«ۋاقىتتىڭ سىناقتارىنا قاراماستان, ايتىس ونەرى بۇگىنگى كۇنگە دەيىن قازاق حالقىنىڭ ماحابباتى مەن دەمەۋىنىڭ ارقاسىندا, سونىمەن قاتار ايتىس جاناشىرى ءجۇرسىن ەرماننىڭ 40 جىلدىق بەينەتتى, تاباندى ەڭبەگىنىڭ ارقاسىندا جوعالىپ كەتپەي جەتتى. ءتىپتى 2022 جىلدىڭ 1 تامىزىندا ايتىس اقىندارى مەن جىرشى-تەرمەشىلەر وداعى قۇرىلعان ەدى. قازىرگى تاڭدا وداق مۇشەلىگىندە 250-گە تارتا ايتىسكەر مەن جىرشى-تەرمەشى بار. وداق قۇرىلعاننان بەرى 110 حالىقارالىق جانە رەسپۋبليكالىق, 100-دەن استام وبلىستىق پەن اۋداندىق ايتىس ءوتتى. سونداي-اق جەكە كاسىپكەرلەردىڭ كومەگىمەن 5 رەت رەسپۋبليكالىق جىرشى-تەرمەشىلەر بايقاۋى ۇيىمداستىرىلعان بولاتىن. الايدا مۇنداي زور ءىس-شارالاردى جۇزەگە اسىرىپ وتىرعان وداقتىڭ ءالى كۇنگە دەيىن ءبىر تۇراقتى عيماراتىنىڭ جوقتىعى وكىنىشتى-اق. مەملەكەت تاراپىنان ايتىسقا بولىنەتىن قارجى دا وداققا بەلگىسىز سەبەپتەرمەن تولىق جەتپەيدى», دەدى ءماجىلىس دەپۋتاتى.
وسى ورايدا رينات زايىتوۆ ايتىس ونەرىنە جاڭا دەم بەرۋ ماقساتىندا كەلەسى ۇسىنىس ءبىلدىردى:
- قازاقستاننىڭ ايتىس-اقىندارى مەن جىرشى-تەرمەشىلەر وداعىنا الماتى قالاسىنان تۇراقتى عيمارات قاراستىرۋ;
- مادەنيەت مينيسترلىگى تاراپىنان ايتىس ونەرىن جۇيەلى قارجىلاندىرىپ وتىرۋ.
ارۋجان ناعاشىباي,
ل.ن.گۋميلەۆ اتىنداعى ەۇۋ ستۋدەنتى
