جوعارى وقۋ ورنىنىڭ كىتاپحاناشىلارى, بيبليوگرافتارى – ستۋدەنتتىڭ جاڭا ءومىر باسپالداعىن باستاۋداعى ەڭ ءبىرىنشى مۇعالىمى, زەرتتەۋشىسى ءارى وقىرمان مەن باسپا باسىلىمدارى اراسىنداعى ساراپشىسى. ءار كىتاپحانانىڭ ءوز ءتارتىبى بار. ولار وزگەلەردىڭ تاجىريبەسىن ءاردايىم كوشىرە بەرمەيدى.
اقپاراتتىق تەحنولوگيالاردىڭ قارىشتاپ دامۋى بارلىق سالاعا دەرلىك ءوز ىقپالىن تيگىزگەنى انىق. ونىڭ قاتارىندا كىتاپحانا سالاسى دا بار. اقپاراتتىق رەسۋرستاردىڭ جاھاندىق جۇيەسى كىتاپحانانىڭ ىشكى جۇمىس ۇدەرىستەرىن ىسكە اسىرۋعا (كىتاپحانا كورسەتكىشتەرىن دايىنداۋعا, كاتالوگ سيپاتتامالارىن دالەلدەۋگە, ادەبيەتتەردى ىرىكتەۋگە جانە تولىقتىرۋعا, وقىرمان سۇرانىسىن ورىنداۋعا) مۇمكىندىك بەرەدى. سونىمەن قاتار كىتاپحانا فاكۋلتەتتەرى قازىرگى تەحنيكاعا ساي جۇمىس ىستەي الاتىن ارناۋلى مامان يەلەرىن دايارلاپ, كىتاپحانا قىزمەتكەرلەرىنىڭ كوزقاراسىن بۇگىنگى زامان تالابىنا ساي وزگەرتۋگە ءتيىس.
قازىرگى تاڭدا كىتاپحانالارعا زاماننان قالىس قالماي, جاڭا ترەندتەر مەن ۇردىستەردى قىزمەتىنە ەنگىزۋ ءۇشىن وزىندىك تالاپتار قويىلادى. بۇل – ەڭ الدىمەن جوعارى ءبىلىمدى, بىلىكتى كىتاپحاناشى مامانداردىڭ بولۋى. ەلىمىزدە جوعارى ءبىلىمدى كىتاپحاناشىلاردى دايارلايتىن وقۋ ورىندارى ساناۋلى. كىتاپحاناشىلارعا ءۇش دەڭگەيلى (باكالاۆر, ماگيستراتۋرا, دوكتورانتۋرا) ءبىلىم مۇمكىندىگىن ۇسىنىپ وتىرعان جالعىز وقۋ ورنى رەتىندە ءال-فارابي اتىنداعى قازاق ۇلتتىق ۋنيۆەرسيتەتىن ايتا الامىز. وسى جىلدىڭ اقپانىندا اتالعان ۋنيۆەرسيتەتتىڭ دۇنيە ءجۇزى تاريحى, تاريحناما جانە دەرەكتانۋ كافەدراسىندا كىتاپحانالىق-اقپاراتتىق جۇيە بويىنشا «ساندىق عالام 4.0: كىتاپحانا قاۋىمداستىعىنا ارنالعان جاڭا تەندەنتسيالار مەن مىندەتتەر» اتتى ءبىرىنشى قىسقى مەكتەپ وتكىزىلدى. اقش, تۇركيا, يوردانيا, رەسەي, وزبەكستان, قىرعىزستان جانە قازاقستاننىڭ ءار تۇكپىرىنەن كىتاپحانا وكىلدەرى قاتىسىپ, تاجىريبەلەرىمەن بولىسكەن جيىندا كىتاپحاناشى مامانداردىڭ تاپشىلىعى ماسەلەسى مامانداردىڭ قىزۋ تالقىسىنا ءتۇستى. بىزدىڭشە, بۇعان بىرنەشە فاكتور اسەر ەتەدى. مىسالى, كىتاپحانالار مەن كىتاپحاناشىلاردىڭ قوعامداعى بەدەلىنىڭ تومەندىگى, وسى ماماندىققا بولىنەتىن جىل سايىنعى مەملەكەتتىك گرانت سانىنىڭ ازايۋى جانە جالاقىنىڭ ازدىعى.
