بولاشاق تەحنيكالىق ماماندىققا مەكتەپ جاسىنان بەيىمدەۋدىڭ بىرەگەي جولى – تەحنيكالىق سپورت تۇرلەرىمەن شۇعىلدانۋ, سوعان نازار اۋدارىپ, ونى كەڭىنەن ناسيحاتتاۋ. ال تەحنيكالىق سپورت تۇرلەرىنە كەلسەك, ول – وتە كۇردەلى ماسەلە. ەگەمەن ەل بولعالى كەڭەستىك قورعانىس سالاسىنان ەلىمىز قورعانىس مينيسترلىگىنە ەنشىلەس بولىپ قالعان بۇرىنعى دوسااف مەكەمەسى, عيماراتتارى, بازالارى مەن سپورت جابدىقتارى قىسقا مەرزىمدە جەكەنىڭ قولىنا ءوتىپ, ءوزىنىڭ باستاپقىداعى ماقساتىنان ايىرىلدى. جەرگىلىكتى اكىمدىكتەردىڭ قاراماعىنداعى سپورت جانە دەنە شىنىقتىرۋ نەمەسە ءبىلىم باسقارمالارىنا باعىنىستى تەحنيكالىق مەملەكەتتىك سپورت بولىمشەلەرى قاراعاندى, تەمىرتاۋ, قوستاناي, رۋدنىي, استانا جانە قىزىلوردا قالالارىندا عانا ساقتالعان. ەلىمىزدە اسكەري-تەحنيكالىق مەكتەپتەر بار دەمەسەڭىز, بۇل سالاعا نازار اۋدارىپ جاتقاندار ساۋساقپەن سانارلىق. سونداي-اق ولاردىڭ ماتەريالدىق بازاسى مۇشكىل حالدە. ياكي بۇل سپورت ءتۇرى ءۇش بولەك سالانىڭ جەتەگىندە بولعاننان كەيىن كەنجەلەپ قالىپ وتىر.
قازىرگى تاڭدا تەحنيكالىق جانە وندىرىسپەن بايلانىستى قولدانبالى سپورتتى دامىتۋعا نازار اۋدارعانىمىز ءجون. سونىڭ ىشىندە تەحنيكالىق, اسكەري-قولدانبالى, ءورت سوندىرۋشىلەر مەن قۇتقارۋشىلار سپورتى, بيىك عيماراتتاردى كۇتىپ, ونىڭ تەرەزەلەرىن تازالاۋعا اتسالىساتىن وندىرىستىك الپينيزم جانە ت.ب. سالاعا قاجەتتى دايىن كاسىبي ماماندار دايارلاۋ قاجەت. بۇل ماماندىقتارعا ەڭبەك نارىعىندا سۇرانىس جىلدان-جىلعا ارتىپ كەلەدى. اسكەرگە دەيىنگى دايارلىق, ازاماتتىق قورعانىس نەمەسە تەحنيكا مەن تەحنولوگيانى جەتىك مەڭگەرگەن ارنايى كۇش قۇرىلىمدارى, پوليتسيا, جەدەل جاردەم, ءورت ءسوندىرۋ تەحنيكالارىن جەتىك مەڭگەرەتىن بولاشاق مامانداردىڭ وسى تەحنيكالىق جانە قولدانبالى سپورت تۇرلەرىمەن قازىردەن باستاپ جۇيەلى شۇعىلدانعانى ابزال. ولاردىڭ جاستايىنان بالالار مەن جاسوسپىرىمدەر سپورت ۇيىرمەلەرىندە العان ءبىلىمى مەن تاجىريبەسى كەلەشەكتە قوعامعا پايدالى بىلىكتى كاسىبي مامان بولىپ شىعۋىنا كومەكتەسەرى ءسوزسىز. ال ولاردى دايارلاۋعا مەملەكەت تاراپىنان جۇمسالعان ۋاقىت پەن قاراجاتتىڭ تيىمدىلىگى دە زور بولماق.
