بوكسشىلاردىڭ بيىگى جۇلدەمەن ولشەنەدى

الماتىدا بوكستان ەرەسەكتەر اراسىندا وتكەن قازاقستان رەسپۋبليكاسى پرەزيدەنتىنىڭ كۋبوگى IV حالىقارالىق تۋرنيرىندە قازاقستان قۇراماسى 7 التىن, 4 كۇمىس جانە 6 قولا مەدال يەلەنىپ, كوماندالىق ەسەپتە تۋرنير جەڭىمپازى اتاندى. بۇل باسەكەدە ءبىزدىڭ بوكسشىلار اراسىندا العاشقى جۇلدەنى 49 كيلو سالماق دارەجەسىندە كۇش سىناسقان ءبىرجان جاقىپوۆ جەڭىپ الدى. ول  فينالدا وزبەكستاندىق حاسانباي دۋسماتوۆپەن  كەزدەسىپ, قارسىلاسىن 2:1 ەسەبىمەن ۇتتى. ءسويتىپ, ءبىرجان وسى جەڭىسىنەن كەيىن ءتۋرنيردىڭ ءۇش دۇركىن جەڭىمپازى اتاندى. كەلەسى 52 كيلو سالماق دارەجەسىندە ءىلياس سۇلەيمەنوۆ قولا جۇلدەنى قاناعات تۇتتى. ال فينالدىق ايقاس فيليپپيندىك رەي سالۋدار مەن وزبەكستاندىق بوكس­شى شاحوبيددين زويروۆتىڭ اراسىندا ءوتتى. بۇل كەزدەسۋدە سوڭعىسىنىڭ مەرەيى ۇستەم بولدى. وزبەك بوكس­شىسى ءۇش راۋند بويى قارسىلاسىنا قاراعاندا جاقسى ونەر كورسەتىپ, سوڭعىسىندا, ءتىپتى, باس كوتەرۋگە مۇمكىندىك بەرمەدى. ەسەپ – 2:1 زويروۆتىڭ پايداسىندا. وسىلايشا, وزبەكستان قۇراماسى 1 التىن, 1 كۇمىس, 4 قولا مەدالعا يە بولدى. 56 كيلو سالماقتاعى بوكسشىلاردىڭ فينالدىق ايقاسى تا قىزىقتى جانە تارتىس­تى ءوتتى. بۇل جەكپە-جەككە ءبىزدىڭ بوكسشىلار شىقتى.  23 جاستاعى قايرات ەراليەۆ پەن 20 جاستاعى جانبولات تىلەگەن ۇلى ەكەۋى ءوزارا مىقتىنى انىق­تادى. كەزدەسۋدە قايرات ءوزىنىڭ تاجىريبەسىن كورسەتىپ, وتانداسىنان ايلاسىن اسىرىپ كەتتى. قورىتىندى ەسەپ – 3:0. قايرات ءوزى كوپتەن بەرى كۇتكەن التىن مەدالدى يەلەندى. 60 كيلودا  اسكەري قىزمەتشىلەر ارا­سىنداعى الەم چەمپيونى بەرىك ءابدىراحمانوۆ فيليپپيندىك چارلي سۋارەس­پەن قولعاپ ءتۇيىستىردى. بۇل كەزدەسۋدە بەرىك ءبىر رەت نوكداۋنعا ءتۇسىپ قالدى. بىراق ارتىنشا وزىنە ءوزى تەز كەلىپ, نامىسقا تىرىسىپ, فيليپپيندىكتەن 2:1 ەسەبىمەن باسىم ءتۇستى. 64 كيلودا ءبىزدىڭ بوكسشىلار فينالعا شىققان جوق. بۇل سالماقتا  تايلاندىق ۆۋتتيچاي ماسۋك كۋبالىق لۋيس وليۆا گەنەرمەن كەزدەسىپ, 2:1 ەسەبىمەن جەڭىسكە جەتتى. ال 69 كيلودا ءبىرىنشى ءنومىرلى كوماندانىڭ بوكسشىسى دانيار ەلەۋسىنوۆ قازاقستان قۇراماسىنىڭ ءۇشىنشى ءنومىرلى كومانداسىنىڭ وكىلى ساعادات راحمانقۇلوۆپەن كەزدەستى. بوكستان 2013 جىلعى الەم چەمپيونى ءوز تاجىريبەسىنىڭ ارقاسىندا ساعاداتتان 3:0 ەسەبىمەن باسىم ءتۇستى. كەلەسى, 75 كيلو سالماق دارەجەسىندە تاعى ءبىر 2013 جىلعى الەم چەمپيونى جانىبەك ءالىمحان ۇلى ۋكراينالىق دميتري ميتروفانوۆپەن كەزدەسكەن بولاتىن. بۇل ايقاستا جانىبەك ۋكراينالىق بوكسشىنىڭ بەلسەندىلىگىنىڭ ارقاسىندا جەڭدى دەسە بولادى. ەسەپ – 3:0. 81 كيلو سالماقتاعى بوكسشىلار كەزدەسۋىنە تاعى دا وتانداستارىمىز شىقتى. وندا وليمپيادانىڭ كۇمىس جۇلدەگەرى ادىلبەك نيازىمبەتوۆ داۋرەن ەلەۋسىنوۆپەن قولعاپ ءتۇيىستىردى. بۇل جەكپە-جەكتە ادىلبەك دانيار ەلەۋسىنوۆتىڭ اعاسىن 3:0 ەسەبىمەن تىزە بۇكتىردى. ءسويتىپ, ءبىراز ۋاقىت بويى كوپتەگەن جارىستاردا ۇنەمى كۇمىس مەدال الىپ, التىن جۇلدەنى الا الماي كەلە جاتقان نيازىمبەتوۆ جەڭىمپاز اتاندى. 91 كيلودا انتون پينچۋك كۋبالىق بوكسشى لۋيس كوردوۆا حەريحتەن جەڭىلىپ قالدى. باسقا ايتار ءسوزىمىز جوق. بۇل ايقاستا «بوستاندىق ەلىنىڭ» بوكسشىسى بارلىق جاعىنان مىقتى ەكەنىن كورسەتتى. ال ەڭ اۋىر سالماق دارەجەسىندە (+91 كگ) يۆان دىچكو پينچۋكتىڭ ەسەسىن قايتارىپ الدى. ول كۋبالىق بوكسشى يوراندي تويراكا ورتەگانى  3:0 ەسەبىمەن ۇتتى. ءۇشىنشى راۋند­تا قارسىلاسىن ءبىر رەت نوكداۋنعا دا جىبەرىپ ۇلگەردى. قورىتا ايتقاندا, اتالعان تۋرنير جازعى ازيا ويىندارىنا ۇلتتىق قۇرامانى پىسىقتاپ, ىرىكتەۋ ەسەبىندە ءوتتى. ەندى باس جاتتىقتىرۋشى مىر­زاعالي ايتجانوۆتىڭ كومانداسى 19 قىركۇيەك پەن 4 قازان ارالىعىندا كورەيانىڭ ينچحون قالاسىندا وتەتىن ازياداعا دايىندىعىن ودان ءارى جالعاستىرادى. سودان كەيىن كوپ ۇزاماي كوماندا ازيا ويىندارىنا باراتىن بوكسشىلاردىڭ ءتىزىمىن جاريالايدى. داستان كەنجالين, «ەگەمەن قازاقستان».