كوپشىلىك اقىننىڭ ايتىستاعى وزىندىك مانەر-ماقامىن ءالى ۇمىتا قويعان جوق. شىندىقتى بۇرا تارتپاي, بەتكە تۋرا ايتاتىن اقىنىن ايتىسسۇيەر قاۋىم ءاردايىم ارداق تۇتادى.
جاقىندا قاراعاندىدا ق.ماقسۇتوۆتىڭ 60 جاسقا تولۋىنا وراي «قازاقتىڭ جوعىن جوقتادىم...» اتتى كەزدەسۋ كەشى ءوتتى. جيىنعا كەلگەندەر اقىننىڭ انىنە سۋسىنداپ, مەرەيتوي يەسىنە سارقىلماس شابىت پەن قۋات تىلەستى. كەزدەسۋدى جايىق بەكتۇروۆ اتىنداعى جاسوسپىرىمدەر كىتاپحاناسى ۇيىمداستىردى.
كەزىندە ايتىس ونەرىندە كورەرمەن كوزايىمىنا اينالعان قۋانىش ماقسۇتوۆ بۇگىندە اقىن, سازگەر, بارد. ول بارد ونەرىن بىردەن-ءبىر ناسيحاتتاۋشىعا اينالعان. قاراعاندى ايماعىندا قازاقتىڭ ۇلتتىق ادەت-عۇرىپ, داستۇرىنە قاتىستى كوپتەگەن تاعىلىمدى جوباعا مۇرىندىق بوپ كەلەدى.
«بۇل كەزەڭدە حالقىمنىڭ سەنىمىن اقتاي الدىم با, ەندى حالقىما نە بەرەمىن, مەنەن حالقىم نە كۇتەدى؟» دەگەن ساۋالدارعا جاۋاپ ىزدەپ, ءالى دە بارىمدى جۇرتىممەن بولىسۋگە ۇمتىلامىن. فيلوسوفتار ء«ومىردىڭ ءمانى – قوزعالىس» دەيدى. مەنىڭشە, ءومىردىڭ ءمانى – توقتاپ, جان-جاعىڭا زەر سالىپ, بارار باعىتىڭ مەن جۇرگەن جولىڭدى ءبىر ساراپتاپ الۋدا», دەيدى اقىن.
كەزدەسۋدە وبلىستىق ىشكى ساياسات باسقارماسىنىڭ باسشىسى نۇرلان بيكەنوۆ, قاراعاندى قالاسى ىشكى ساياسات ءبولىمىنىڭ باسشىسى نۇرجان يلياشەۆ, قاراعاندى ۋنيۆەرسيتەتى فيلولوگيا فاكۋلتەتىنىڭ دەكانى ەلدوس تۇيتە, رۋحاني اعاسى, اقتوعاي اۋدانىنىڭ قۇرمەتتى ازاماتى تۇڭعىشباي مۇقان, اقىندار مەن جىرشى-تەرمەشىلەردىڭ حالىقارالىق وداعى اتىنان اقىن ايتباي جۇماعۇل جىلى لەبىزدەرىن ءبىلدىردى. قۋانىش ماقسۇتوۆتىڭ قازاق ونەرى مەن مادەنيەتىن دامىتۋعا قوسقان ۇلەسىن تىلگە تيەك ەتتى.
بۇگىندە اقىننىڭ زياتكەرلىك باعىتتاعى ونعا جۋىق جوباسى ءساتتى ىسكە استى. «زامانداس-سوۆرەمەننيك» گازەتىنىڭ نەگىزىندە جاساعان «قازاقستاننىڭ اقپاراتتىق يندۋسترياسى» اتتى جوباسى كەزىندە جوعارى باعالانعان ەدى. جاستاردىڭ رۋحاني, مادەني, ساياسي بەلسەندىلىگىن ارتتىرۋعا ارنالعان «بالاۋسا» ادەبي-شىعارماشىلىق بىرلەستىگىن» باسقاردى. بۇدان بولەك, بۇۇ مەن يۋنەسكو-نىڭ باعدارلامالارى اياسىندا بىرقاتار جوبانى جۇزەگە اسىردى. «ماڭگىلىك مۇڭنىڭ اۋەنى» باردتىق اندەر جيناعى, «تاكاپپار مۇڭنىڭ كەربەز تامشىلارى» جىر جيناعى جارىق كورگەن.
قاراعاندى
