كەگەن اۋدانىنان ىرگەسى اجىراپ, قايتا قالپىنا كەلگەنىنە بەس جىل تولعان رايىمبەك اۋدانىندا بۇگىنگە دەيىن بىرقاتار الەۋمەتتىك, سپورتتىق-مادەني نىساندار بوي كوتەرىپ, حالىقتىڭ يگىلىگىنە بەرىلىپ جاتىر. تۇمسا تابيعاتى قانداي كوركەم بولسا, شەكارا شەبىندەگى حالىقتىڭ ءال-اۋقاتى مەن تۇرمىس-تىرشىلىگى دە كوز سۇيسىنەر كۇيدە بولۋى اسا ماڭىزدى. مامىراجاي مامىر مەرەكەلەرىنە ورايلاستىرىلا تۇساۋى كەسىلگەن يگىلىكتى شاراعا رايىمبەك اۋدانىنىڭ اكىمى بەرىك دۇيسەنباەۆ پەن اۋداندىق ءماسليحات توراعاسى سامات مۇسىرباەۆ باستاعان يگى جاقسىلار مەن جايساڭدار قاتىسىپ, تۇرعىنداردى قۋانىشتارىمەن قۇتتىقتادى.
ەكىنشى دۇنيەجۇزىلىك سوعىستىڭ قۇرباندارىنا ارنالعان ەڭسەلى ەسكەرتكىشكە گۇل شوقتارىن قويىپ, رۋحىنا تاعزىم ەتۋدەن باستالعان ءىس-شارادا جىرشى, تەرمەشى سەرىك ءابدىرايىموۆ جىردان شاشۋ شاشتى.
«بۇگىنگى مادەنيەت ۇيىنەن بولەك, قىزىلشەكارا, سۇمبە اۋىلدارىندا زاماناۋي شاعىن سپورت كەشەندەرى سالىنىپ جاتىر. ەل يگىلىگىنە بەرىلەر ۋاقىتى الىس ەمەس. سونىمەن بىرگە قايتا تۇلەگەن اۋدانىمىزدىڭ جامبىل اۋىلىندا مادەنيەت ءۇيى سالىندى. قاقپاق اۋىلىنداعى مادەنيەت ءۇيى كۇردەلى جوندەۋدەن وتكىزىلدى. الداعى جىلدارى شالكودە, سارىجاز, تەگىستىك اۋىلدارىنان جاڭادان مادەنيەت عيماراتتارى بوي كوتەرەتىن بولادى», دەدى سالتاناتتى جيىندا ءسوز العان اۋدان اكىمى ب.دۇيسەنباەۆ.
اۋداندىق اقساقالدار كەڭەسىنىڭ توراعاسى, قازاقستاننىڭ ەڭبەك سىڭىرگەن جاتتىقتىرۋشىسى, الماتى وبلىسىنىڭ قۇرمەتتى ازاماتى بەكبولات بىرباەۆ اقجارما تىلەگىن ارنادى. ءىس-شارا بارىسىندا تۋعان جەرگە تۋىن تىگىپ, سۇمبەنىڭ الەۋمەتتىك جاعدايىن جاقسارتۋعا بارىن سالىپ جۇرگەن اتپال ازامات تىلەك يۋسۋپوۆقا ايرىقشا قۇرمەت كورسەتىلدى.
شەكارا شەتىندەگى اۋىلدىڭ اجارىن اشقان مادەنيەت ءۇيىنىڭ قۇرىلىسىنا بيۋدجەتتەن 475 ملن تەڭگە ءبولىنىپ, يگەرىلگەن. 180 ورىندى ونەر ورداسىنا 4 شتات بىرلىگى بولىنگەن. اۋىل مادەنيەتىن كوتەرىپ, ونەرىن ورىستەتەتىن بۇل عيماراتتا الداعى ۋاقىتتا ءتۇرلى ۇيىرمەلەر اشىلىپ, جۇمىسىن باستايتىن بولادى.
الماتى وبلىسى
