جىل سايىن 22 ناۋرىز بەن 5 ماۋسىم ارالىعىندا وسى اكتسيانى وتكىزۋدى داستۇرگە اينالدىرعان ينسپەكتورلار رەزەرۆات اۋماعىنداعى جويىلۋ قاۋپى بار وسىمدىكتەر مەن «قىزىل كىتاپقا» ەنگىزىلگەن جانۋارلار جونىندە دارىستەر وتكىزەدى. سونداي-اق جۇرتشىلىقتى وزەن-كول ارنالارىن تازارتىپ, تۇرعىن ۇيلەر مەن مەملەكەتتىك مەكەمە اۋلالارىنا اعاشتار مەن بۇتالار, باسقا دا كوپجىلدىق وسىمدىكتەر ەگىپ, كوگالداندىرۋ جۇمىستارىنا شاقىرادى.
ەكى عاسىردان بەرى اقش پەن باتىس مەملەكەتتەرىندە ەرتە كوكتەمدە تۇراقتى تۇردە وتكىزىلەتىن «پاركتەر شەرۋى» اكتسياسىنا قازاقستان 1997 جىلى عانا قوسىلدى. «تابيعاتىڭدى تازا ۇستا!» دەگەن ۇرانمەن باستالعان جالپىحالىقتىق ءىس-شارانىڭ اۋقىمى ەل اۋماعىندا ەرەكشە قانات جايىپ, جىل سايىن وسى ءىس-شاراعا بەلسەندى قاتىساتىن ازاماتتار قاتارى كوبەيىپ كەلەدى.
ەڭ العاش رەت 1840 جىلدىڭ 22 ساۋىرىندە اقش-تا اعاش ەگۋ كۇنى رەتىندە باستالعان ءىس-شارا 1882 جىلى مەملەكەتتىڭ رەسمي مەرەكەلەرى ساناتىنا ەندى. تابيعات جاناشىرلارىنىڭ باسىن بىرىكتىرگەن اكتسيا 1970 جىلدان باستاپ «جەر كۇنى» مەرەكەسى بولىپ وزگەردى. ادامزات ءوز ءۇيى – جەردىڭ بەتىن قوقىستاردان ارىلتىپ, اعاش-بۇتا وتىرعىزۋدى ناسيحاتتايتىن 22 ءساۋىر مەرەكەسى 1990 جىلى «پاركتەر شەرۋى» بولىپ وزگەرگەن كۇنى الەمدە ءبىر مەزگىلدە ۇيىمداستىرىلعان اعاش وتىرعىزۋ اكتسياسىنا 141 مەملەكەتتەن 200 ملن ادام قاتىسقان.
ىرعىز-تورعاي مەملەكەتتىك تابيعي رەزەرۆاتىنىڭ ەكولوگيالىق اعارتۋ جانە تۋريزم ءبولىمىنىڭ باس مامانى اسەمگۇل ءابدىراحمانوۆا 22 ناۋرىزدان بەرى «پاركتەر شەرۋى» اكتسياسى ارقىلى مەكتەپ وقۋشىلارىنا ەكولوگيالىق تاربيە بەرۋ جۇمىسى قارقىندى جۇرگىزىلىپ جاتقانىن ايتادى.
ء«بىزدىڭ مەكەمە ينسپەكتورلارى مەكتەپ وقۋشىلارى اراسىندا ء«وز ەلىمدى سۇيەمىن, تابيعاتىنا باس يەمىن» تاقىرىبىندا سۋرەت سالۋ جانە ەلىمىزدىڭ كورىكتى جەرلەرى تۋرالى شىعارما جازۋ, «قۇستارعا قامقور بولايىق» جانە «قۇرالاي» قولونەر بايقاۋلارىن ۇيىمداستىردى. «قۇستارعا قامقور بولايىق» ءىس-شاراسى ءساۋىردىڭ سوڭىندا اياقتالدى. وسى كونكۋرس شارتى بويىنشا وقۋشىلار ءوز قولدارىمەن جاساعان قۇس ۇياشىقتارىن اعاش-تەرەك باسىنا ورنالاستىرىپ, سۋرەتىن الەۋمەتتىك جەلىگە سالۋعا ءتيىس بولاتىن. بىراق ونىڭ قورىتىندىسى 5 ماۋسىمدا شىعارىلادى. ال «قۇرالاي» قولونەر كونكۋرسىنىڭ شارتى بويىنشا وقۋشىلار ءارتۇرلى ماتەريالداردان اڭ-قۇستىڭ ءمۇسىنىن جاساپ, ونىڭ رەزەرۆات مەكەمەسىنە اكەلىپ تاپسىرۋى كەرەك. كيىكتىڭ بەينەسىن جاساۋعا گيپس, اعاش, ساز بالشىق, ءتۇرلى جىپتەردى قولدانۋعا بولادى. وسى ءتورت باعىت بويىنشا ۇيىمداستىرىلعان كونكۋرس قورىتىندىسى 5 ماۋسىمدا شىعارىلىپ, بالالارعا ءتۇرلى سىيلىقتار تاپسىرىلادى», دەيدى ءا.ءابدىراحمانوۆا.
بىلتىر ىرعىز-تورعاي مەملەكەتتىك تابيعي رەزەرۆاتى قىزمەتكەرلەرى «پاركتەر شەرۋى» اكتسياسى بويىنشا 78 ءىس-شارا ۇيىمداستىرىپ, وعان اقتوبە وبلىسىنان 5 مىڭ ادام قاتىسقان. تابيعاتتى لاستاماۋ, قوقىس تاستاماۋ, كوگالداندىرۋ جۇمىستارىن تۇراقتى تۇردە جۇرگىزۋ, وزەن-كولدەردىڭ بويىن تازا ۇستاۋ, بالالارعا ەكولوگيالىق تاربيە بەرۋ – وسى ىزگىلىكتى جۇمىستىڭ باستى باعىتتارىنىڭ ءبىرى.
اقتوبە وبلىسى
