جەزقازعان قالاسىنداعى ءبىلىم يننوۆاتسيا ليتسەيىنىڭ 11-سىنىپ وقۋشىسى سافي سوڭعى قوڭىراۋ سوعىلماي جاتىپ-اق كەلەشەكتە وقيتىن جوعارى وقۋ ورنىن انىقتاپ الدى. ول اقش-تىڭ ايوۆا شتاتىنىڭ عىلىم جانە تەحنولوگيا ۋنيۆەرسيتەتىندە اەروعارىش ينجەنەرياسى ماماندىعى بويىنشا ءبىلىم الاتىن بولدى. جاقىندا وعان وسى ۋنيۆەرسيتەتتىڭ گرانتى بەرىلەتىنى تۋرالى ارنايى حات كەلدى.
– بىرنەشە مارتە حالىقارالىق كۋرستارعا قاتىسىپ, تەست تاپسىرىپ ءجۇردىم. قازىر عالامتوردىڭ مۇمكىندىگىن پايدالانىپ الەمنىڭ كەز كەلگەن تۇپكىرىمەن حابارلاسۋعا بولادى. سوندىقتان اقش-تىڭ بەس بىردەي ۋنيۆەرسيتەتىنە ءوزىمنىڭ سول جاقتا وقىعىم كەلەتىنىن ايتىپ, حات جولدادىم. ءوتىنىشىم جەردە قالعان جوق. ولاردىڭ تاراپىنان ارنايى تاپسىرمالار بەرىلدى. ناتيجەسىندە, كانزاس ۋنيۆەرسيتەتىنەن, يلليونويس, فلوريدا تەحنولوگيالىق ينستيتۋتتارىنان جانە ايوۆا عىلىم جانە تەحنولوگيا ۋنيۆەرسيتەتىنەن شاقىرتۋ الدىم. سوڭعىسىن تاڭدادىم, – دەيدى سافي.
ونىڭ تاڭداۋىنىڭ ناق وسى ۋنيۆەرسيتەتكە ءتۇسۋى دە بەكەر ەمەس. ويتكەنى ءسافيدىڭ اكەسى امانكەلدى ءالىمجانوۆ – كەزىندە توم مەملەكەتتىك ۋنيۆەرسيتەتىنىڭ فيزيكا-تەحنيكا فاكۋلتەتىن تامامداعان ينجەنەر-فيزيك. ول عارىشكەر بولۋدى ارمانداپتى. بىراق ورايى كەلمەگەن ءتارىزدى. «اەروعارىش ينجەنەرياسىن تاڭداۋىمنىڭ تۇپكى سەبەبى وسىندا. اكە ارمانىن جۇزەگە اسىرعىم كەلەدى», دەيدى سافي.
وقۋشىنىڭ اناسى نۇرجامال ۇلىنىڭ ماتەماتيكاعا دەگەن قىزىعۋشىلىعى 5 جاسىندا بايقالعانىن ايتتى. سافي قازاق, ورىس, اعىلشىن ءتىلىن ەركىن مەڭگەرگەن. تۇرىكشەدەن دە حابارى بار.
1858 جىلى نەگىزى قالانعان ايوۆا عىلىم جانە تەحنولوگيا ۋنيۆەرسيتەتى – مەملەكەتتىك وقۋ ورنى. وسىنداي ىرگەلى ءبىلىم ورداسىنان قازاقتىڭ ءبىر قارادومالاق بالاسىنىڭ ارنايى شاقىرتۋ الۋى ۇلكەن مارتەبە. سايىپ كەلگەندە بۇل – ازاتتىعىمىزدىڭ, تاۋەلسىزدىگىمىزدىڭ جەمىسى!
جەزقازعان
