ول 1925 جىلى سولتۇستىك قازاقستان وبلىسىنىڭ بۇرىنعى لەنين اۋدانىنا قاراستى جامبىل اۋىلىندا ومىرگە كەلگەن. اۋىل مەكتەبىندە ءبىلىم العان. بالعىن بالالىق شاعى ءتاتتى باستالعانىمەن ءجاسوسپىرىم كەزى اۋىرتپالىققا تولى قاسىرەتتى كەزەڭگە تۇسپا-تۇس كەلدى. 1942 جىلى 17 جاسقا تولعان ساتتە قىزىل اسكەر قاتارىنا شاقىرىلادى. ۆلاديۆوستوكتا وقۋ-جاتتىعۋ جيىنىنا قاتىسقان. سودان كەيىن بەلارۋس مايدانىنا اتتانادى. سوعىس جاعدايىنا بايلانىستى اسكەري بولىمدەرى ءجيى اۋىسقان. 742-اتقىشتار پولكىندە, 45-اتقىشتار پولكىندە اۆتوماتشى, 6-اتقىشتار بريگاداسىنىڭ بريگادير-اۆتوماتشىسى بولىپ اسكەري بورىشىن وتەگەن. بۇل ۋاقىت كەڭەس وداعىنىڭ فاشيست اسكەرىمەن جان الىسىپ, جان بەرىسىپ جاتقان كەزى ەدى. جاس جىگىت ەكى جىل قان مايداندا بولىپ, جەڭىستىڭ كۋاگەرى بولادى. سوعىستان كەيىن بىردەن ۇيىنە قايتپاي, اسكەري بورىشىن وتەۋدى جالعاستىرادى. 1945-1948 جىلدارى سۋۆوروۆ پەن كۋتۋزوۆ ءبولىمىنىڭ 44-قىزىل تۋلى پولوتسك موتواتقىشتار قۇرامىندا مينومەتشى بولىپ قىزمەت ەتەدى.
1948 جىلى ەلگە كەلگەننەن كەيىن كورشى اۋىلدىڭ كامەن ەسىمدى قىزىمەن شاڭىراق كوتەرەدى. ەكەۋى 5 بالا تاربيەلەپ, وسىرەدى. اۋىلدا بۋحگالتەرلىكتەن باستاپ بىرنەشە لاۋازىمدى قىزمەتتەر اتقارادى. سونداي-اق تۋعان جەرىندە اۋىل شارۋاشىلىعىمەن شۇعىلدانعان. 1984-1986 جىلدار ارالىعىندا سولتۇستىك قازاقستان وبلىسى ءىىب ەس-164/4 مەكەمەسىندە ماسكەۋ اۋدانىنا قاراستى گورنىي اۋىلىنداعى ورتالىق قويمانىڭ مەڭگەرۋشىسى بولىپ ەڭبەك ەتەدى. ءىىى دارەجەلى «ەرلىگى ءۇشىن», ءىى دارەجەلى «وتان سوعىسى» وردەندەرىمەن ماراپاتتالعان. سونداي-اق ول «گەرمانيانى جەڭگەنى ءۇشىن», «كەنيگسبەرگتى العانى ءۇشىن» مەدالدارىن يەلەنگەن. «اكەم ناعىز پاتريوت بولاتىن. سوعىس تۋرالى كوپ ايتپاسا دا ءبىردى-ەكىلى وقيعالارىن بايانداپ وتىراتىن. ىسكە مىعىم, جاۋاپتى ادام ەدى. ەلگە سىيلى, مارتەبەلى ازاماتتاردىڭ الدى بولاتىن», دەپ ەسكە الادى مايدانگەردىڭ ۇلى, زاپاستاعى پراپورششيك مارات دۇيسەنوۆ.
ال باتىردىڭ نەمەرەسى, ەفرەيتور راحات داۋرەنبەكتىڭ ايتۋىنشا, اتاسى «قىزىل جۇلدىز» وردەنىنە دە ۇسىنىلىپتى. ول جاۋىنگەردى ماراپاتقا ۇسىنعان قۇجاتتى كورسەتتى. وندا «داۋرەنبەك دۇيسەنوۆ 1945 جىلدىڭ 17-18 اقپانىندا ميلزام اۋدانىندا ورنالاسقان نەمىس قورعانىسىن تالقانداۋ كەزىندە ءوز پۋلەمەتىنەن جاۋدىڭ پۋلەمەتشىلەرى ورنالاسقان نۇكتەنى جويىپ, قارسىلاس ءتورت ءفاشيستىڭ كوزىن جويعانى ءۇشىن «قىزىل جۇلدىز» وردەنىنە ۇسىنىلادى» دەپ جازىلعان.
سونداي-اق قۇجاتتا د.دۇيسەنوۆ كوزىن جويعان تورتەۋدىڭ ەكەۋى جاۋ مەرگەندەرى ەكەنى ايتىلعان. ول وسىلايشا اسكەرىنىڭ لايىقتى پوزيتسياعا ورنالاسىپ الۋىنا ىقپال ەتكەن. قۇجاتقا 346-جەكە پۋلەمەت بريگاداسىنىڭ كومانديرى رۋديچ قول قويعان. سول جىلدىڭ جازىندا سوعىس اياقتالىپ, ۇسىنىستىڭ جاۋابى بەلگىسىز كۇيدە قالعان.
Cوعىس ارداگەرىنىڭ ۇرپاقتارى اراسىندا راحات داۋرەنبەك ۇلتتىق ۇلان ساپىندا قىزمەت ەتىپ ءجۇر. ول اسكەر قاتارىندا ءوزىن جاۋاپتى ءارى ۇلگىلى سارباز رەتىندە كورسەتىپ, ەفرەيتور اتاعىن العان. ال مايدانگەردىڭ ومىرلىك جارى كامەن بۇگىندە پەتروپاۆل قالاسىندا تۇرىپ جاتىر
جانبولات كەنجەعۇل,
جۋرناليست
