بايىپتاپ قاراعاندا, بۇل سوزدە ۇلكەن ءمان-ماعىنا جاتىر. ويتكەنى قوعامداعى ءار ازامات, ەتنوستىق توپ وتكەن تاريحىن ءوزى ءومىر ءسۇرىپ جاتقان ەلدىڭ تۇتاس تاريحىنىڭ ءبىر قۇرامداس بولىگى رەتىندە ساناعاندا عانا وزدەرىن حالىقتىڭ ءبىر مۇشەسى رەتىندە سەزىنىپ, بۇگىنى مەن كەلەشەك تاعدىرىن تاۋەلسىز قازاقستانمەن بايلانىستىراتىنى انىق. بۇل رەتتە, ۇلى دالادا عۇن, ساق ءداۋىرى, تۇركى قاعاناتتارى, التىن وردا, قازاق حاندىعى سياقتى تەك تۇركى تەكتەس رۋ-تايپالاردى عانا ەمەس, ەۋرازيا قۇرلىعىنداعى ۇلتتار مەن ەتنوس وكىلدەرى مۇشەلەرىنىڭ باسىن بىرىكتىرگەن, سول ارقىلى تاريحي تاعدىر تالايى مەن ورتاق مادەنيەتى بار ەل بولىپ قالىپتاسقاندىعىن ەسكەرۋ كەرەك. مەملەكەت باسشىسى سەسسيادا «اسسامبلەيانىڭ بارلىق نەگىزگى جۇمىسى جەرگىلىكتى جەردە, ياعني حالىق اراسىندا جۇرگىزىلۋگە ءتيىس» دەپ, «توماعا-تۇيىق تىرشىلىك ەتەتىن ەتنيكالىق اۋداندار مەن كۆارتالداردىڭ پايدا بولۋىنا جول بەرمەۋدى» تاپسىردى. وسى ماقساتتا ەلدەگى تۇرىپ جاتقان ءتۇرلى جەكەلەگەن ەتنوستىق توپتاردىڭ وتكەنىن قازاقستان مەملەكەتىنىڭ تاريحىمەن تىعىز بايلانىستىرا وتىرىپ, كەشەندى شارالار ازىرلەۋ, جۇمىس جوسپارلارىن جاساۋ, بىلىكتى تاريحشى-ماماندار تاراپىنان عىلىمي جوبالار ۇيىمداستىرۋ اسا ماڭىزدى.
مەملەكەت باسشىسى ايتقانداي, بۇل جۇمىستاردىڭ بارلىعى عىلىمي تۇجىرىمدارعا نەگىزدەلۋى قاجەت. وسى رەتتە ايتا كەتكەن ءجون, 2018 جىلى پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆانىڭ تاپسىرماسىمەن «تۋعان جەر» جانە «رۋحاني جاڭعىرۋ» باعدارلاماسى كونتەكسىندە الاش يدەاسى مەن «ماڭگىلىك ەل» قۇندىلىكتارى: تاريحي تاجىريبەسى, ساباقتاستىعى جانە بولاشاعى» اتتى باعدارلامالىق-نىساندى قارجىلاندىرۋ ارقىلى عىلىمي جوبانى ىسكە اسىرعان ەدىك. جوبانىڭ عىلىمي ناتيجەلەرى: «رۋحاني جاڭعىرۋ: «ماڭگىلىك ەل» قۇندىلىقتارى جانە «الاش يدەياسى» اتتى وقۋ-ادىستەمەلىك قۇرالى مەن حرەستوماتياسى ازىرلەندى. ولاردىڭ ەلەكتروندى نۇسقالارى رەسپۋبليكانىڭ بارلىق وبلىسىنىڭ ىشكى ساياسات باسقارمالارى ارقىلى ەتنو-مادەني بىرلەستىكتەردە قولدانىسقا ەنگىزىلىپ, وڭ باعا بەرىلدى. سەسسيادا مەملەكەت باسشىسى سوڭعى كەزدەگى جانجالدار نەگىزىنەن اۋىلدىق جەردە بولاتىندىعىن, سوندىقتان شالعاي اۋىلداردىڭ تۇرعىندارى اراسىندا بەلسەندى اقپاراتتىق جۇمىس جۇرگىزۋ قاجەتتىگىن, ونىڭ وزىندە اسىرەسە, ءبىر ەتنوس وكىلدەرى شوعىرلانا قونىستانعان اۋداندارعا تىكەلەي قاتىستى ەكەندىگىن اتاپ ءوتتى.
اتالعان اۋداندارداعى ەتنوستىق توپتاردىڭ وتكەن تاريحىن قازاقستان مەملەكەتى تاريحىمەن تىعىز بايلانىستىرىپ, ناسيحاتتاۋ جانە وقىتۋ تەك ەتنو-مادەني بىرلەستىكتەردە عانا ەمەس, مەكتەپ, گيمنازيا, كوللەدج قابىرعاسىنان باستالعانى ماڭىزدى. ويتكەنى ەتنوستىق توپتاردىڭ ەل تاعدىرىمەن بىرتۇتاستىعى تۋرالى تاريحي سانا ازاماتتاردا جاس كەزىنەن ورنىقتىرۋ ادىلەتتى قازاقستانداعى ەل بىرلىگى مەن ونىڭ العا قاراي دامۋىنا ءوز ۇلەسىن قوسادى دەگەن سەنىمدەمىز.
ساتاي سىزدىقوۆ,
ۇعا قۇرمەتتى اكادەميگى
