سەرىكباي مۇتكەنوۆ 1913 جىلى قازىرگى پاۆلودار وبلىسىنىڭ اقتوعاي اۋدانىندا دۇنيەگە كەلگەن. ەڭبەككە ەرتە ارالاسىپ, پاۆلودار پەدۋچيليششەسىن تامامداعان سوڭ, اۋىلدا بالا وقىتا باستايدى. سوعىس باستالعان جىلدارى ەرتىس اۋدانىنداعى قاراقۇدىق اۋىلىندا مۇعالىمدىك قىزمەت اتقارعان. سوعىس وتى ءورشىپ تۇرعان ۋاقىتتا اۋداندىق كوميسسارياتقا بارىپ, مايدانعا ءوز ەركىمەن اتتانۋعا ءوتىنىش جازادى. ءسويتىپ, 1942 جىلدىڭ قاڭتارىندا قىزىل اسكەر قاتارىنا شاقىرىلىپ, باتارەيانىڭ كومانديرى بولادى. 1943 جىلى كەڭەس اسكەرى دنەپردەن ءوتۋ كەزىندە فاشيستەردىڭ قاتتى قارسىلىعىنا تاپ بولعانى بەلگىلى. سول تۇستا ول ەرلىگىمەن كوزگە تۇسەدى. جاۋدىڭ 40-قا جۋىق جاۋىنگەرىنىڭ كوزىن جويىپ, ءوز باتالونىنا ءارى قاراي ءجۇرۋ ءۇشىن جول اشتى. الايدا داڭقتى جەرلەسىمىزگە ءوز قارۋلاستارىمەن بىرگە جەڭىس كۇنىن كورۋ باقىتى بۇيىرمادى. 1944 جىلى 15 قاڭتاردا ەرلىكپەن قازا تاۋىپ, سول جىلدىڭ 9 اقپانىندا كسرو جوعارعى كەڭەسى پرەزيديۋمىنىڭ جارلىعىمەن اعا سەرجانت سەرىكباي مۇتكەنوۆكە كەڭەس وداعىنىڭ باتىرى اتاعى بەرىلەدى.
تۋىستارىنىڭ ايتۋىنشا, سەرىكباي مۇتكەنوۆ اتامىز اقىنجاندى ازامات بولعان. الاپات مايداندا جۇرسە دە, جۇبايى ورىنتايعا, تۋىستارىنا ولەڭمەن حات جولداپ وتىرعان ەكەن. بۇگىندە باتىردىڭ ەسىمىن ماڭگى ەستە ساقتاۋ ماقساتىندا اقتوعاي اۋدانىنداعى اۋىلعا, جەرگىلىكتى مەكتەپكە جانە وبلىس ورتالىعى مەن اقتوعاي اۋىلىنداعى كوشەلەرگە ەسىمى بەرىلگەن.
مۇتكەنوۆ اۋىلىندا وتكەن باتىردىڭ 110 جىلدىق مەرەيتويىندا 14 كيىز ءۇي تىگىلىپ, اۋىل ماڭىندا ۇلتتىق سپورت تۇرلەرىنەن وبلىستىق دەڭگەيدە جارىستار ۇيىمداستىرىلدى. تويعا جينالعان جۇرتشىلىق ەڭ اۋەلى مۇتكەنوۆ ورتا مەكتەبىندەگى باتىردىڭ ءبيۋستى جانىندا وتكەن سالتاناتتى جيىنعا قاتىسىپ, ءبىلىم ورداسىنداعى مۇراجايدى تاماشالادى. اقتوعاي اۋدانىنىڭ اكىمى قارشىعا ارىنوۆ, باتىردىڭ جاقىن تۋىسى بالعابەك الەجانوۆ, اۋداننىڭ قۇرمەتتى ازاماتتى ولجاباي ارالوۆ داڭقتى جەرلەسىمىزدىڭ ەرلىك ىستەرى مەن ونىڭ ەسىمىن جاس ۇرپاققا ناسيحاتتاۋ ماقساتىندا جۇزەگە اسىپ جاتقان يگى ءىس-شارالار جايىندا اڭگىمەلەدى.
ايتىپ وتەيىك, جەڭىستىڭ 63 جىلدىعىنا وراي ۋكرايناداعى ريزينو ەلدى مەكەنىندە سەرىكباي مۇتكەنوۆكە گرانيتتى ەسكەرتكىش ورناتىلىپ, اشىلۋىنا پاۆلودار وبلىسى پاتريوتتىق ەكسپەديتسيا وكىلدەرى قاتىستى. ال 2020 جىلى تۋعان اۋدانى ورتالىعىندا بيۋست قويىلدى.
پاۆلودار وبلىسى
