پاۆلودار وبلىسىنىڭ تۇرعىندارى ءۇشىن مەديتسينالىق قىزمەت كورسەتۋدىڭ قولجەتىمدىلىگى مەن ساپاسى – اسا وزەكتى ماسەلەلەردىڭ ءبىرى. بۇل كورسەتكىشتەر كادرلار تاپشىلىعى مەن ولاردى دايىنداۋ دەڭگەيىنە, مەديتسينالىق جابدىقتاردىڭ توزۋى جانە دەنساۋلىق ساقتاۋ نىساندارىن سالۋ, جوندەۋ جانە قايتا جاراقتاندىرۋ قاجەتتىلىگىنە تىكەلەي بايلانىستى.
جالپى, پاۆلودار وبلىسىنىڭ اۋرۋحانالارىنا بارلىعى 149 دارىگەر قاجەت. اسىرەسە كارديولوگ, انەستەزيولوگ, رەانيماتولوگ, جالپى تاجىريبەلىك دارىگەر, تەراپەۆت, نەۆرولوگ جانە ينفەكتسيونيست ماماندار اسا قاجەت. كەيبىر اۋدانداردا بىردە-ءبىر حيرۋرگ جوق. وتكەن جىلى دەنساۋلىق ساقتاۋ مينيسترلىگىنىڭ اتسالىسۋى ارقاسىندا وڭىرگە 96 جاس دارىگەر كەلىپ, ولاردىڭ 17-ءسى اۋىلدىق جەرلەردە جۇمىسقا ورنالاستىرىلدى. مەملەكەتتىك ءبىلىم بەرۋ تاپسىرىسى اياسىندا 2022 جىلى وبلىستا اسا قاجەتتى دارىگەرلەردى دايارلاۋعا 71 گرانت ءبولىندى, تاعى 59 دارىگەر جەرگىلىكتى بيۋدجەت ەسەبىنەن وقۋعا جىبەرىلدى.
مەديتسينالىق جابدىقتىڭ توزۋى (52%), سونداي-اق مەديتسينالىق تەحنيكامەن جابدىقتاۋ دەڭگەيى (84%) الاڭداۋشىلىق تۋعىزادى. مىسالى, ەكىباستۇزدا بىردە-ءبىر انگيوگراف جوق. وسى ماسەلەلەردى شەشۋ ءۇشىن الداعى ءۇش جىلعا 4,3 ملرد تەڭگە ءبولۋ جوسپارلانىپ وتىر.
پاۆلودار وبلىسىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2026 جىلعا دەيىن اۋىلدىق ەلدى مەكەندەردە 30 مەديتسينالىق نىسان, ونىڭ ىشىندە ەكى دارىگەرلىك امبۋلاتوريا, 23 مەديتسينالىق جانە بەس فەلدشەرلىك-اكۋشەرلىك پۋنكت سالۋ جوسپارلانۋدا. رەسپۋبليكالىق بيۋدجەت ەسەبىنەن №1 پاۆلودار قالالىق اۋرۋحاناسىنىڭ بلوكتارىن رەكونسترۋكتسيالاۋ جۇرگىزىلەدى.
«پاۆلودار وبلىسى – ەلىمىزدەگى الدىڭعى قاتارلى وبلىستاردىڭ ءبىرى, الايدا قازىرگى پروبلەمالار تۋرالى ۇمىتپاۋ كەرەك. ولاردى شەشۋ ءۇشىن ۇكىمەت وكىلدەرى كومەك كورسەتۋگە دايىن. مەديتسينالىق قىزمەت كورسەتۋ ساپاسىن ارتتىرۋ جانە وسى سالاداعى ماسەلەلەردى شەشۋ ءۇشىن وبلىستىڭ دەنساۋلىق ساقتاۋ سالاسىن دامىتۋ باعدارلاماسىن ازىرلەپ, ونى ىسكە اسىرۋ ءۇشىن قاراجات ءبولۋ قاجەت», دەدى التاي كولگىنوۆ.
