سولتۇستىكقازاقستاندىق فيليالدىڭ كاسىپكەرلىكتى قاراجاتسىز قولداۋ ءبولىمىنىڭ باسشىسى اسەل ساماراتوۆا وزدەرىنىڭ ءىسى كاسىپكەرلىكتى 2021-2025 جىلدار ارالىعىندا دامىتۋ جونىندەگى ۇلتتىق جوبانىڭ شەڭبەرىندە جۇرگىزىلىپ جاتقانىن ايتتى. ء«بىزدىڭ ەڭ الدىمەن قولعا العان باعىتىمىز «كاسىپكە باعىتتاۋ» دەپ اتالادى. بۇل باعىت حالىقتىڭ اراسىنان كاسىپكەرلىك الەۋەتتى ارتتىرۋ ءۇشىن ىسكەرلىككە وقىتۋدى قامتيدى. ەكىنشى باعىتىمىز ايەلدەر اراسىندا كاسىپكەرلىكتى دامىتۋدى ماقسات ەتكەن ورتالىقتار قۇرۋ. مۇندا بەلسەندىلىگى جوعارى ايەلدەردىڭ ستارتاپتارىن ىنتالاندىرۋ, ەكونوميكالىق ءبىلىمىن ۇشتاۋ ماسەلەلەرى قاراستىرىلادى. ءۇشىنشى باعىتىمىز – ء«بىر اۋىل – ءبىر ءونىم» دەپ اتالدى. مۇنىڭ ءمانىسى – جەرگىلىكتى ونىمدەردىڭ ساپاسىن ارتتىرىپ, ونى برەند ەتۋگە كۇش سالۋ», دەدى ول ءوزىنىڭ سوزىندە.
بيزنەسپەن اينالىسۋ تۋرالى ماسەلە قوزعالسا بولدى – ونىڭ بولاشاعىن, دامۋىن تەك قارجى قۇيۋمەن ۇشتاستىراتىندار كوپ. بىراق قارجى قۇيماي-اق الدىمەن وسىنداي باعىتتارعا سىلتەپ, بەلسەندى جانداردىڭ ىنتالانۋىنا جول اشۋعا بولادى ەكەن. «كاسىپكەرلەرگە قولداۋ كورسەتۋ ورتالىقتارى» اياسىندا جۇمىس ىستەيتىن كاسىپكەرلەرگە جانە كاسىپكەرلىك باستاماسى بار تۇلعالارعا اقپاراتتىق-اناليتيكالىق قىزمەتتەر جانە سەرۆيستىك قولداۋ قىزمەتتەرى جاتادى. بارلىق قىزمەت تەگىن كورسەتىلەدى. جىل باسىنان بەرى وبلىستا 207 كاسىپكەرگە 212 قىزمەت كورسەتىلىپتى. ال اقپاراتتىق-اناليتيكالىق قىزمەت بويىنشا 611 ادامعا 3 191 قىزمەت كورسەتىلگەن ەكەن.
«كاسىپكە باعىتتاۋ» باعدارى بويىنشا قانداي جۇمىستار اتقارىلىپ جاتقانىن ورتالىقتىڭ مەنەدجەرى جانار ورازالينوۆا بايانداپ, ىسكەرلىككە بەت بۇرعان جاندار كاسىبي-ساراپشىلاردان تەگىن كەڭەستەر الىپ, وزدەرىنىڭ بىلىكتىلىك الەۋەتىن ارتتىراتىنىن ايتتى. «بۇل باعىت بويىنشا ىسكەرلىكتىڭ بارلىق ءتۇرى قامتىلادى. سونىڭ ىشىندە ءوندىرىس تە بار. ساراپشىلار وزدەرىنىڭ كەڭەستەرىن ونلاين جانە وفلاين رەجىمىندە كورسەتە الادى. وسىنداي كەڭەس العان كاسىپكەرلەرگە سەرتيفيكاتتار دا بەرىلەدى», دەدى ول.
ايەلدەر كاسىپكەرلىگىن دامىتۋ ورتالىعىنىڭ ماقساتى – كاسىپكەر ايەلدەرگە, سونداي-اق كاسىپكەرلىك باستاماسى بار ايەلدەرگە قارجىلاي ەمەس قولداۋ كورسەتۋ, مۇندا ولار بەلسەندىلىكتى ارتتىرۋ جانە وقىتۋ باعدارلامالارىنا قاتىسۋ ءۇشىن بىرقاتار قىزمەتتى الا الادى. ناقتى ايتقاندا, مۇندا ولار 7 ءتۇرلى قىزمەت الا الادى. سونىڭ ىشىندە ءداستۇرلى قولونەر, بيزنەسكە اقشا تارتۋ جولدارى, بيزنەس-شولۋعا تاپسىرىس بەرۋ سەكىلدى قىزمەتتەر بار. ايەلدەردىڭ كوبى ءبىر كاسىپتى ۇيرەنۋ ماسەلەسىمەن ورتالىققا قايىرىلادى ەكەن. «وسى قىزمەتتى الۋعا بۇگىنگى تاڭدا 114 تاپسىرىس ءتۇستى. بيزنەسپەن اينالىسقاندارىنا كەم دەگەندە ەكى جىل بولعان ايەلدەرگە دە تالىمگەرلىك كومەك كەرەك ەكەن. وندايلاردى تابۋ ءۇشىن ءبىز كونكۋرس جاريالاعان ەدىك, 20 ءوتىنىش ءتۇستى. سونىڭ سەگىزىن تالىمگەر رەتىندە قابىلدادىق», دەدى ورتالىقتىڭ تاعى ءبىر مەنەدجەرى يرينا ۆاسيلەۆا.
جىلدىڭ باسىنان بەرى كاسىپكەرلەر ورتالىعىنا بيزنەس باستاعىسى كەلگەن 124 قىز-كەلىنشەك ءوتىنىش تاستاپتى. مۇنداعى مەنەدجەرلەر ولاردىڭ ءبارىنىڭ ءوتىنىشىن قاناعاتتاندىردىق, دەيدى.
ء«بىر اۋىل – ءبىر ءونىم» جوباسىنا بۇرىننان كاسىپكەرلىكپەن اينالىسقاندار دا, جاڭادان باستاعىسى كەلگەندەر دە قاتىسا الادى. بۇل باستامانىڭ ءوزى العاش رەت جاپونيادا كوتەرىلگەن ەكەن. وعان قاتىساتىندار – اۋىل ايەلدەرى. ولار جەرگىلىكتى شيكىزاتتاردان ءونىم شىعارىپ, ءبىر-بىرىمەن اقىلداسىپ, اقىرى كووپەراتسيا قۇرادى. ءسويتىپ, وزدەرىنىڭ برەندتەرىنە قول جەتكىزگەن ەكەن. «بىزدەگى جوباعا قاتىسۋعا ازىرگە 12 ادام ءوتىنىش ءبىلدىردى. ولار دا وزدەرىنىڭ برەندىن بىرلەسە دامىتۋعا كۇش سالماق», دەدى يرينا ۆاسيلەۆا.
سولتۇستىك قازاقستان وبلىسى
