بايقاۋ سىناعى وقۋعا تۇسۋشىلەرگە ۇبت-عا دايىندالۋعا كومەك رەتىندە ازىرلەندى.
تالاپكەرلەرگە ۇتو سايتىندا https://prob-ent.testcenter.kz/ سىلتەمەسى بويىنشا تەگىن ونلاين تەستىلەۋدەن ءوتۋ مۇمكىندىگى قاراستىرىلعان. ول ءۇشىن تەستىلەنۋشىلەرگە تەك جسن تەرىپ, بەيىندىك پاندەردىڭ كومبيناتسياسىن تاڭداپ, بايقاۋ سىناعىنا كىرىسۋ قاجەت.
«وقۋ جىلىنىڭ باسىنان باستاپ تەگىن ونلاين تەستىلەۋ 1,5 ملن رەت تاپسىرىلعان. اتاپ وتسەم, بۇل جاتتىعۋ تەستىن ءبىز قازان ايىندا ىسكە قوسىپ, جەلتوقساندا سۇراقتار بازاسىن جاڭارتقان ەدىك. وسى جولى بالالاردىڭ ماڭىزدى ەمتيحانعا دايىندىعىن جاقسارتۋ ءۇشىن تاعى دا بىرنەشە نۇسقا قوسۋ تۋرالى شەشىم قابىلدادىق», دەپ اتاپ ءوتتى قر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
ەسكە سالا كەتسەك, 14 مامىرعا دەيىن نەگىزگى ۇبت-عا ءوتىنىش قابىلداۋ جۇرگىزىلۋدە. تەستىلەۋدىڭ ءوزى 16 مامىر مەن 5 شىلدە ارالىعىندا وتەدى. تالاپكەرلەر ۇبت-نى 2 رەت تاپسىرىپ, ەڭ جاقسى ناتيجەمەن گرانت كونكۋرسىنا قاتىسا الادى.
تالاپكەرلەردىڭ نەگىزگى ۇبت-عا دايىندىعىن جاقسارتۋ ماقساتىندا وتكەن جىلى ءار ءپان بويىنشا جەكە تاقىرىپتىق تالداۋ ەنگىزىلدى. ياعني, ءار ۇبت-دان كەيىن (قاڭتار, ناۋرىز) تۇلەكتەرگە جەكە تاقىرىپتار بويىنشا بىلىمدەرىن ارتتىرۋ ۇسىنىلادى. سونىمەن قاتار, نەگىزگى ۇبت-نىڭ ءبىرىنشى مۇمكىندىگىن تاپسىرعاننان كەيىن ولار ەكىنشى مۇمكىندىككە دەيىن دايىندىقتارىن جاقسارتا الادى.
ء«بىلىم بەرۋ ورتالىقتارىمەن بىرلەسىپ, تەگىن ونلاين ساباقتاردى جالعاستىردىق. ال وقۋ جىلىنىڭ باسىندا ۇتو سايتىندا تەست تاپسىرمالارى قۇراستىرىلعان ادەبيەتتەر ءتىزىمى مەن تەست جوسپارى; «قازاقستان تاريحى» جانە «دۇنيەجۇزى تاريحى» پاندەرى بويىنشا 100 تاريحي داتا ءتىزىمى; «ينفورماتيكا» پانىنەن تەرميندەر ءتىزىمى; «قازاق ادەبيەتى» جانە «ورىس ادەبيەتى» بويىنشا ادەبي شىعارمالار ءتىزىمى جاريالاندى. دايىندىق ساپاسىن جاقسارتۋ ءۇشىن وسى جانە باسقا دا قابىلدانعان شارالار تۇلەكتەرىمىزگە تەستىلەۋدە جوعارى ناتيجە كورسەتۋگە كومەكتەسەدى دەپ ۇمىتتەنەمىز», دەدى رۋسلان ەمەلباەۆ.
