جالپى, وڭىردە جەڭىستىڭ 78 جىلدىعىن مەرەكەلەۋ قارساڭىندا ازاماتتاردىڭ جەكەلەگەن ساناتتارىنا الەۋمەتتىك كومەك كورسەتۋگە جەرگىلىكتى بيۋدجەتتەن 222,7 ملن تەڭگە كولەمىندە بىرجولعى ماتەريالدىق كومەك تولەۋ جوسپارلانعان. ەكىنشى دۇنيەجۇزىلىك سوعىسقا قاتىسۋشىلارمەن قاتار, بۇرىنعى كسرو-نى قورعاۋ, اسكەري قىزمەتتىڭ وزگە دە مىندەتتەرىن اتقارۋ كەزىندە جارالانعان, مەرتىككەن, مۇگەدەك بولعان – 137, مەملەكەتتىك قاۋىپسىزدىك جانە ىشكى ىستەر ورگاندارىنىڭ باسشى جانە قاتارداعى قۇرامىندا قىزمەت ەتكەن – 7, سونداي-اق تاجىك-اۋعان شەكارا ۋچاسكەسىندە تاپسىرمالار ورىنداعان – 412, تاۋلى قاراباقتا ەتنوسارالىق قاقتىعىستى رەتتەۋگە قاتىسقان – 64 جانە باسقا دا ساناتتاعى اسكەري قىزمەتشىلەرگە قارجىلاي ماتەريالدىق كومەك كورسەتىلەدى.
سونىمەن قاتار جىل باسىنان وبلىس بويىنشا ەكىنشى دۇنيەجۇزىلىك سوعىسىنىڭ 10 قاتىسۋشىسى مەن مۇگەدەگىنە كوممۋنالدىق قىزمەت (ونىڭ ىشىندە جىلىتۋ, ىستىق جانە سۋىق سۋ, گاز بەن ەلەكتر توعى) اقىسى ءۇشىن اي سايىن 3 ايلىق ەسەپتىك كورسەتكىش مولشەرىندە تولەم جۇرگىزىلەدى. سوعىسقا قاتىسۋشىلار مەن مۇگەدەكتەر قاجەتىنە قاراي ەستۋ اپپاراتىن, ساناتورلىق-كۋرورتتىق جولدامانى, قولاربانى, بالداقتى, پروتەزدىك-ورتوپەديالىق بۇيىمدى, ت.ب. ءتۇرلى تەحنيكالىق قوسالقى, كومەكشى, گيگيەنالىق قۇرالداردى ءبىرىنشى كەزەكتە الادى.
مايدانعا تالعار اۋدانىنان 2389 ازامات اتتانىپ, ونىڭ 1441-ءى قازا تاپقان نەمەسە حابار-وشارسىز كەتكەن. ەرەن ەرلىك كورسەتكەن تالعارلىق نيكولاي ۆوروبەۆ پەن نيكولاي بەدرەنكو كەڭەس وداعىنىڭ باتىرى اتانعان. ال ۆاسيلي بابەنكو, ميحايل يساەۆ, الپىسباي قۋانىشەۆ «داڭق» وردەنىن الىپ, ەل مەرەيىن ۇستەم ەتكەن.
وسى كۇنى تالعار اۋدانىندا ەكىنشى دۇنيەجۇزىلىك سوعىسقا قاتىسقان جالعىز ارداگەر – لەگوستاەۆ ۆياچەسلاۆ فەودروۆيچ قالعان. 1923 جىلى تالعار قالاسىندا دۇنيەگە كەلگەن ول 7 جىلدىق بىلىممەن 1942 جىلدىڭ كوكتەمىندە مايدان شەبىنە اتتانادى. العاش اشحابادتاعى جاياۋ اسكەر ۋچيليششەسىن ءتامامداپ, كالينين مايدانىنا قاتىسىپ, حوللي, نەۆەل, ۆەليكيە لۋكي قالالارىن جاۋدان ازات ەتۋدە ەرلىك كورسەتەدى. بۇدان ءارى موتواتقىشتار, مينومەنتشىلەر ۆزۆودتارىنىڭ كومانديرى بولعان ۆ.لەگوستاەۆ رۋدنە قالاسىندا اۋىر جاراقات الىپ, ەلگە ورالادى. تالعار قالاسىنداعى اۋىلشارۋاشىلىق تەحنيكۋمىن ءتامامداپ, اگرونوم ماماندىعى بويىنشا ابىرويلى ەڭبەك ەتەدى. كەيىن قارجى سالاسىندا قىزمەت ەتە ءجۇرىپ, زەينەت جاسىنا شىققان سوعىس ارداگەرىن ەل-جۇرتى ءار كەز قۇرمەتتەيدى.
الداعى كۇزدە 100 جاسقا تولاتىن ارداگەر ۆ.لەگوستاەۆ وتان سوعىسىنىڭ ءى جانە ءىى دارەجەلى وردەندەرىمەن جانە مەرەيتويلىق مەدالدارمەن ماراپاتتالعان.
الماتى وبلىسى
