كۇزەت قىزمەتى كۇشەيتىلمەك

الماتىدا جەكە مەنشىك كۇزەت قىزمەتىن تارتىپتەيتىن زاڭنامانى جەتىلدىرۋدىڭ جايى اشىق ءارى بايىپتى تۇردە تالقىلاندى. بۇل جيىندى ءماجىلىستىڭ زاڭناما جانە سوت-قۇقىقتىق رەفورما جونىندەگى كوميتەتى, ىشكى ىستەر مينيسترلىگى جانە رەسپۋبليكانىڭ كۇزەت ۇيىمدارى اسسوتسياتسياسى ۇيىمداستىردى. پىكىرتالاسقا ءماجىلىس دەپۋتاتتارى, سونىڭ ىشىندە اتالمىش كوميتەتتىڭ جۇمىس توبىنىڭ جەتەكشىسى بەرىك بەكجانوۆ, ىشكى ىستەر ءمينيسترىنىڭ ورىنباسارى الەكساندر كۋلينيچ, باسقا دا مينيسترلىكتەر مەن ۆەدومستۆولاردىڭ وكىلدەرى, سونداي-اق كۇزەت قىزمەتى سۋبەكتىلەرىنىڭ باسشىلارى قاتىستى. ءبىزدىڭ ەلىمىزدە كۇزەت قۇرىلىمدارىنا ازاماتتاردىڭ ءومىرى مەن دەنساۋلىعىن, سونىمەن بىرگە زاڭدى جانە جەكە تۇلعالاردىڭ مۇلكىن زاڭسىز قول سۇعۋشىلىقتاردان سەنىمدى قورعاۋدى قامتاماسىز ەتۋگە مۇمكىندىك بەرەتىن ايتارلىقتاي تولىق نورماتيۆتىك-قۇقىقتىق نەگىز جاسالىنعان. قازىرگى ۋاقىتتا مەملەكەتتىك ەمەس كۇزەت قىزمەتىن 80 مىڭنان استام ادام اتقارۋدا. وتكەن جىلى ولار 1500-گە جۋىق قىلمىستى اشتى, مىڭداعان قۇقىق بۇزۋشىلىقتاردى انىقتادى, كوپتەگەن ءتارتىپ بۇزۋشىلار ۇستالىپ, ىشكى ىستەر ورگاندارىنا جەتكىزىلدى. دەگەنمەن, تاجىريبە قوعامدىق قاۋىپسىزدىكتى قامتاماسىز ەتۋدە بارلىق رەزەرۆتەردىڭ بىردەي ىسكە قوسىلماي وتىرعانىن كورسەتۋدە. ب.بەكجانوۆتىڭ بايانداۋىنا جۇگىنسەك, ماجىلىستە بىرقاتار زاڭ اكتىلەرىنە, سونىڭ ىشىندە ىشكى ىستەر مينيسترلىگى ازىرلەگەن “كۇزەت قىزمەتى تۋرالى” زاڭعا وزگەرىستەر مەن تولىقتىرۋلار ەنگىزۋ جونىندەگى زاڭ جوباسى تالقىلانۋدا. تالقىلاۋعا قاتىسۋشىلار جوبانىڭ كۇزەت اگەنتتىكتەرىنىڭ قۇقىقتارىن كەڭەيتە تۇسەتىن بىرقاتار ەرەجەلەرىن ماقۇلدادى. اتاپ ايتقاندا, ولارعا ليتسەنزيالارى بولعان جاعدايدا, كۇزەتتىڭ تەحنيكالىق قۇرالدارىن قۇراستىرۋمەن جانە قىزمەت كورسەتۋمەن شۇعىلدانۋعا, سونداي-اق زاڭسىز قول سۇعۋشىلىقتاردان قۇقىق شەڭبەرىندە قورعانۋ تاسىلدەرى بويىنشا اقىل-كەڭەستەر مەن ۇسىنىستار ايتۋعا مۇمكىندىك بەرىلمەك. كۇزەتشىنىڭ قۇقىعى مەن مىندەتتەرىن ايقىندايتىن نورمالار ەنگىزىلدى. دەمەك, ول ءتارتىپ بۇزۋشىلىققا كەسە-كولدەنەڭ تۇرىپ, قىلمىسكەردى ۇستاۋعا قاقىلى. وسى كەزدە وعان كۇش قولدانۋعا جانە ارنايى قۇرالداردى پايدالانۋعا رۇقسات ەتىلەدى. سونداي-اق, ول نىساننىڭ ءوزىن دە, ءارى ونىڭ توڭىرەگىندەگى اۋماقتى دا قورعاۋعا ەرىكتى. كۇزەتشىنىڭ قۇقىقتارى كەڭەيتىلىپ قانا قويماي, ونىڭ جاۋاپكەرشىلىگى دە ارتتىرىلادى. زاڭ جوباسى قابىلدانا قالعان جاعدايدا بۇل قىزمەتكە بۇرىن سوتتالعان ازاماتتار الىنبايدى, كادر ىرىكتەۋ ورايىندا باسقا شەكتەۋلەر دە ەنگىزىلمەك. كۇزەت اگەنتتىكتەرىنىڭ باسشىلارى, كۇزەت قىزمەتى سالاسىنىڭ ماماندارى وتاندىق جانە شەتەلدىك, اتاپ ايتقاندا, رەسەيلىك تاجىريبەگە سۇيەنە وتىرىپ, زاڭ جوباسىن جەتىلدىرۋ جونىندە ناقتى ۇسىنىستار ەنگىزدى. قورعانبەك امانجول, “ەگەمەن قازاقستان”.