۋرۋحاندا فارماتسيا ءبولىمى اشىلدى. ونىڭ ەرەكشەلىگى بارلىق پرەپارات ورتاق جۇيەگە تسيفرلاندىرىلعان. ناتيجەسىندە, تۇرعىندارعا جەدەل ءارى ساپالى قىزمەت كورسەتىلمەك.
«OGF» كومپانياسى اقپاراتتىق جۇيەسىنىڭ ديرەكتورى جۇلدىز داقىمباەۆانىڭ ايتۋىنشا, تسيفرلاندىرىلعان پرەپاراتتاردىڭ ورتالىق جۇيەسى – بىرەگەي جوبا. ويتكەنى مۇنداي جوبا ءالى بىردە-ءبىر كوپسالالى اۋرۋحانادا اشىلعان جوق. استانادا ءپروفيلدى ەمدەۋ مەكەمەلەرىندە عانا بار.
– بۇل ءۇردىس جاھاننىڭ ءبىراز جۇرتىندا بۇرىننان قولدانىلىپ كەلەدى. جانە بۇل حالىقارالىق تالاپتاردىڭ ءبىرى بولىپ سانالادى. جوبانى ىسكە اسىرۋدىڭ سىناق كەزەڭىندە كوپتەگەن وڭ ناتيجە بەردى. بىرىنشىدەن, دارىلەردى پايدالانۋدى وڭتايلاندىرۋ جانە شىعىنداردى ازايتۋ, سونداي-اق دارىلىك زاتتاردى پايدالانۋدى باقىلاۋ ەسەبىنەن بيۋدجەت قاراجاتىن ۇنەمدەۋ سياقتى وزگەرىستەر بايقالماق, ەكىنشىدەن, قاتە قاۋپى بارىنشا ازايتىلادى. ويتكەنى جاسى, سالماعى, قارسى كورسەتىلىمدەرى, تاۋلىكتىك دوزاسى جانە ت.ب. سياقتى كورسەتكىشتەر بويىنشا ءاربىر ەمدەلۋشىگە ارنالعان رەتسەپت باقىلاۋدا بولادى, – دەيدى ج.داقىمباەۆا.
ونىڭ ايتۋىنشا, تسيفرلاندىرىلعان پرەپاراتتاردىڭ ورتالىق جۇيەسى دارىگەرلەردىڭ نۇسقاۋى بويىنشا ەمدەۋ جۇمىسى ۋاقتىلى جانە ساپالى دايىنداۋعا زور سەپتىگىن تيگىزەدى.
– ءبىز 2011 جىلدان باستاپ جۇمىس ىستەپ كەلەمىز. قازىر ەلىمىزدە 160-تان اسا مەديتسينالىق مەكەمەگە قىزمەت كورسەتەمىز. بۇل جۇيەنىڭ تيىمدىلىگى وتە مول. ونىڭ پايداسىن ءبىزدىڭ ەل ءالى تۇسىنە قويعان جوق. بۇل ەڭ ءبىرىنشى ءدارى جەتىسپەۋشىلىكتى جويادى. مىسالى, ءبىر بولىمدە انالگيننىڭ 100 داناسى جاتادى, ال ول ءبىر بولىمدە جوق بولۋى مۇمكىن. مىنە, وسىنىڭ ءبارى ءبىر ورتالىقتا بولادى. ماسەلەن, ءدال وسى اۋرۋحانادا 1 مينۋتتا 8 ناۋقاسقا ەم-شارا جاسالادى ەكەن. ونىڭ ۇشەۋى اۋىر جاعدايدا كەلەدى. مىنە, وسىنداي كەزدە ءدارى-دارمەك دايىنداۋعا ۋاقىت ۇنەمدەلەدى, – دەيدى ول.
