باتىس قازاقستان وبلىسى زەلەنوۆ اۋدانىنىڭ پەرەمەتنوە اۋىلىنان ورتالاۋ مەكتەپتى ءبىتىرىپ, حرومتاۋدا تۇراتىن اپاسىنىڭ ۇيىندە تۇرىپ, اقتوبەدەگى مەديتسينالىق كوللەدجدە وقىپ جۇرگەن جاس قىز راحاتپەن تانىسىپ, جىگىتتىڭ وتباسىن قۇرۋ تۋرالى ۇسىنىسىن قابىل الادى. قازاق جىگىتىنە تۇرمىسقا شىعۋ تۋرالى ۇسىنىسىنا ورالداعى لاريسانىڭ اتا-اناسى دا قارسى بولماپتى. قازىر ولاردىڭ ءتورت بالاسى ەرجەتىپ كەلەدى.
ء«بىزدىڭ اۋىلداعى كورشىلەرىمىزدىڭ ءبارى – قازاقتار. كىشكەنتايىمنان قازاقشا سويلەدىم, قازاقشاعا جاقىن بولدىم. حرومتاۋدىڭ جىگىتىنە, ونىڭ ۇستىنە ءبىر وتباسىنىڭ كەنجە ۇلىنا تۇرمىسقا شىعامىن دەگەنىمدە, اتا-انام قارسى بولعان جوق. ولار «ەڭ باستىسى ءوزىڭنىڭ ادامىڭدى تاپساڭ بولدى» دەدى. راحاتتىڭ اتا-اناسى دا مەنى وتە جىلى قابىلدادى. قايىن اتام بۇرىن جولداستارىنا: «بالام ورىستان كەلىنشەك الادى, كەلىنىم ماعان ءدامدى ەتىپ بورشش ءپىسىرىپ بەرەدى» دەپ ءجيى قالجىڭدايدى ەكەن. اتام ءالى كۇنگە دەيىن وسى قالجىڭىن ۇنەمى ەسكە الىپ, ءبىزدى كۇلدىرەدى. اتام مەن ۇلكەن ەنەم اق باتاسىن بەرىپ, اعايىن-تۋىستى جيناپ, تويىمىزدى جاسادى. ەرىم – شاڭىراقتاعى جالعىز ۇل ءارى ءۇيدىڭ كەنجەسى. ءبىز بۇگىندە اتام, قايىن اپام, ۇلكەن ەنەممەن بىرگە تۇرامىز. ءوز ەنەم ومىردەن ەرتەرەك ءوتىپ كەتكەن», دەيدى لاريسا.
لاريسا وتباسىلىق ءومىردىڭ ىستىق-سۋىعىنا توزە بىلۋدەگى قاراپايىم قاعيدا – كەڭپەيىلدىلىك پەن سىيلاستىق, دەيدى.
«ەڭ باستىسى وتباسىلىق ومىردە بارلىق نارسەنى قيىنداتپاي, جەڭىل قابىلداي ءبىلۋ كەرەك. قازاق – ۇيىنەن قوناعى ۇزىلمەيتىن, اعايىن-تۋىسىمەن ارالاس-قۇرالاسى كوپ حالىق. جالپى, مەن اشىق اداممىن, ۇيگە قوناق كەلگەندى جاقسى كورەمىن. العاشقىدا ءبارى دە قىزىق بولىپ كورىنەتىن. ۇلكەننىڭ الدىنان كەسە وتپەدىم, ۇيدە اتامىزدىڭ ايتقانى زاڭ بولدى. شىنىمدى ايتسام, جاستىقتىڭ بۋىمەن باستاپقىدا ەشقانداي قيىندىقتى سەزىنبەدىم. كەيىن تۇڭعىشىمىز دۇنيەگە كەلگەندە جولداسىم ەكەۋىمىز اقىلداسا وتىرىپ, ورتاق شەشىم قابىلداۋدى ادەتكە اينالدىردىق. ۇيىمىزدە جىل سايىن ايت مەيرامىندا قوناقتار شاقىرىپ قۇران باعىشتايمىز, قىستا سوعىم سويعاندا كورشى-كولەم, اعايىن-تۋىس, اۋىلداعى ۇلكەندەردى شاقىرىپ شەكە بەرۋ ءداستۇرى ۇزىلمەي كەلەدى. جىل سايىن قىستا جىلقىنىڭ ەتىن سۇرلەپ قويامىن. ۇيدە كوبىنە ەت اسىلادى. ءبارىمىزدىڭ سۇيىكتى تاعامىمىز – ەت. قازاق كەلىنى سالت-ءداستۇردى ءسىڭىرىپ جەتىلۋى كەرەك. ءدىلناز, اسەم, اسحات, راسۋل ەسىمدى بالالارىمىز بار. ۇيدە ءبارىمىز تەك قازاقشا سويلەسەمىز», دەيدى لاريسا وتباسىلىق ءومىرى جايىندا.
جالپى, لاريسا تۇراقتىلىقتى ۇناتادى. وقۋ ءبىتىرىپ, تۇرمىسقا شىققاننان كەيىن ءدوڭ تاۋ-كەن بايىتۋ كومبيناتىنىڭ «ەۋرازيا» مەديتسينالىق ورتالىعىندا, ودان كەيىن دە وندىرىستىك تسەحتاردا مەدبيكە بولىپ جۇمىس ىستەدى. ءبىراز جىل بۇرىن ماماندىعىن وزگەرتتى. دەكرەتتىك دەمالىستان شىققان سوڭ وعان وسى كاسىپورىننىڭ ەلەكتر تسەحىنا جۇمىسقا كىرۋ تۋرالى ۇسىنىس تۇسكەن. وسى ماماندىققا قايتا وقىپ, تاجىريبەدەن ءوتىپ, ەلەكتر مونتەرى بولىپ جۇمىسقا كىردى. جۇبايى راحات 25 جىل كومبيناتتا شاحتەر بولىپ جۇمىس ىستەپ, بۇگىندە بريگاديرلىككە اۋىستى. ۇجىمدا ءتۇرلى ۇلت وكىلدەرى جۇمىس ىستەيدى ەكەن. ولاردىڭ ءبارى ءبىر-بىرىمەن جاقسى سىيلاستىقتا.
لاريسا وتباسىلىق ءومىردى ەندى باستاعالى جاتقان جاستارعا «ەڭ اۋەلى جۇرەكتىڭ قالاۋىن تىڭداۋ كەرەك» دەيدى. وسى ويى ماماندىق تاڭداۋعا دا قاتىستى: «سول كەزدە بارلىعى ءبىر-بىرىمەن ۇيلەسىم تاۋىپ, ادام ماعىنالى ءومىر سۇرەدى. وتباسىندا بارلىعى جاقسى بولسا, ءوزىڭ دە, جان-جارىڭ دا جۇمىسىندا الاڭسىز جۇرەدى. الاڭسىز ەڭبەك – قاۋىپسىز ەڭبەكتىڭ العىشارتى. اسىرەسە, بۇل وندىرىستە وتە ماڭىزدى», دەپ وي تۇيەدى ونەگەلى شاڭىراقتىڭ ۇيىتقىسى بولىپ وتىرعان انا.
اقتوبە وبلىسى
