كەنشى, مەتاللۋرگتەردىڭ تالاپ-تىلەگى نەگىزىندە دايىندالعان باعدارلاما بويىنشا بيىل 75 ادام پاتەر الادى. جاقىندا وسى باعدارلاماعا قاتىسىپ, جەڭىلدەتىلگەن نەسيە بۇيىرعان تۇرعىندارعا سەرتيفيكاتتار بەرىلدى. سەرتيفيكاتتاردى وبلىس اكىمى ەرماعانبەت بولەكپاەۆ پەن «وتباسى بانكى» باسقارما توراعاسى ءلاززات يبراگيموۆا تابىس ەتتى.
«كەنشىلەر مەن مەتاللۋرگتەرگە جەڭىلدەتىلگەن يپوتەكالىق نەسيە بەرۋ ەكىنشى جىل جۇزەگە اسىپ وتىر. باعدارلاماعا قاتىسۋشىلار ءتىزىمىن «ارسەلورميتتال تەمىرتاۋ» اق كومىر جانە بولات دەپارتامەنتتەرىنىڭ كاسىپوداعى جاساقتادى. «وتباسى بانك» نەسيە الۋعا نيەت ەتكەن العاشقىلاردىڭ ءوتىنىشىن ماقۇلدادى. بيىل 75 وتباسى پاتەرگە قول جەتكىزەدى. «وتباسى بانكپەن» بىرلەسكەن جۇمىس جالعاسىن تابادى. سونداي-اق وبلىستا جاس ماماندارعا ارنالعان يپوتەكالىق باعدارلامانى اتاپ ءوتۋ قاجەت. باعدارلامانىڭ بۇگىندە گەوگرافيالىق اۋقىمى كەڭەيدى. وسى جىلى باعدارلاماعا بالقاش, ساران, تەمىرتاۋ قالالارى دا قوسىلادى. ءارى قاراي مونوقالالارداعى جاس ماماندار مەن جۇمىسشى جاستارعا يپوتەكا بەرۋدى جولعا قويامىز», دەدى ە.بولەكپاەۆ.
«وتباسى بانك» اق باسقارما توراعاسى ءلاززات يبراگيموۆا باعدارلاماعا قاتىسۋشىلاردى ىرىكتەۋدەگى كاسىپوداقتاردىڭ جۇمىسىنا ريزاشىلىعىن ءبىلدىردى. سونىمەن بىرگە «ارسەلورميتتال تەمىرتاۋ» كومپانياسىنىڭ الدا باعدارلاماعا قاتىساتىندىعىنا ءۇمىتتى ەكەنىن جەتكىزدى.
«قاراعاندى وبلىسى دەگەندە كوز الدىمىزعا كەنشى مەن مەتاللۋرگتەردىڭ بەينەسى كەلەتىنى راس. بۇلار – ەرەن ەڭبەك ادامدارى. زور قۇرمەتكە لايىق. قانداي كەنشى-مەتاللۋرگتىڭ باسپاناعا مۇقتاج ەكەنىنە ىرىكتەۋ جاساعان كاسىپوداقتارعا العىس ايتقىم كەلەدى. ەڭبەك ادامىنىڭ بارلىق جاعدايىن كاسىپوداقتاردان ارتىق بىلەتىن ەشكىم جوق. قاراعاندى مەتاللۋرگيا كومبيناتىنىڭ باسشىلىعى دا باعدارلاماعا قاتىسىپ, قوسىمشا رەسۋرستار بولەدى دەگەن ءۇمىتىمىز بار», دەدى ل.يبراگيموۆا.
نەسيە 15 جىلعا راسىمدەلەدى. جىلدىق مولشەرلەمەسى 5 پايىز. بيىل قارىزدىڭ ەڭ جوعارى سوماسى 20 ملن تەڭگە. پاتەردى قاراعاندى, ساران, اباي, شاحتينسك, تەمىرتاۋدا باستاپقى جانە قايتالاما نارىقتان ساتىپ الۋعا بولادى.
شاحتادا 8 جىلدان بەرى جۇمىس ىستەيتىن ارتەم ۆوججوۆ باعدارلامانىڭ تيىمدىلىگىن, ءالى دە جەلىسىن ۇزبەي جالعاسۋى قاجەتتىگىن ايتادى. ارتەم شاحتينسك قالاسىنان ۇشبولمەلى پاتەر الىپتى. وتباسىندا ەكى بالاسى بار.
«تەنتەك» شاحتاسىندا شامامەن 8 جىلدان بەرى جۇمىس ىستەپ كەلەمىن. بۇعان دەيىن اتا-اناممەن بىرگە تۇرعان ەدىك. ەندى باعدارلاما ارقىلى باسپانالى بولدىق. شاحتينسك قالاسىندا ءۇش بولمەلى پاتەر تابىلدى. باعدارلاما وتە ءتيىمدى. مۇنداي باعدارلامالاردىڭ بولاشاق ءۇشىن جالعاسى بولۋى كەرەك», دەيدى ا.ۆوججوۆ.
بىلتىر كەنشىلەر مەن مەتاللۋرگتەردىڭ باسپانا الۋىنا 1,7 ملرد تەڭگە ءبولىنىپ, 134 وتباسى پاتەرلى بولدى. بيىلعى قارجى كولەمى 1 ملرد 500 ملن تەڭگە.
قاراعاندى وبلىسى
