ونەر مۋزەيىنىڭ «مۋزەيدەگى ەكسپونات» اتتى ءبولىمىن تاماشالاۋعا كەلگەن كورەرمەندى دومبىراشىلار كۇيمەن قارسى الدى. بالدىرعاندار دا بي بيلەپ, ءان سالدى. جاۋھار دۇنيەلەر قويىلعان سورەلەردى قىزىقتاعان ەل نادەجدا حاباروۆانىڭ قىش ىدىستارىن وڭدەۋدەگى شەبەرلىگىن كورىپ, تاڭداي قاعىستى. تورگى زالدا كومپيۋتەرلىك گرافيكا اۋەسقويلارى «Digital art» بايقاۋىندا جاڭا تەحنولوگيانىڭ عاجاپ مۇمكىندىكتەرىنە ءتانتى بولدى. ۇلكەن زالدا مۋزەي جوبالارىنىڭ ەڭ بەلسەندى قاتىسۋشىلارى ماراپاتتالدى. ولاردىڭ ىشىندە سۋرەتشىلەر, مۋزىكانتتار, شىعارماشىلىق ۇجىمداردىڭ جەتەكشىلەرى بار.
– ءبىزدىڭ بابادان قالعان مۇرامىزدى ساقتاپ كەلە جاتقان مۋزەيدىڭ ورنى ەرەكشە. بايىرعى ونەردىڭ ورنەگىن ساقتاپ وتىرعان مۋزەيدىڭ جۇمىسى جەمىستى بولسىن. بۇگىنگى بولىپ جاتقان «مۋزەي ءتۇنى» شاراسى كورەرمەندەرگە رۋحاني ءلاززات سىيلاسىن, – دەدى مادەنيەت, سپورت, تۋريزم جانە اقپارات قىزمەتكەرلەرىنىڭ قازاقستاندىق سالالىق كاسىپتىك وداعى وبلىستىق فيليالىنىڭ توراعاسى ءتۇسىپحان تۇسىپبەكوۆ.
مادەني شارا بارىسىندا سۋرەتشىلەر كورەرمەندەردىڭ پورترەتتەرىن سالىپ, قوناقتارعا تارتۋ جاسادى. مۋزەي قوناقتارى مودەل رەتىندە «سەن – باسقاسىڭ», «سەن – وسىندايسىڭ» جانە «ۇزدىك قولتاڭبا» بايقاۋلارىنا قاتىسىپ, ءتۇرلى سىيلىقتارعا يە بولدى.
– مۋزەي – ءبىزدىڭ قارا شاڭىراعىمىز. قاي ۋاقىتتا بولسىن ونەر تۋىندىمىزدى ارقالاپ وسى مادەنيەت وشاعىنا كەلەمىز. بۇل رۋحاني شاڭىراق سۋرەتشىلەردىڭ كورمەلەرىن وتكىزىپ, قىلقالام شەبەرلەرىنە قولداۋ كورسەتىپ وتىرادى, – دەدى سۋرەتشى قۇداش نۇرسادىقوۆ.
بۇل كۇنى وڭىردەگى وزگە دە مۋزەيلەردە قىزىققا تولى تانىمدىق ءىس-شارالار ءوتىپ جاتتى.
وسكەمەن
