تۇرسىنعالي ەدىلوۆتىڭ ايتۋىنشا, قازاقستان قۇراماسىنىڭ بيىلعى الەم چەمپيوناتىندا وتە جاقسى ناتيجە كورسەتتى. بىراق كوڭىل كونشىتپەيتىن تۇستار دا جوق ەمەس. بۇل رەتتە جاتتىقتىرۋشى اسا اۋىر سالماق دارەجەسىندە كۇش سىناسقان قامشىبەك قوڭقاباەۆتىڭ ونەرىنە كوڭىلى تولماعانىن جاسىرمادى.
«بۇگىنگى تاڭدا بۇل سالماقتىڭ ءفاۆوريتى باحودير جالولوۆ ەكەنى ءسوزسىز. بىراق ونى دا ۇتۋعا بولادى. قوڭقاباەۆپەن وتكىزگەن جەكپە-جەگىندە ول شارشى الاڭعا قوبالجىپ شىقتى. كۇللى وزبەكستان حالقى اسا اۋىر سالماقتاعى الىبىنان تەك التىن جۇلدە كۇتىپ وتىرعاندىقتان, جالولوۆ قازاق بوكسشىسىنان قالايدا جەڭىلىپ قالماۋدىڭ قامىن ويلادى. بۇل – پسيحولوگيالىق تۇرعىدان قوسىمشا اۋىرتپالىق جۇكتەدى. باسەكە بارىسىندا باحودير سول قولمەن تىكە سوققى جاساۋمەن عانا شەكتەلدى. باسقا ماردىمدى ەشتەڭە ىستەي العان جوق. سول ءساتتى قامشىبەك ۇتىمدى پايدالانۋى كەرەك ەدى.
ءۇشىنشى راۋندا قوڭقاباەۆ ءبىراز «تىرىلگەندەي» بولدى. جاقسى ەكى سوققى جاساعاندا, جالولوۆ قاشقاقتاي باستادى. قانداسىمىز شابۋىلىن ودان ءارى جالعاستىرۋى كەرەك ەدى. ال ول قارىمتا سوققى الىپ قالامىن با دەپ قورقىپ, جەڭىلىپ جاتسا دا, وتە ساق ءارى باياۋ قيمىلدادى. قارسىلاسىنان قايمىعىپ, ۋاقىت سوزىپ ءجۇرىپ الدى. ءبىر سوزبەن ايتساق, قامشىبەك جىگەرسىزدىك تانىتتى. سىن ساعاتتا نامىسىن قامشىلاي المادى», دەدى تۇرسىنعالي ەدىلوۆ.
قازاقستاننىڭ ەڭبەك سىڭىرگەن جاتتىقتىرۋشىسى كەلەسى جىلى پاريجدە وليمپيادا ويىندارى باستالاتىنىن ەسكە سالدى. ونىڭ پىكىرىنشە, الداعى دوداعا «وسالدىعىن مويىنداپ, ساعى سىنعان بوكسشى» قامشىبەك قوڭقاباەۆ اتتانسا, ۇلتتىق قۇراما ۇتىلىپ قالۋى مۇمكىن.
«كەلەسى جىلى پاريجدە وليمپيادا ويىندارىنىڭ الاۋى تۇتانادى. تورتجىلدىقتىڭ باستى دوداسىندا ولاردىڭ جولدارى قايتا قيىساتىنى انىق. ول كەزدە دە قوڭقاباەۆتىڭ ۇتىلاتىنىنا كۇمانىم جوق. ويتكەنى جالولوۆتان جەڭىلۋگە ونىڭ ەتى ابدەن ۇيرەنىپ قالعان. ال ولاي بولسا, الدىن الا وسالدىعىن مويىنداپ, ساعى سىنعان بوكسشىنى وليمپياداعا اپارۋدىڭ نە قاجەتى بار؟ الدە بارلىعىمىز جاراتۋشىعا «فينالعا دەيىن قوڭقاباەۆتى جالولوۆپەن جولىقتىرماسا ەكەن» دەپ جالبارىنىپ وتىرۋىمىز كەرەك پە؟ قامشىبەك قانشا جەردەن اتاقتى بوكسشى بولسا دا, ونى دەرەۋ باسقا بوكسشىمەن الماستىرۋىمىز كەرەك», دەپ تۇيىندەدى تۇرسىنعالي ەدىلوۆ.
