سپارتاكيادانىڭ اشىلۋ سالتاناتىنا ەلىمىزدىڭ ۇلكەن قالالارىنان كەلگەن سپورت مايتالماندارى جانە سولتۇستىك قازاقستان وبلىسىنىڭ سپورتىنا ەڭبەك ءسىڭىرىپ جۇرگەن ازاماتتار قاتىستى. وبلىس اكىمى ايداربەك ساپاروۆتىڭ اتىنان قۇتتىقتاۋ ءسوزدى اكىمدىك اپپاراتىنىڭ باسشىسى ولجاس ىدىرىسوۆ وقىپ بەردى. قۇتتىقتاۋدا قاتىسۋشىلارعا قايرات پەن جىگەر, شەبەرلىك پەن ساتتىلىك تىلەپ, قىزىلجار ءوڭىرى سپورتىنىڭ جارىق جۇلدىزدارى دا اتالىپ, قول جەتكىزگەن تابىستار ايتىلدى. سونىڭ ىشىندە حالىقارالىق ارەنالارداعى ەسىل ءوڭىرى بوكسشىلارىنىڭ اتوي سالعان ەڭبەكتەرى ەرەكشە ەسكەرىلدى.
سپارتاكياداعا قىزدار اراسىنداعى قازاق بوكسىنىڭ جارىق جۇلدىزدارى تۇگەل كەلگەنى كورىنىپ تۇر. ولار بەس كۇن بويى قىزىلجار رينگىندە اتوي سالىپ, چەمپيوندىق اتاققا تالاسادى. العاشقى كۇننەن-اق جارىستىڭ تارتىستى وتەتىنى كورىنىپ قالدى. قازاقستاننىڭ كەشەگى تاشكەنتتە وتكەن الەمدىك چەمپيوناتىنداعى زور تابىسىنان رۋحاني قۋات العان قىزداردىڭ ارقايسىسى العاشقى كۇننەن وزدەرىنىڭ وسال جاڭعاق بولمايتىنىن كورسەتىپ جاتتى. سپارتاكيادانىڭ باس تورەشىسى ەرجان ەسپانباەۆ باستاعان تورەشىلەر توبىنا ولاردىڭ قايسىنىڭ باسىم بولعانىن انىقتاۋ وڭاي بولماسى كورىنىپ تۇر.
جارىس مامىردىڭ 21-ىندە اياقتالادى. جەڭىمپازداردىڭ ەسىمدەرىن سول كەزدە بىلەتىن بولامىز.
پەتروپاۆل
