انا مەن بالا ورتالىعى اشىلدى

جاقىندا قىزىلوردادا 200 ادامعا ارنالعان وبلىستىق پەريناتالدىق ورتالىق سالتاناتتى تۇردە اشىلدى. دەنساۋلىق ساقتاۋ نىسانى 4 قاباتتان تۇرادى. مۇندا ايەلدەر مەن جاڭا تۋعان نارەستەلەرگە نەوناتولوگيا, انەستەزيولوگيا, رەانيماتولوگيا, اكۋشەرلىك جانە گينەكولوگيا ماماندىقتارى بويىنشا قىزمەت كورسەتىلەدى. انا مەن بالا ورتالىعى جاڭا زاماناۋي مەديتسينالىق قۇرال-جابدىقتارمەن قامتاماسىز ەتىلگەن. عيماراتتا 80 توسەك تۋ بولىمىنە ارنالسا, ونىڭ 12-ءسى جەكە بوساناتىندار مەن 10-ى رەانيماتسيا بولىمىنە ارنالعان. ال جۇكتى ايەلدەر ءۇشىن 35 توسەك قاراستىرىلسا, نارەستەلەرگە 50 ورىن, گينەكولوگيا بولىمىنە 35 جاتىن ورىن بەرىلىپ وتىر. سونداي-اق, ورتالىقتا كەڭەس بەرۋ دياگنوستيكالىق ەمحاناسى دا جۇمىس جاساماق. بۇل ءوز كەزەگىندە وتباسى جوسپارلاۋ, گەنەتيك, گينەكولوگ-ەندوكرينولوگ, جاتىر موينىنىڭ پاتولوگياسى جانە تۇسىك قاۋپىنىڭ الدىن الۋعا ارنالادى. الداعى ۋاقىتتا مۇندا قولدان ۇرىقتاندىرۋ مەن گەنەتيكالىق ورتالىقتاردىڭ اشىلۋى دا جوسپاردا بار. ورتالىقتىڭ نەوناتالدى حيرۋرگياسىنىڭ دامۋى دا ءبىر جۇيەگە كەلتىرىلمەك. – ايماعىمىزدا حالىق دەنساۋلىعىن جاقسارتۋدا ىلكىمدى ىستەر اتقارىلۋدا. اسىرەسە, انا مەن بالا ءولىمىن ازايتۋعا ايرىقشا ءمان بەرىپ وتىرمىز. ناتيجە بار. ءوڭىر تابيعي ءوسىم بويىنشا رەسپۋبليكادا الدىڭعى قاتاردا تۇر. سوندىقتان مۇنداي ورتالىقتىڭ وبلىس ءۇشىن ماڭىزى زور. ەڭ باستىسى بۇل نىسان باس قالامىز استانا كۇنى قارساڭىندا پايدالانىلۋعا بەرىلدى. بۇل سىر ەلىنىڭ باس قالامىزعا تارتۋى,– دەدى وبلىس اكىمى قىرىمبەك كوشەرباەۆ. سوڭعى 2 جىلدا قىزىلوردا وبلىسىندا انا ءولىمى 30 پايىزعا, سابيلەر ءولىمى 27 پايىزعا تومەندەدى. ال 3 جىلدا وڭىردە 39 مەديتسينالىق نىسان پايدالانىلۋعا بەرىلسە, بيىلدىڭ وزىندە 18 دەنساۋلىق ساقتاۋ مەكەمەسى اشىلادى دەپ جوسپارلانۋدا. جاڭادان پايدالانىلۋعا بەرىلگەن پەريناتالدى ورتالىق انا مەن بالاعا كومەك كورسەتەتىن بارلىق ەمدەۋ, ساۋىقتىرۋ, اۋرۋدىڭ الدىن الۋ ۇيىمدارىنىڭ ۇيلەستىرۋشىسى بولادى. بۇل جەردە ماماندار دايارلانىپ, ءوزارا تاجىريبە الماسادى. – رەسپۋبليكا بويىنشا ءدال وسىنداي 21 ورتالىق بار. مۇندا جۇمىس جاسايتىن 14 نەوناتولوگ, 7 رەانيماتور ماماندار ارنايى دايارلاندى. جالپى, ەلىمىزدە بوسانۋدىڭ ورتاشا كورسەتكىشى 23,3 پايىز بولسا, سىر ەلىندە اتالعان كورسەتكىش 28 پايىزدى قۇراپ وتىر,– دەدى دەنساۋلىق ساقتاۋ مينيسترلىگىنە قاراستى «اكۋشەريا, گينەكولوگيا جانە پەريناتولوگيا» عىلىمي ورتالىعىنىڭ ديرەكتورى تالعات قۇدايبەرگەنوۆ. انا مەن بالا ورتالىعىندا 100-گە جۋىق دارىگەر قىزمەت جاساسا, 204 ورتا بۋىن جانە 193 كىشى بۋىن قىزمەتكەرلەرى جۇمىس ىستەيتىن بولادى. شتاتتىق بىرلىكتىڭ 110 ورنى اكىمشىلىك پەن شارۋاشىلىق بولىمىنە قاراستىرىلعان. ەرجان بايتىلەس, «ەگەمەن قازاقستان». قىزىلوردا.