ەرلىگى ۇرپاعىمىزعا ءار كەز ۇلگى
«حالىق قاھارمانى», قازاقتان شىققان تۇڭعىش اسكەري ۇشقىش ايەل حيۋاز دوسپانوۆانىڭ ەرلىگى مەن باتىرلىعى, ۇلتجاندىلىعى مەن قايسارلىعى بۇگىندە بارشاعا ءمالىم. قاھارمان قىزدىڭ جارقىن بەينەسىن وقۋشىلارعا كەڭىنەن تانىستىرىپ, ولاردى وتانسۇيگىشتىك رۋحتا تاربيەلەۋ ماقساتىندا جىل سايىن اتىراۋ قالالىق ءبىلىم بەرۋ بولىمىنە قاراستى ح.دوسپانوۆا اتىنداعى جالپى ءبىلىم بەرەتىن ورتا مەكتەپتە تاعىلىمدى ءىس-شارا ۇيىمداستىرىلىپ كەلەدى. بيىلعى ءىس-شارا حيۋاز قايىرقىزىنىڭ 101 جىلدىعىنا ارنالىپ, «قاناتتى قىز حيۋاز» تاقىرىبىندا ءوتتى.
مادەني-تانىمدىق جيىنعا جينالعاندار اسكەري ۇشقىش قىزدىڭ ارۋاعىنا تاعزىم ەتىپ, ءبىر مينۋت ۇنسىزدىكپەن ەسكە الدى. بيىل مەكتەپتىڭ 7 «ا» سىنىبى جانىنان «حيۋاز» مامانداندىرىلعان جاس ساربازدار كلۋبى اشىلعان بولاتىن. «جاس سارباز» كلۋبى – ءبىلىم بەرۋ ۇيىمدارىنىڭ قۇرىلىمدىق بولىمشەسى. بۇل سىنىپتا كاسىبي باعىتتالعان ۇزدىكسىز ءبىلىم بەرۋ باعدارلاماسى جۇرگىزىلەدى.
مەرەكەلىك ءىس-شاراعا كوپتەگەن قوناق قاتىستى. وندا اتىراۋ قالاسى اكىمىنىڭ ورىنباسارى ن.ەرمۇحانوۆ, اتىراۋ قالاسى ارداگەرلەر كەڭەسىنىڭ توراعاسى ك.قوسىباەۆ, پو-2 «حيۋاز» ۇشاعى مودەلىنىڭ كونسترۋكتورى ە.قىدىروۆ, حيۋازتانۋشى جۋرناليست ت.قاليموۆا, ت.ب. ءسوز سويلەپ, جەتكىنشەكتەردىڭ ۇلتجاندىلىق باعىتىندا ءتالىم-تاربيە الۋلارىنا تىلەكتەستىكتەرىن ءبىلدىردى. ال ءىس-شاراعا اقتوبە قالاسىنان ارنايى كەلگەن ء«اليا گ ۇلى» قازاق بي ءانسامبلىنىڭ (كوركەمدىك جەتەكشىسى ءارى بالەتمەيستەرى ش.اينابەكوۆا) ونەرى كوپشىلىكتىڭ كوڭىلىنەن شىقتى.
مەكتەپ تورىنەن ورىن العان حيۋاز اپامىزدىڭ ەسكەرتكىشى ونىڭ ءومىرى مەن ەرلىگىن كەلەر ۇرپاققا ماڭگىلىك ونەگە ەتىپ تۇرعانداي اسەر قالدىردى.
رۋسلان حامزا,
قازاقستان جۋرناليستەر وداعىنىڭ مۇشەسى
اتىراۋ
رۋحاني قۇندىلىقتارمەن تانىستى
مۇراجايلاردىڭ كەيىنگى ۇرپاقتى ەلجاندىلىققا, وتانشىلىققا تاربيەلەۋدە, جۇرتشىلىققا تاريحي-تانىمدىق, اعارتۋشىلىق قىزمەت كورسەتۋدە الاتىن ورنى ەرەكشە ەكەنى بەلگىلى. وسى رەتتە بايزاق اۋداندىق پروباتسيا قىزمەتىنىڭ ەسەبىندە تۇرعان, قوعامنان وقشاۋلاۋعا بايلانىستى ەمەس جازا ءتۇرى تاعايىندالعان ازاماتتاردىڭ بويىنا رۋحاني بايلىقتىڭ ۇرىعىن سەۋىپ, مادەني كوزقاراسىن قالىپتاستىرۋ ماقساتىندا اۋداندىق تاريحي-ولكەتانۋ مۋزەيىندە حالىقارالىق ەسكەرتكىشتەردى قورعاۋ كۇنىنە وراي ءىس-شارا ۇيىمداستىرىلدى. وعان جامبىل وبلىسى قىلمىستىق اتقارۋ جۇيەسى دەپارتامەنتى (قاجد) بايزاق اۋداندىق پروباتسيا قىزمەتى ءبولىمىنىڭ باستىعى, ادىلەت كاپيتانى تيمۋر مولداتاەۆ باستاعان اۋداندىق پروباتسيا قىزمەتىنىڭ ەسەبىندە تۇرعان, قوعامنان وقشاۋلاۋعا بايلانىستى ەمەس جازا ءتۇرى تاعايىندالعاندار قاتىستى.
