انىقتالعانداي, كاتونقاراعاي, التاي جانە زايسان اۋداندارىندا, ريددەر قالاسىندا بارلىعى 13 سەل ءجۇرۋدىڭ قاۋىپتى وشاعى بار ەكەن. قاۋىپ ءتونىپ تۇرعان توڭىرەكتەگى تاۋلاردا ۇزىن-سانى 144 مورەنالىق كول قالىپتاسقان. ارنايى ماماندار جىل سايىن قاۋىپسىزدىك ماقساتىندا كول بەتىندەگى مۇز ەري باستاعان ساتتەن جاز ورتاسىنا دەيىن قاداعالاپ, تەكسەرۋمەن بولادى.
سونىمەن قاتار تاۋ بەتكەيلەرىندەگى سىرعىما قاۋىپتى 9 ۋچاسكە بارى انىقتالدى. اسىرەسە, كۇرە جولداردىڭ بويىنداعى بەتتەردەن سىرعيتىن شاعىل تاس ءارى-بەرى اعىلعان جولاۋشىلارعا قاۋىپ توندىرەدى. مۇنىڭ الدىن الۋ ءۇشىن توتەنشە جاعدايلار دەپارتامەنتى «قازسەلدەنقورعاۋ» مم شىعىس قازاقستان اۋماقتىق پايدالانۋ باسقارماسى فيليالىمەن بىرلەسىپ, سەل جانە سىرعىما قاۋپى بار ۋچاسكەلەردە تۇرعىندار مەن ينفراقۇرىلىمنىڭ قاۋىپسىزدىگىن قامتاماسىز ەتۋ ءۇشىن ءىس-شارالار جوسپارى دايىندالدى. وزەن ارنالارى جانە سەل, سىرعىما قاۋىپتى ۋچاسكەلەردە جەرۇستى جانە اەروۆيزۋالدى زەرتتەۋ كەستەسى ازىرلەندى. مورەنالىق كولدەردە باتيمەتريالىق جۇمىستار اتقارىلدى. سەل قاۋپى بار ۋچاسكەلەردە 20 ەسكەرتۋ جانە تىيىم سالۋ تاقتايشالارى ورناتىلدى.
كوشكىن سەل جانە سىرعىما قاۋپى بار اۋدانداردىڭ جەرگىلىكتى اتقارۋشى ورگاندارىنا, عيماراتتارى قاۋپى بار ۋچاسكەلەردە ورنالاسقان كاسىپورىن باسشىلارىنا, جەكە ءۇي يەلەرىنە ەسكەرتۋ پاراقشالارى تاراتىلدى.
ايتا كەتەرلىگى, سەل جاعدايىنا باقىلاۋ جۇرگىزۋ ءۇشىن ماۋسىمدىق 9 گيدروپوست جانە جىل بويىنا جەكە ءبىر گيدروپوست جۇمىس ىستەيتىن بولادى. مامانداردىڭ پىكىرىنشە, سەل ءجۇرۋ ماۋسىمىندا تاۋ-تاسقا شىعۋدى كەيىنگە شەگەرە تۇرعان ابزال.
شىعىس قازاقستان وبلىسى
