ءمولدىر بۇلاق

«نۇر وتان» پارتياسى, قالا اكىمدىگى, «ارس» پروديۋسەرلىك كومپانياسى مەن «ەۋرازيا» ءبىرىنشى ارناسىنىڭ ۇيىمداستىرۋىمەن وتكەن «ايالاعان استانا» بالالار تەلەۆيزيالىق مۋزىكالىق بايقاۋى ءوز مارەسىنە جەتتى. الامان بايگەدە وزىپ شىققان مۇحاممەدالي جۇگىنىسوۆ ەندىگى كەزەكتە قازاقستاننىڭ اتىن «دەتسكايا نوۆايا ۆولنا» بايقاۋى ارقىلى الەمگە تانىتادى دەگەن سەنىم بار.  جاقىندا «ەۋرازيا» ارناسىنىڭ تىكەلەي ەفيرىنەن «ايالاعان استانا» تەلەۆيزيالىق مۋزىكالىق بالالار بايقاۋىنىڭ اقتىق سىنى كورسەتىلگەن بولاتىن. فينالدا قازاقستاننىڭ ءار ايماعىنان جينالعان 17 دارىن يەسى ەرەكشە قويىلىمدارىمەن كوپشىلىك الدىندا ونەر كورسەتتى. بالالار الدىنا اۋەلى بايقاۋدا وزىپ شىعۋدى, ءسويتىپ, 1 ميلليون تەڭگەنى قانجىعاعا بايلاۋدى ماقسات ەتىپ قويعان ەدى. بۇل مەجە ورىندالدى. ەندىگى شىڭ «دەتسكايا نوۆايا ۆولنا» سايىسىنىڭ بيىگىن باعىندىرۋ, قازاقستاندى تانىستىرۋ بولىپ تابىلادى. تەلەۆيزيالىق شوۋدا جاس ونەر­پازدار رۋسلان بوتاباەۆ باستاعان «Zaratushtra Band» وركەسترىمەن جاندى داۋىستا ءان شىرقادى. كەيبىر قاتىسۋشىلار دۋەتتە, ەندى ءبىرى تريودا ونەر كورسەتتى. جالپى كونتسەرتتىك باعدارلاماعا 12 قويىلىم ازىرلەندى. «بالالىق شاقتىڭ ءانۇرانى» اتتى بايقاۋدىڭ العاشقى كۇنى قا­تى­سۋشىلار بالالار اندەرى رەپەر­تۋارىنان مۋزىكالىق شىعار­ما­لار ورىنداسا, ەكىنشى كۇنى ايگى­لى مۋلت­فيلمدەردەگى الەمدىك حيت­تەر­دى, ال «اتامەكەن» اتتى قورى­تىن­دىدا بالعىن انشىلەر استاناعا, بارشا قازاقستاندىقتارعا ارناپ ءان سالدى. حالىقارالىق قازىلاردىڭ شەشىمى مەن تىكەلەي ەفيردەن SMS ارقىلى داۋىس بەرۋدىڭ ءناتي­جەسى بويىنشا ەلوردالىق مۇحاممەدالي جۇگىنىسوۆ «ايالاعان استانانىڭ» جەڭىمپازى اتاندى. ول بايقاۋدىڭ ءۇش كۇنگى ناتيجەسىندە دە قاتارلاستارىنان وق بويى وزىق كورىنىپ, قازىلار القاسىنىڭ ەڭ جوعارى باعاسىنا يە بولدى. ايتا كەتۋ كەرەك, ەرەكشە داۋىس يەسى بيىل قازاقستاندى «دەتسكايا نوۆايا ۆولنا» بايقاۋىندا تانىستىرماق. باقىتتى ءساتىن ىركە الماي جانارىنا جاس تۇنعان ورەن: «مەنىڭ ارمانىم «دەتسكايا نوۆايا ۆولنا» بايقاۋىنا قاتىسىپ قويۋ عانا ەمەس, الەمدىك ەسترادانىڭ جارىق جۇلدىزى اتانعان مايكل دجەكسون سەكىلدى جانە ءوزىمنىڭ تۋعان اعام رۇستەم جۇگىنىسوۆ سياقتى اتاقتى ءانشى بولۋ», – دەيدى. ونەر سايىسىنىڭ ءبىرىنشى ءجۇل­دەسى – ورال قالاسىنان كەلگەن دانيا يشانقۇلوۆانىڭ, ەكىنشى ورىن – «بالاپاندار» تريوسىنداعى لۋيزا نۇرقۋاتوۆا (اقتاۋ), الديار ورەكەن (ەكىباستۇز), جانايكەرىم وتەگەنوۆانىڭ (قوستاناي), ال ءۇشىنشى جۇلدە الماتىلىق ياسمين ءماجيتوۆانىڭ ەنشىسىنە ءتيدى. بۇعان قوسا, د.يشانقۇلوۆا كورەرمەندەر كوزايىمىنا اينالدى. استانا قالاسى اكىمدىگىنىڭ ارنايى سىيلىعى پاۆلودار قالاسىنىڭ نامىسىن قورعاپ كەلگەن ناستيا پەرشيكوۆاعا بۇيىردى. ال, سىر ەلىنىڭ ساڭلاعى دياس ومار «نۇر وتان» پارتياسىنىڭ سىيلىعىنا يە بولدى. ەسكە سالا كەتەيىك, العاش رەت بۇل جوبا بىلتىر جۇزەگە اسقان بولاتىن. ىرىكتەۋ كەزەڭىندە قازاقستاننىڭ 16 قالاسىنان 8 بەن 12 جاس ارالى­عىنداعى 1000-عا جۋىق دارىندى بالا باق سىنادى. ءاندى سۇيەتىن, ساحنادا ونەر كورسەتۋدى ارماندايتىن بالالار ءۇشىن بۇل ناعىز مەرەكەلىك تارتۋ بولدى دەسەك, قاتەلەسپەيمىز. تورعىن ءابۋشاحمان.