جاڭادان پايدا بولىپ جاتقان وبلىستار مەن اۋدانداردا كوپشىلىك كىتاپحانالاردىڭ جەتىسپەۋشىلىگى, جاڭا مەكتەپتەردە كىتاپحاناشى مامانداردىڭ تاپشىلىعى قازىرگى كۇننىڭ وزەكتى ماسەلەسىنە اينالىپ وتىر. ستاتيستيكاعا جۇگىنسەك, قازاق ۇلتتىق ۋنيۆەرسيتەتىندە كىتاپحانا ءىسى ماماندىعىن كەيىنگى 5 جىلدا 110-عا جۋىق مامان ءبىتىرىپ شىققان. وكىنىشكە قاراي, كىتاپحانا بەدەلىنىڭ تومەندىگىنەن, ولاردىڭ دەنى 4 جىل وقىعان ماماندىعىن تاستاپ, باسقا سالاعا اۋىسىپ كەتىپ جاتىر. سونىڭ ىشىندە قازىرگى تاڭدا 45-كە جۋىق مامان عانا مەملەكەت سەنىم ارتىپ بەرگەن گرانتتى اقتاپ, جاستاردى كىتاپ وقۋعا شاقىرۋمەن قوسا, كىتاپحاناشى ماماندىعىنىڭ مەرەيى مەن بەدەلىن ۇستەم ەتۋ جولىندا جۇمىس ىستەپ وتىر.
كىتاپحاناشىلاردىڭ كوبى پايدا بولعان داعدارىسقا بەيتاراپ قاراپ, بەلسەنە قاتىسۋعا قالىس قالىپ جاتادى. كىتاپحاناشىلاردىڭ كۇندەلىكتى ورىندايتىن جۇمىستارى ءوز ماماندىعىنىڭ شەبەرلىكتى جەتە مەڭگەرۋدى تالاپ ەتپەيتىنى كەزدەيسوقتىق ەمەس. باس مامانداردىڭ, ءار كاتەگورياداعى كىتاپحاناشىلاردىڭ جوعارى وقۋ ورىندارىندا جانە ماماندىقتى كوتەرۋ جۇيەسىندەگى العان ءبىلىمى قازىرگى تالاپقا ساي ەمەس. كەز كەلگەن وقۋ ورنىنداعى كىتاپحانالاردىڭ وزىندەگى ادىستەمەلىك ورتالىقتار ءوز الدىنا قىزمەتكەرلەردىڭ بارلىق كاتەگورياسىنىڭ ماماندىعىن كوتەرۋدى قامتاماسىز ەتە المايدى. قازىرگى كۇندە كەي كىتاپحانالاردا قارجىنىڭ تاپشىلىعىنان ادىستەمەلىك بولىمدەر تەك اۋىزشا, جازباشا تۇرىندە عانا كومەك كورسەتە الادى. سول سەبەپتى جاڭا ويلار, يدەيالاردىڭ قوسىلۋى ءۇشىن كەڭ تۇردە باسقا كىتاپحاناشىلارمەن تاجىريبە الماسۋى, تانىسۋى, قارىم-قاتىناستا بولۋى ماڭىزدى. اسىرەسە, كىتاپحانا ماماندىعىن كوتەرۋدە كونفەرەنتسيالارعا, دوڭگەلەك ۇستەلدەرگە, ءار جۇيەدەگى كىتاپحانالاردىڭ سەمينارلارىنا قاتىسۋ قاجەت. جوعارى وقۋ ورىندارىنداعى كىتاپحاناشىلار اراسىندا كاسىبي كلۋبتار قۇرۋ كەرەك. سوندا كىتاپحانا قىزمەتكەرلەرى ۇدايى تاجىريبە الماسىپ, ورتاق ماسەلەلەرىن شەشىپ, وسى ماماندىققا جاقىن باسقا سالاداعى باسشىلارمەن كەزدەسىپ, ءباسپاسوز ارقىلى كىتاپحانانىڭ الەۋمەتتىك ماڭىزدىلىعىن ارتتىرۋىنا مۇمكىندىك الادى.
مامانداردى دايارلاۋدا كىتاپحانانىڭ اقپاراتتىق قىزمەتتەرىندەگى جاڭا تەحنولوگيالار كىتاپحانا قىزمەتكەرلەرىن قازىرگى تالاپتارعا بەيىمدەۋگە كومەكتەسىپ, جاڭا رۋح پەن جاڭاشىلدىق اكەلەدى دەپ سەنەمىز.
بايان اسانوۆا,
تەحنيكا عىلىمدارىنىڭ كانديداتى
مارجان ءنۇسىپجانوۆا,
ماگيستر
الماتى
