ءان اۋەنى الديلەپ...

“ايتشى جانىم, قايدان كەلدىڭ, سەمەي, جامبىل, الماتى ما, الدە شىمكەنتتەن بە ەدىڭ. قىزىلوردا, گۋرەۆ, ورال, قوستانايدىڭ كوگىنەن بە, الدە اسەم قازاق قىزى, دارحان تورعاي جەرىنەن بە؟” – ءانشى-سازگەر باقىتجان ساۋەكەنوۆتىڭ كوكشەلىك لايىق شالدىباەۆتىڭ سوزىنە جازعان قازاقتىڭ قىزىنا دەگەن قۇرمەتى ءسوزى مەن اۋەنىنەن بىردەي ەسىلگەن “قازاق قىزى” ءانىنىڭ جەر-جەردە شىرقالىپ جۇرگەنىنىڭ تالاي كۋاسى بولدىق. جۋىردا استاناداعى بەيبىتشىلىك پەن كەلىسىم سارايىندا قوستاناي وبلىسىنىڭ مەڭدىعارا اۋدانىندا اۋىل مادەنيەتىن كوتەرۋگە ءوز ۇلەسىن قوسىپ جۇرگەن ءانشى-سازگەر قر ەڭبەك سىڭىرگەن مادەنيەت قىزمەتكەرى باقىتجان ساۋەكەنوۆتىڭ شىعارماشىلىق كەشى ءوتتى. استانا قالاسى مەملەكەتتىك فيلارمونياسىنىڭ نۇرلان حامزين جەتەكشىلىك ەتەتىن “سارىارقا” ءانسامبلىنىڭ سۇيەمەلدەۋىمەن كەش بويىندا شىرقالعان اندەردىڭ دەنى تۋعان جەرگە, وعان دەگەن پەرزەنتتىك ماحابباتقا, سىر مەن سازعا تولى بولدى. ساراي ىشىندە بوس ورىن قالدىرماي لىق تولعان كورەرمەن, ساحناعا شىققان ءاربىر ونەر يەسىن كەمەردەن اسقان قوشەمەتىنە بولەگەن. باقىتجان ساۋەكەنوۆتىڭ تۇمانباي مولداعاليەۆ, سەرىك تۇرعىنبەكوۆ, تاڭاتقان ساتباەۆ, حاميتبەك مۇساباەۆ, عالىمبەك ابىلقايىروۆ سوزدەرىنە جازعان اندەرىن قازاقستاننىڭ ەڭبەك سىڭىرگەن ءارتىسى عازيزا جۇمەكەنوۆا, ونەردەگى دە, ومىردەگى دە دوسى قر ەڭبەك سىڭىرگەن مادەنيەت قىزمەتكەرى قاليبەك دەرىپسالدين ورىنداعاندا جۇرتشىلىق الاقاندارى قىزعانشا قول سوقتى. ال كەشتىڭ بەتاشارىن ايتىس اقىنى ايبەك قاليەۆ اشتى. استانالىق كورەرمەن قاۋىم نازارىنا سونداي-اق, بىرقاتار قوستانايلىق, ونىڭ ىشىندە مەڭدىعارالىق ونەرپازدار سازگەر اندەرىنەن سىي ۇسىندى. ب. ساۋەكەنوۆتىڭ ونەرگە باۋلىعان شاكىرتى, الماتى كونسەرۆاتورياسىنىڭ ستۋدەنتى ميراس قينياروۆ مەڭدىعارالىق اقىن مىرزالى وڭايباەۆتىڭ سوزىنە جازىلعان كەش يەسىنىڭ استاناعا ارنالعان “بايتەرەك” ءانىن اۋەلەتە شىرقادى. ءشامشى قالداياقوۆ اندەرىنە ارنالعان بايقاۋدىڭ جەڭىمپازى جاناتبەك قادىروۆ پەن ازامات مۇقاتوۆ, جانۇزاق ايساعاليەۆ ورىنداعان سازگەر شىعارمالارىن انسۇيەر قاۋىم وتە جىلى قابىلدادى. “تۋعان جەر تورعايىم” اتتى بۇل ونەر كەشىنىڭ كوپشىلىك كوڭىلىنەن شىعۋىندا جۇرگىزۋشى جاسۇلان ايساعاليەۆتىڭ دە ەڭبەگىن اتاعان ورىندى. “قوستاناي وبلىسىنىڭ مەڭدىعارا اۋدانىنا بيىل 80 جىل. سونىڭ 60 جىلىندا اۋدان مادەنيەتىنە, ونداعى ءداستۇرلى ونەرگە ەش كوڭىل بولىنبەپتى. بۇگىنگى كورىپ وتىرعاندارىڭىز تاۋەلسىزدىكتىڭ جەمىسى. ەل ەكونوميكاسى دۇرىستالعان سايىن اۋىل مادەنيەتىنە كوڭىل كوبىرەك بولىنە تۇسۋدە. سونىڭ ايعاعى – اۋىل ونەرپازدارىنىڭ استانا تورىندە ونەر كورسەتۋى. مەڭدىعارا تاريحىندا تۇڭعىش رەت مادەنيەت ءمينيسترىنىڭ بۇيرىعىمەن ەكى ونەر توبىنا “حالىقتىق ۇجىم” اتاعى كۇنى كەشە بەرىلدى. بىرى–ساۋەكەنوۆ باسقاراتىن “دومبىرا سازى” فولكلورلىق-ەتنوگرافيالىق ءانساملى دە, ەكىنشىسى – “جۇلدىز” بي ۇجىمى. وسى بيىككە كوتەرىلۋدە كەش يەسىنىڭ ۇلەسى مول”, دەدى مەڭدىعارا اۋدانى اكىمىنىڭ ورىنباسارى ساڭكىباي كيىكباەۆ كونتسەرت سوڭىندا. كوپشىلىك اتىنان سازگەرگە دەگەن قۇرمەتىن ارداگەرلەر كەڭەس اۋباكىروۆ, كارىمجان بەكبولاتوۆ, امىربەك قاپاقوۆ جەتكىزسە, شىعارماشىل ورتا اتىنان اقىن سەرىك تۇرعىنبەكوۆ ءبىلدىردى. انار تولەۋحانقىزى, “ەگەمەن قازاقستان”.