ماماننىڭ ايتۋىنشا, بۇل جوبانى جۇزەگە اسىرۋدا ەمحانادا جۇمىس ىستەيتىن پرەپاراتتاردىڭ ورتالىقتاندىرىلعان اقپاراتتىق جۇيەسىنىڭ دايىندىعى ماڭىزدى ءرول اتقارعان. الدىن الا ەسەپتەۋلەر بويىنشا, №2 قالالىق كوپسالالى اۋرۋحاناداعى پرەپاراتتاردىڭ ورتالىقتاندىرىلعان اقپاراتتىق جۇيەسى جىلىنا 400 ملن تەڭگەگە دەيىن بيۋدجەتتى ۇنەمدەۋگە مۇمكىندىك بەرەدى.
– باستى ماقسات – ەمدەلۋشىلەرگە پرەپاراتتاردى جەتكىزۋ جۇيەسىن تسيفرلاندىرۋ, دارىلىك زاتتاردىڭ دەربەستەندىرىلگەن ەسەبىن جۇرگىزۋ. مۇندا بەرىلەتىن ءدارى-دارمەكتەردىڭ سانى اۆتوماتتى تۇردە باقىلانادى. بۇل بولىمشەنىڭ بىرەگەيلىگى – مەديتسينالىق ءدارى-دارمەكتەرگە جۇمسالاتىن شىعىنداردى ۇنەمدەۋ. سونىمەن قاتار قاتە ەمدەۋ قاۋپى ازايادى, – دەيدى استانا قالاسى دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ.
اۋرۋحانادا مودەلدى دامىتۋ ماقساتىندا ەمدەلۋشىلەردى قولداۋ قىزمەتى بويىنشا ەلەكتروندىق كەزەك ەنگىزىلەدى. جيىندا ناۋقاستاردى جوسپارلى ەمدەۋگە جاتقىزۋ الگوريتمى پىسىقتالدى. جاقىن ارادا بارلىق نيەت بىلدىرۋشىلەر ونلاين رەجىمدە بوس توسەك-ورىنداردىڭ سانىن كورە الادى, ونىڭ بارلىعى اۋرۋحانانىڭ سايتىندا دا قولجەتىمدى بولماق.
– جوبانىڭ نەگىزگى مىندەتى – دارىگەرلەردىڭ تاعايىنداۋى بويىنشا دارىلىك زاتتاردى ۋاقتىلى جانە ساپالى دايىنداۋ, سونداي-اق ولاردى مەديتسينالىق ۇيىمنىڭ كلينيكالىق جانە پارا-كلينيكالىق بولىمشەلەرىنە جەتكىزۋ. كلينيكالىق فارماكولوگ ءار پاتسيەنتكە جاس, سالماق, قارسى كورسەتىلىمدەر, تاۋلىكتىك دوزا جانە ت.ب. ولشەمدەرى بويىنشا تاعايىندايدى. بۇل جوبانى ىسكە اسىرۋ كەزىندە ءبىزدىڭ كلينيكادا جۇمىس ىستەيتىن تسيفرلاندىرىلعان گوسپيتالدىق فارماتسيا اقپاراتتىق جۇيەسىنىڭ دايىندىعى ماڭىزدى ءرول اتقاردى, – دەدى №2 كوپسالالى اۋرۋحاناسىنىڭ باس دارىگەرى نۇربول تۇرسىنباەۆ.
باس دارىگەردىڭ ايتۋىنشا, اۋرۋحانانىڭ جانىنان بالالارعا ارنالعان جاڭا تراۆماتولوگيالىق پۋنكت اشۋ جوسپارلانعان.
– قالا بويىنشا بىزدە مۇنداي 9 اۋرۋحانا بار. 3 ەرەسەكتەر مەن 3 بالالارعا ارنالعان كوپسالالى اۋرۋحانالاردىڭ بارلىعىندا مۇنداي تسيفرلاندىرىلعان پرەپاراتتاردىڭ ورتالىق جۇيەسىن ەنگىزۋدى جوسپارلاپ وتىرمىز, – دەدى استانا قالاسى دەنساۋلىق ساقتاۋ باسقارماسىنىڭ باسشىسى.
سونداي-اق اۋرۋحانادا جاڭا بولىمگە ارنالعان عيماراتتىڭ قۇرىلىسى باستالاتىنى ايتىلدى. ول اكۋشەرلىك جانە كلينيكالىق بلوگتاردى بىرىكتىرەتىن قابىلداۋ حابى بولماق.
