جيىندا باس پروكۋراتۋرا وكىلدەرى حالىقارالىق ساراپشىلارعا ەلىمىزدە جۇرگىزىلىپ جاتقان ازاپتاۋلارعا قارسى شارالار تۋرالى ايتىپ بەردى. اتاپ ايتقاندا, ازاپتاۋلارمەن قوسا باسقا دا قاتىگەز, ادامگەرشىلىككە جاتپايتىن نەمەسە ار-نامىستى قورلايتىن ءىس-ارەكەتتەر مەن جازالاۋ تۇرلەرىنە قارسى كونۆەنتسيادا بەكىتىلگەن قۇقىقتاردىڭ ەلىمىزدە ساقتالۋى جايىندا بايانداما جاسادى.
پرەزيدەنت جانىنداعى ادام قۇقىقتارى جونىندەگى كوميسسيانىڭ توراعاسى ي.روگوۆ باستاپ بارعان دەلەگاتسيا قۇرامىندا بىرىككەن ۇلتتار ۇيىمىنىڭ جەنەۆا قالاسىنداعى (شۆەيتساريا) بولىمشەسى جانىنداعى قازاقستان رەسپۋبليكاسىنىڭ تۇراقتى وكىلى ە.الىمباەۆ, باس پروكۋروردىڭ ورىنباسارى ب.دەمباەۆ, سونداي-اق قۇزىرەتتى مەملەكەتتىك ورگانداردىڭ وكىلدەرى بولدى.
باس پروكۋروردىڭ ورىنباسارى ب.دەمباەۆ ءوز سوزىندە پرەزيدەنتتىڭ باستاماسىمەن جۇرگىزىلىپ جاتقان كونستيتۋتسيالىق رەفورمالار, ۇلتتىق زاڭنامانى ودان ءارى جەتىلدىرۋ جانە ادام قۇقىقتارىن قورعاۋدىڭ جاڭا تەتىكتەرى تۋرالى باياندادى. بۇۇ كوميتەتىنىڭ مۇشەلەرىنە ەلدە پارلامەنتتىڭ ءرولىن كۇشەيتۋ, ارالاس سايلاۋ جۇيەسىن ەنگىزۋ, ساياسي پارتيالاردى تىركەۋ ءتارتىبىن وڭايلاتۋ, كونستيتۋتسيالىق سوت جۇمىسىنىڭ باستالعانى تۋرالى كەڭىنەن مالىمەت بەرىلدى.
سونىمەن قاتار حالىقارالىق ساراپشىلارعا ازاپتاۋعا قارسى ءىس-قيمىل جونىندەگى زاڭنامالىق جانە تاجىريبەلىك شارالار كەشەنىن ىسكە اسىرۋ تۋرالى اقپارات ۇسىنىلدى. ولاردىڭ ىشىندە پروكۋرورعا ازاپتاۋدى تەرگەۋ بويىنشا ايرىقشا وكىلەتتىكتەردى بەكىتۋ, ۇزدىكسىز بەينەباقىلاۋدىڭ جۇمىس ىستەۋى, تەرگەۋ ورگاندارىنىڭ عيماراتتارىن اشىق تەرگەۋ كابينەتتەرىمەن جاراقتاندىرۋ, ازاماتتاردى ۇستاۋ جانە جەتكىزۋ كەزىندە بەينەجەتونداردى مىندەتتى قولدانۋ سەكىلدى جۇمىس بارىسى تانىستىرىلدى.
ەلىمىزدە ازاپتاۋ سەكىلدى اۋىر قىلمىس جاساعاندارعا بەرىلەتىن جازا كۇشەيتىلدى. ماسەلەن, كامەلەتكە تولماعانداردى, جۇكتى ايەلدەردى ازاپتاۋ ءۇشىن 7 جىلدان 10 جىلعا دەيىن باس بوستاندىعىنان ايىرۋ جازاسى بەكىتىلدى. ولارعا شارتتى تۇردەگى جازا بەرىلمەيدى, راقىمشىلىق, تاراپتاردىڭ تاتۋلاسۋى جانە قىلمىستىق قۋدالاۋدىڭ ەسكىرۋ مەرزىمى قولدانىلمايدى. وسى جانە وزگە دە مالىمەتتەرمەن بولىسكەن ەلىمىزدىڭ ماماندارى بيىلدان باستاپ پەنيتەنتسيارلىق مەكەمەلەرگە مەديتسينالىق قىزمەت كورسەتۋ ازاماتتىق دەنساۋلىق ساقتاۋ جۇيەسىنە بەرىلگەنىن, بۇل دا وقشاۋلانعان ادامدارعا قاتىستى قاتىگەزدىك جانە زورلىق-زومبىلىق كورسەتۋ فاكتىلەرىن وبەكتيۆتى انىقتاۋعا ىقپال ەتەتىنىن جەتكىزدى.
جيىن بارىسىندا بۇلاردان وزگە وزەكتى ماسەلەلەر, اتاپ ايتقاندا ەكونوميكانى مونوپولياسىزداندىرۋ, وليگوپوليالارعا قارسى كۇرەس جانە زاڭسىز شىعارىلعان اكتيۆتەردى قايتارۋ بويىنشا جۇرگىزىلىپ جاتقان جۇمىستار تۋرالى ايتىلدى. سونىمەن قاتار, جۋرناليستەر مەن بلوگەرلەردى قورقىتۋ, شابۋىلداۋ جانە مۇلكىن ورتەۋ سەكىلدى وقيعالار ورىن العانى, ەلدە جۇرگىزىلىپ جاتقان رەفورمالاردىڭ بەدەلىن تۇسىرەتىن وسى قىلمىستاردى جاساعان 22 ۇيىمداستىرۋشى اشكەرەلەنگەنى مالىمدەلدى.
بۇۇ كوميتەت مۇشەلەرى ەلىمىزدىڭ ازاپتاۋعا قارسى كونۆەنتسيا تالاپتارىن ورىنداۋ بويىنشا قابىلداپ جاتقان شارالارىنا جوعارى باعا بەرىپ, ازاماتتاردى جوعارىدا اتالعان قىلمىستاردان قورعاۋدى كۇشەيتۋ بويىنشا ۇسىنىستارىن ايتتى. تاراپتار سىندىرلى ديالوگتى جانە ودان ءارى ىنتىماقتاستىقتى جالعاستىرۋ ءۇشىن ءوزارا سەنىمحات الماستى.