ءبىلىم بەرۋ سالاسىندا ءالى دە شەشىلمەگەن ماسەلەلەر بار. پاۆلودار وبلىسىندا ءۇش اپاتتى جانە ءۇش اۋىسىممەن وقىتاتىن سەگىز مەكتەپ بار, وقۋشى ورىندارىنىڭ تاپشىلىعى – شامامەن 7 مىڭ. 273 ءبىلىم بەرۋ نىسانىنىڭ 162-ءسى كۇردەلى جوندەۋدى قاجەت ەتەدى. بۇل جاعدايدان شىعۋ ءۇشىن سەگىز مەكتەپ سالۋ جوسپارلانىپ وتىر. ولاردىڭ جەتەۋى «جايلى مەكتەپ» ۇلتتىق جوباسى بويىنشا, بىرەۋى ءبىلىم بەرۋ ينفراقۇرىلىمىن قولداۋ قورىنىڭ قاراجاتى ەسەبىنەن سالىنباق.
ودان بولەك پاۆلودار وبلىسىنىڭ 115 مەكتەبىندە ينتەرنەت جىلدامدىعى تومەن, بۇل تەحنيكالىق مۇمكىندىكتەردىڭ بولماۋى سەبەبىنەن بولىپ وتىر. بۇل ماسەلەنىڭ شەشىلۋى – ۇكىمەتتىڭ باقىلاۋىندا.
وڭىردە تۇرعىندار بالالارىن بالاباقشاعا بەرۋ ءۇشىن كەزەك كۇتەدى, قازىر 9,4 مىڭنان استام بالا كەزەكتە تۇر. وسىعان بايلانىستى 2023 جىلى 3,4 مىڭنان استام بالاعا بالاباقشا اشۋعا قاراجات ءبولىندى. اۋىلداعى كوللەدجدەردىڭ 30%-دا جابدىقتاردى جاڭارتۋ ماسەلەسى – وزەكتى. ونەركاسىپ كاسىپورىندارى وقۋ ورىندارىنا قامقورلىق كورسەتۋدە, ولاردىڭ تاپسىرىسى بويىنشا ماماندار دايىندالىپ جاتىر, سول سەبەپتى جۇمىس بەرۋشىلەر ەسەبىنەن ارنايى تەحنيكا پاركىن جاڭارتۋ جوسپارلانىپ وتىر.
«ەش جەردە وقىمايتىن جانە جۇمىس ىستەمەيتىن NEET ساناتىنداعى جاستاردىڭ ماسەلەلەرىنە ەرەكشە نازار اۋدارۋ قاجەت. جۇرگىزىلگەن ساۋالنامالار بويىنشا جۇمىسسىز جاستاردىڭ تەك 10%-ى مەملەكەتتىك قولداۋ شارالارىنان حاباردار بولىپ شىقتى. رەسپۋبليكادا جاستارعا شاعىن نەسيە بەرۋ باعدارلاماسى جۇمىس ىستەيدى, ەكىنشى دەڭگەيدەگى بانكتەرمەن بىرلەستىكتە ىسكە اسىرىلىپ جاتقان جەڭىلدەتىلگەن تۇرعىن ءۇي باعدارلاماسى جانە باسقا دا قولداۋ تەتىكتەرى بار. مۇنىڭ ءبارىن باق ارقىلى جاستارعا جەتكىزۋ قاجەت», دەدى ۆيتسە-پرەمەر.
پاۆلودار وبلىسىنا ساپارى بارىسىندا پرەمەر-ءمينيستردىڭ ورىنباسارى ەكىباستۇز قالاسىنداعى بالالار مەن جاسوسپىرىمدەرگە ارنالعان «قاينار» شىعارماشىلىق ورتالىعىنا باردى. اتالعان كەشەندە ءارتۇرلى باعىتتاعى ۇيىرمەلەر جۇمىس ىستەيدى, ولاردىڭ ىشىندە الپينيزم, ساۋلەتتىك مودەلدەۋ ۇيىرمەلەرى, ءتىپتى اننيماتسيالىق ستۋديا دا بار. مۇندا بالالار مۋلتفيلمدەر جاساپ, ولاردى دىبىستاۋعا ۇيرەنەدى.
وبلىس ورتالىعىندا ۆيتسە-پرەمەر كەڭەيتىلىپ جاتقان ش.شوكين اتىنداعى مەكتەپكە جانە كۇردەلى جوندەۋ جۇمىستارى ءجۇرىپ جاتقان №1 قالالىق اۋرۋحاناعا باردى. اۋرۋحاناعا جاڭا جابدىقتار ساتىپ الۋ جوسپارلانىپ وتىر. سونداي-اق التاي كولگىنوۆ رەسپۋبليكاداعى ۇزدىك مەديتسينالىق مەكەمەلەردىڭ قاتارىنا كىرەتىن وبلىستىق ونكولوگيالىق ديسپانسەرگە دە باردى.
