اشىلۋ سالتاناتى قازاقستاننىڭ ءار وڭىرىندەگى 96 كىتاپحانادان كەلگەن قىزمەتكەرلەردى قۇتتىقتاۋدان باستالدى. اسحات ورالوۆ ءىس-شارا قوناقتارىن مادەنيەت جانە ونەر قىزمەتكەرلەرى كۇنىمەن قۇتتىقتاپ, «مادەنيەت سالاسىنىڭ ۇزدىگى» توسبەلگىسىن يەلەنگەن كىتاپحاناشىلار مەن سالا ارداگەرلەرىن ماراپاتتادى. سونداي-اق بىرقاتار كىتاپحاناعا العىس حات تابىستادى.
اشىق اسپان استىندا قازاقستاندىق باسپالاردىڭ كىتاپتارىن ساتىپ الۋعا بولاتىن دۇكەن, فوتوايماق, بالالار پاۆيلونى مەن ءتىل, مادەنيەت, ادەبيەت جانە كىتاپحانا ءىسىن دامىتۋ ماسەلەلەرىن تالقىلاۋعا ارنالعان ساحنا ورناتىلدى. جۋرناليستەر, رەداكتورلار جانە كينورەجيسسەرلەردىڭ قاتىسۋىمەن كىتاپ كورمەسى, نەتۆوركينگ جانە شەبەرلىك ساباقتارى ءوتتى. ۇيىمداستىرۋشىلار مەن قوناقتار زياتكەرلىك ءىس-شارانى استانا مەن ەلىمىزدىڭ باسقا دا وڭىرلەرىنەن زيالى قاۋىم وكىلدەرىن, وقىتۋشىلار مەن مادەنيەت قىزمەتكەرلەرىن جيناعان شاعىن مەرەكەگە اينالدىردى. سونداي-اق فەستيۆالگە شەتەلدىك قوناقتار - حالىقارالىق تۇركى اكادەمياسىنىڭ پرەزيدەنتى شاحين مۇستافاەۆ, فرانتسيا, يران جانە باسقا دا مەملەكەتتەر ەلشىلىكتەرىنىڭ وكىلدەرى قاتىستى.
«جاس ۇرپاقتى تاربيەلەۋدە جانە قالىپتاستىرۋدا وسى سالادا جۇمىس ىستەيتىن قىزمەتكەرلەردىڭ ەڭبەگى ماڭىزدى ءرول اتقارادى. ولاردىڭ قاتىسۋىنسىز بۇل جۇمىستى ەلەستەتۋ مۇمكىن ەمەس. قازىرگى ۋاقىتتا قازاقستاندا 11 مىڭعا جۋىق كىتاپحاناشى جۇمىس ىستەيدى. قازىر كىتاپحانا قىزمەتكەرلەرىنىڭ مارتەبەسىن كوتەرۋ جانە ولاردىڭ ەڭبەكاقىسىن ارتتىرۋ بويىنشا جۇمىس جۇرگىزىپ جاتىرمىز», دەدى اسحات ورالوۆ.
اشىلۋ سالتاناتىنان كەيىن مينيستر فەستيۆالگە كەلگەن كىتاپحاناشىلارمەن سويلەسىپ, ۇلتتىق اكادەميالىق كىتاپحانا عيماراتىنداعى شاعىن سۋرەت كورمەسىن ارالادى. اسحات ورالوۆ ءىس-شارانىڭ ەرەكشە فورماتىنا قاراماستان, ءبارى جوعارى دەڭگەيدە ۇيىمداستىرىلعانىن اتاپ ءوتتى.