ءىس-شارا بارىسىندا تاريحى عاسىرلار تەرەڭىنەن سىر شەرتەتىن, اۋداننىڭ كەشەگىسى مەن بۇگىنگىسىن ايشىقتايتىن «ارحەولوگيا», «داڭق», «اۋدان تاريحى», «ەتنوگرافيا», «مادەنيەت جانە سپورت» زالدارى تانىستىرىلدى. مۋزەيگە كەلگەندەر سونىمەن قاتار اۋدان ورتالىعى سارىكەمەر اۋىلىنىڭ باستى كوشەسىندەگى «باتىرلار اللەياسىندا» اۋداننان شىققان 27 سوتسياليستىك ەڭبەك ەرىنىڭ جانە كەڭەس وداعىنىڭ باتىرى اقادىل سۋحانباەۆتىڭ, بەيبىت كۇندە ەرلىك جاساعان «حالىق قاھارمانى» عازيز بايتاسوۆتىڭ, ماسكەۋ وليمپياداسىنىڭ چەمپيونى, قازاقستاننىڭ ەڭبەك ەرى جاقسىلىق ۇشكەمپىروۆتىڭ ءومىر جولدارىنان اقپارات الدى.
پروباتسيالىق باقىلاۋ بەلگىلەنگەن ازاماتتار ءىس-شارادان جاقسى اسەر العاندارىن, رۋحاني تۇرعىدان بايىپ, قۇندى اقپاراتتارمەن تانىسقاندارىن ايتا كەلىپ, ۇيىمداستىرۋشىلارعا العىستارىن جەتكىزدى.
ايناگۇل مامىتبەكوۆا,
اۋداندىق تاريحي-ولكەتانۋ
مۋزەيىنىڭ عىلىمي قىزمەتكەرى
جامبىل وبلىسى,
بايزاق اۋدانى
ارداگەر سپورتشى اتىنداعى تۋرنير
سپورت – دەنساۋلىق كەپىلى. ەلىمىز تاۋەلسىزدىگىن العان ۋاقىتتان بەرى شالعايدا جاتقان تەرىسكەي وڭىرىندە دە بۇقارالىق سپورت كەشەنى مەن الاڭدار سالىنىپ, پايدالانۋعا بەرىلىپ جاتىر. كوپتەگەن جاس سپورتشى رەسپۋبليكالىق, وبلىستىق بىرىنشىلىكتەردە جۇلدەلى ورىنداردان كورىنىپ ءجۇر.
كەزىندە وسى سوزاق اۋدانىنان شىققان وقۋشىلاردىڭ «شالقار» فۋتبول كومانداسى ارمەنيا استاناسى ەرەۆان قالاسىندا وتكەن بۇكىلوداقتىق جارىستا رەسپۋبليكا نامىسىن قورعاعان بولاتىن. ءبىر قىزىعى, بەلگىلى فۋتبول كوممەنتاتورى سوزاقتىق جاس فۋتبولشىلاردىڭ ويىنىنان ارنايى رەپورتاج جۇرگىزگەن كورىنەدى.
سوزاق سپورتىنا ەڭبەك سىڭىرگەن جانداردىڭ ءبىرى – توباقابىل ومىرزاقوۆ. جىل سايىن كوكتەم ايىندا قازاق كۇرەسىنەن ونىڭ اتىنداعى وبلىستىق جارىس ءوتىپ تۇرادى. تاياۋدا اۋدان ورتالىعى شولاققورعان اۋىلىندا ءداستۇرلى تۋرنير جالعاسىن تاپتى. تۇركىستان وبلىسىنىڭ 10 اۋدانىنان كەلگەن بالۋانداردىڭ ونەرىن جۇرتشىلىق قىزىعا تاماشالادى. جەڭىمپازدارعا ارنايى تاعايىندالعان جۇلدەلەر مەن سىيلىقتار تاپسىرىلدى.
ءبىز اڭگىمە ەتىپ وتىرعان توباعاڭ – وسى تەرىسكەي ءوڭىرىنىڭ ءتول تۋماسى. كەزىندە قازاق كۇرەسىنەن ورتا ازيا چەمپيونى بولعان, كسرو مەن قازاق كسر-ءىنىڭ سپورت شەبەرى, قازاق كسر-ءىنىڭ ەڭبەك سىڭىرگەن جاتتىقتىرۋشىسى.
تەرىسكەي سپورتىنىڭ ارداگەرى ت.ومىرزاقوۆ سوزاق اۋدانىنىڭ قۇرمەتتى ازاماتى. قازاقستان رەسپۋبليكاسى ءبىلىم بەرۋ ءىسىنىڭ ۇزدىگى. سپورت سالاسىنداعى ەلەۋلى ەڭبەگى ەسكەرىلىپ, قازاقستان رەسپۋبليكاسى ۇلتتىق وليمپيادا كوميتەتىنىڭ توسبەلگىسىمەن ماراپاتتالعان.
سەكسەننىڭ سەڭگىرىنە قادام باسقان ت.ومىرزاقوۆ ءالى دە تىڭ. سپورت پەن قالامدى ۇشتاستىرا بىلگەن ول – جۋرناليستەر وداعىنىڭ مۇشەسى, ءارتۇرلى جانرداعى ونعا تارتا كىتاپتىڭ اۆتورى. توباعاڭا قاراپ, سپورتتىڭ ءار كەز جاستىق سىيلايتىنىنا كوز جەتكىزە تۇسەسىڭ.
كارىباي امزە ۇلى,
زەينەتكەر
تۇركىستان وبلىسى
