بۇل باستامانىڭ ەرەكشەلىگى سول, اۋىلداعىلار دەنساۋلىعىن تەكسەرتۋ ءۇشىن اۋدان, وبلىس ورتالىعىنا اعىلمايدى. كەرىسىنشە, جىلجىمالى مەديتسينالىق كەشەن اۋىلدارعا بارادى. قۇنى 156 ملن تەڭگە تۇراتىن مەديتسينالىق كەشەن – اۆتوبۋستىڭ ىشىندە دەنساۋلىقتى سۇزگىدەن وتكىزۋگە قاجەتتىنىڭ ءبارى بار: دارىگەرلەردىڭ كەڭەسى, مامانداندىرىلعان مەديتسينالىق كومەك كورسەتۋ, دياگنوستيكالىق جانە سكرينگتىك زەرتتەۋلەر جۇرگىزۋگە مۇمكىندىك بەرەتىن بىرنەشە كابينەت. حيرۋرگ, گينەكولوگ, وفتالمولوگ, كارديولوگ, پەدياتر, وتولورينگولوگ, دانتيست, جالپى تاجىريبەلىك دارىگەرلەر مەن ەكگ مەيىربيكەسى, رەنتگەن مەن ۋدز لابورانتىنا شەيىن بار كەشەن وسى زامانعى مەديتسينالىق قۇرال-جابدىقتارمەن جابدىقتالعان. ءبىر ەمەس, بىرنەشە مامانعا بىردەن قارالىپ, تولىققاندى تەكسەرىستەن وتۋگە مۇمكىندىك بار.
– بۇل كەشەننىڭ قىزمەتىن اۋىلداعى كەز كەلگەن تۇرعىن پايدالانا الادى. مەديتسينالىق ساقتاندىرۋى بار ما, جوق پا, بۇعان قارامايدى, ءبارى دە تەگىن. الەۋمەتتىك مەديتسينالىق ساقتاندىرۋ قورىنىڭ ۇلىتاۋ وبلىستىق فيليالىنىڭ جاڭاارقا اۋداندىق كوپبەيىندى ورتالىق اۋرۋحاناسىمەن جاساعان كەلىسىمشارتى نەگىزىندە وسى شاراعا 40 ملن-نان اسا قاراجات قاراستىرىلعان. بۇل جۇمىس قىركۇيەك ايىنا شەيىن جالعاسادى, دەيدى «الەۋمەتتىك مەديتسينالىق ساقتاندىرۋ قورى» كەاق ۇلىتاۋ وبلىسى بويىنشا فيليالىنىڭ ديرەكتورى ا.بەردىبەكوۆ.
جان-جاقتى ويلاستىرا بىلسە, كەز كەلگەن تىعىرىقتان شىعاتىن جول تابۋعا بولادى ەكەن. دارىگەر تولى اۆتوبۋستىڭ قىزمەتى سونى كورسەتىپ وتىر.
ۇلىتاۋ وبلىسى
