«مەكتەپتەردە قۋدالاۋ ماسەلەسى بولماۋى كەرەك. بيىلدان باستاپ مۇعالىمدەرمەن سوتتاساتىن مەكتەپ باسشىلارى مەكتەپتە ىستەمەۋى كەرەك. ۇناماسا, ونداي مۇعالىمدەردى جۇمىسقا قابىلداماۋ كەرەك. ال قابىلدادىڭىز با, تاربيەلەڭىز. بۇكىل ۇجىممەن اقىلداسۋ كەرەك. مەن دە مەكتەپ باسشىسى بولعان اداممىن. «ۇجىمدا جامان مۇعالىمدەر بار» دەپ ماعان دا ايتقان. سول مۇعالىمدەرمەن ءبىر-ءبىرىمىزدى تاربيەلەي وتىرىپ, ۇلكەن دارەجەگە جەتتىك. مەنىڭشە, مۇعالىمنىڭ جامانى جوق. تەك ونىڭ ەڭبەگىن كورسەتە الاتىن ديرەكتورلار جوق دەگەن ويعا كەلەمىن. سوندىقتان مۇنداي كەلەڭسىزدىككە ەل اۋماعىندا جول بەرمەۋىمىز كەرەك. بيىلدان باستاپ مۇعالىم مەن ديرەكتور اراسىنداعى تۇسىنىسپەۋشىلىكتى توقتاتۋ كەرەك», دەدى وقۋ-اعارتۋ ءمينيسترى عاني بەيسەمباەۆ.
