اقپاراتتار اعىنى

● قازاقستاندا 66 ملن. 840 مىڭ كىتاپ ساندىق فورماتقا كوشىرىلەدى. ونىڭ جايىن ايتىپ بەرگەن «قازاقفيلم» كينوستۋدياسىنىڭ باس رەداكتورى ديدار امانتايدىڭ مالىمدەۋىنشە, كەزىندە ەليتارلىق مادەنيەتكە اينالعان بۇل ماسەلە ەلىمىزدەگى مادەنيەت ساياساتىنىڭ تۇجىرىمداماسى ارقىلى قولعا الىنعالى جاتىر. پرەزيدەنت ن.نازارباەۆتىڭ تاپسىرماسى بويىنشا جاسالعان قۇجات ءۇش كەزەڭدە جۇزەگە اسىرىلادى. ● «استانا وپەرا» العاشقى «جىبەك جولى» حالىقارالىق فەستيۆالىن وتكىزەدى. وسىعان وراي ەلوردا تەاترىنىڭ ساحناسىندا يتاليا, فرانتسيا, قىتاي, رەسەي جانە قازاقستان وپەرا جانە بالەت جۇلدىزدارى ونەر كورسەتەدى. استانا تۇرعىندارى مەن قوناقتارى جوعارى ونەر مەرەكەسىن 17 قىركۇيەك پەن 5 قازان ارالىعىندا تاماشالاي الادى. ● شىمكەنتتە تۇراتىن جاستاردىڭ سانى 240 مىڭعا جۋىقتادى. بۇل تۋرالى «شىمكەنت جاستارى» مكم ديرەكتورىنىڭ مىندەتىن اتقارۋشى ابزالبەك ۇبەلتاەۆ مالىمدەدى. ونىڭ ايتۋىنشا,  ۇستىمىزدەگى جىلى جاستار ساياساتىنا بولىنگەن قارجىنىڭ كولەمى ۇلعايىپ وتىر. ال شىمدى شاھارداعى جاستاردىڭ 145 518-ءىن وقۋشىلار, 94 103-ءىن ستۋدەنتتەر قۇرايدى. ● قىزىلوردا عالىمدارى جەم­شوپ­تىك داقىلداردىڭ جاڭا سۇرىپتارىن شىعاردى. سىر بويىنداعى باس قالاداعى «كۇرىش شارۋاشىلىعى عزي» جشس ماماندارى قازىر تۇز بەن قۋاڭشىلىققا ءتوزىمدى جاڭا كوپ جىلدىق وسىمدىكتەر مەن جازدىق ارپا سۇرىپتارىن شىعارۋمەن اينالىسۋدا. قازىرگى تاڭدا اگراريلەر نازارى ينستيتۋتتا سەلەكتسيادان وتكەن جوڭىشقانىڭ «تۇركىستان-15» اتتى جاڭا سورتىنا اۋىپ وتىر. ● شىعىس قازاقستاندا كەمە جۇزە­تىن ءشۇلبى ءشليۋزى 2015 جىلى ىسكە قو­سى­لادى. قازىرگى كەزدە بۇل نىساندا قورعاۋشى گيدروتەحنيكالىق قۇرىلعىنىڭ نەگىزگى ەلەمەنتتەرىن قۇراستىرۋ جۇمىستارى جۇرگىزىلۋدە. وسىمەن قاتار الداعى قۇراستىرۋ ءۇشىن جابدىقتار مەن مەتالل قۇرامالارى ازىرلەنىپ جاتىر. ● كەشە قاراعاندىدا ەلىمىزدەگى ەڭ ءىرى «ارمان دوستار ورداسى» جا­تاق­­حاناسى اشىلدى. ول ءبىلىم ءجا­نە عىلىم مينيسترلىگىنىڭ «ستۋدەنتتىك باس­پا­نا» باعدارلاماسى شەڭبەرىندە سالىندى. مۇندا 822 ستۋدەنت تۇراتىن بولادى. توعىز قاباتتى جاڭا جاتاقحانا عيماراتى ۋنيۆەرسيتەت كامپۋسىندا ورنالاسقان. ● اتىراۋدا جول بويىنا 20 ملن. تەڭگەنىڭ گۇل ساعاتى ورناتىلدى. ول قالا مەن اۋەجايدى بايلانىستىراتىن اي­ماق­تاعى العاشقى تورتجولاقتى تاس جول­دىڭ وبلىس ورتالىعىنا كىرەبەرىسىنە ورنا­تىلعان. ساعاتتىڭ مەحانيزمى ۋكراينادا جاسالعان. حابارلار «قازاقپارات», BNews.kz, Alau.kz, Egemen.kz سايتتارىنىڭ دەرەكتەرى بويىنشا دايىندالدى.