ەلىمىزدە اۆتوموبيل جانە موتوتسيكل سپورتىمەن 2175 سپورتشى اينالىسسا, سالالى مينيسترلىك, جەرگىلىكتى اكىمدىكتەر مەن اۆتوموتوسپورت فەدەراتسياسى بىرلەسىپ, جىل سايىن 60-قا جۋىق رەسپۋبليكالىق جارىس وتكىزەدى. ونىڭ ىشىندە موتوكروسس پەن كارتينگ جارىستارى بار. كارتينگپەن التى جاستان اسقان مەكتەپ وقۋشىلارى اينالىسادى. بۇل رەتتە بالالار سەكتسياسى قوستاناي جانە قاراعاندى وبلىستارىندا جەرگىلىكتى دەنە شىنىقتىرۋ جانە سپورت باسقارمالارى قاراماعىندا بولسا, استانا, قىزىلوردا, ورال, اقتوبە قالالارىندا ءبىلىم باسقارمالارىنا قارايدى, ال وسكەمەن, شىمكەنت قالالارىندا قورعانىس مينيسترلىگىنىڭ اسكەري-تەحنيكالىق مەكتەپتەرىنە باعىنادى. ءبىر-بىرىمەن ءوزارا بايلانىس جوق ءۇش بولەك سالادا بولعان سوڭ, «اققۋ, شورتان ءھام شايان» دەمەكشى, بۇل سپورت تۇرلەرىن تولىققاندى ءارى جۇيەلى دامىتۋعا ەش مۇمكىندىك بولماي وتىر. ال ىلگەرىلەتۋگە ۇيىرمەلەردىڭ قاۋقارى جەتپەيدى.
وسى تىعىرىقتان شىعۋدىڭ جولى قانداي دەسەك, ەڭ الدىمەن, جاتتىعۋ جۇمىستارى مەن جارىستى ۇيىمداستىرۋ جۇيەسىن بىرىڭعاي سپورتتىق كۇنتىزبەلىك جوسپارمەن ءبىر ورتالىقتان ىسكە اسىرۋ ءۇشىن موتوكروسس جانە كارتينگ سپورت تۇرلەرىن جەرگىلىكتى اكىمدىكتەردىڭ سالالىق سپورت جانە دەنە شىنىقتىرۋ باسقارمالارىنىڭ بالالار مەن جاسوسپىرىمدەر سپورت مەكەمەلەرىنە نەمەسە ءبىلىم باسقارمالارىنىڭ تەحنيكالىق شىعارماشىلىق ورتالىقتارىنا بەرۋ قاجەت. سونىمەن قاتار ماتەريالدىق-تەحنيكالىق بازاسى مەن كەڭەس وداعىنان قالعان سپورتتىق قۇرال-جابدىقتار بۇگىنگى زامانعا ساي جاڭارتۋدى تالاپ ەتەدى. رەسپۋبليكا بويىنشا 159 سپورتتىق مۇكاممال (كارتينگ, موتوتسيكل) بولسا, ونىمەن قازىر 554 سپورتشى اينالىسۋدا, ياعني ءبىر تەحنيكاعا 3-4 بالادان كەلەدى. بۇل تەحنيكانىڭ جەتىسپەۋشىلىگىمەن قوسا, وسى تەحنيكالىق سپورتقا دەگەن جوعارى سۇرانىستىڭ بارىن دا كورسەتەدى. ەگەر بالالار مەن جاسوسپىرىمدەر سپورت مەكتەپتەرىنەن سەكتسيالار اشۋ قولداۋ تاپسا, ونىڭ جانىنان اۆيا جانە سۋدومودەل (كەمە ۇلگىلەۋ), روبوتتەحنيكا, راديو سپورتى, پاراشيۋت سپورتىمەن قاتار جاستاردى تەحنيكالىق سپورتقا باۋلۋدىڭ دا وڭ شەشىمى تابىلار ەدى.
نۇرپەيىس قونىسباەۆ,
اۆتوموتوسپورت جاتتىقتىرۋشىسى
الماتى
